ଲୋଇସିଂହା,୨୧।୬(ସୁଶାନ୍ତ ବାରିକ): ବଲାଙ୍ଗୀର ଜିଲା ଆଗଲପୁର ବ୍ଲକ ନଅଗାଁ(ଖ) ପଞ୍ଚାୟତ ସାନଟିକା ଗ୍ରାମର ଏମଆଇପି କଟାର ପୁନରୁଦ୍ଧାର କାର୍ଯ୍ୟ ହାତକୁ ନିଆଯାଇଛି। ତେବେ ଜୁନ୧୫ ତାରିଖ ଗଡି ଯାଇଥିଲେ ମଧ୍ୟ କାମ ସନ୍ତୋଷଜନକ ହୋଇ ପାରିନାହିଁ। ବର୍ଷା ହେଲେ କଟାରେ ପାଣି ଭରିଯିବ। ଏଣୁ ଏବାବଦ ଅନୁଦାନ ହଡପ ଉଦ୍ଦେଶ୍ୟରେ ଠିକା ସଂସ୍ଥା ପକ୍ଷରୁ ମନ୍ଥର ଗତିରେ କାମ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମବାସୀ ସ୍ଥାନୀୟ ବିଧାୟକ ତଥା ସ୍ବାସ୍ଥ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ ପରେ ବି ବିଭାଗ ପୁନରୁଦ୍ଧାର କାର୍ଯ୍ୟରେ ତପତ୍ରତା ଦେଖାଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି ା
ପ୍ରକାଶ ଯେ, ସାନଟିକା-ବଡଟୀକା ରାସ୍ତାରେ ୧୪ ଏକର ପରିସୀମାର ଏମଆଇପି କଟା(ଜଳାଶୟ) ରହିଛି। ଏହି ଜଳାଶୟରେ ଗତବର୍ଷ ପଞ୍ଚାୟତ ପକ୍ଷରୁ ପୁନଉଦ୍ଧାର କାର୍ଯ୍ୟ କରାଯାଇଥିଲା। ଚଳିତବର୍ଷ କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ଜଳାଶୟର ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ କାମ ହାତକୁ ନିଆଯାଇଛି। କାମ ଦେଢ ମାସ ହେବ ଚାଲିଛି ା କିନ୍ତୁ ଅଦ୍ୟାବଧି ସୂଚନା ଫଳକ ଲଗାଯାଇନାହିଁ। ଉକ୍ତ କଟାର ମାଟି ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ ପାଇଁ ଆସିଥିବା ଅନୁଦାନ କେତେ ସେ ନେଇ ସାନଟିକା ଗ୍ରାମବାସୀଙ୍କୁ ଅନ୍ଧାରରେ ରଖାଯାଇଛି ା ପ୍ରାୟ ଦେଢ ମାସ ହେବ ଜଳାଶୟରୁ ମାଟି ପୁନରୁଦ୍ଧାର ପାଇଁ ଏକ ଚେନ ମେଶିନ ଓ ଗୋଟିଏ ଟ୍ରାକ୍ଟରରେ କାମ ଚାଲିଛି। ଏହି କାରଣରୁ କାର୍ଯ୍ୟ ସନ୍ତୋଷଜନକ ହୋଇପାରିନାହିଁ ା ଏନେଇ ଗ୍ରାମବାସୀ ସ୍ଥାନୀୟ ବିଧାୟକ ତଥା ସ୍ବାସ୍ଥ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ମନ୍ତ୍ରୀଙ୍କ ତାଗିଦ ପରେ ମଧ୍ୟ ବିଭାଗ ଓ ଠିକାଦାର ତପତ୍ରତା ଦେଖାଇନାହାନ୍ତି। କାମରେ କୌଣସି ସୁଧାର ନ ଆସିବାରୁ ଗ୍ରାମରେ ଅସନ୍ତୋଷ ଲାଗି ରହିଛି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ସରୋଜ ବେହେରା କହିଛନ୍ତି, କାମରେ ସୁଧାର ଆଣିବା ପାଇଁ ଠିକା ସଂସ୍ତାକୁ ୨ ଥର ଚିଠି କରାଗଲାଣି। ଜୁଲାଇ ମାସ ପର୍ଯ୍ୟନ୍ତ କାମ ପାଇଁ ଧାର୍ଯ୍ୟ ସମୟ ସୀମା ରହିଛି। ତେବେ ସରକାରୀ ନିର୍ଦ୍ଦେଶ ମୁତାବକ ମାଟି କାମ ଜୁନ ୧୫ ଶେଷ ତାରିଖ ବୋଲି କହିବାରୁ ପାଗ ଦେଖି କାମ ହୋଇ ପାରିବ। ଧାର୍ଯ୍ୟ ଜୁଲାଇ ମାସ ମଧ୍ୟରେ ପ୍ରକଳ୍ପର ଗାର୍ଡୱାଲ ଓ ଅନ୍ୟାନ୍ୟ କାମ କରାଯିବ ବୋଲି ସେ କହିଥିଲେ। ଧାର୍ଯ୍ୟ ସମୟରେ କାମ ନହେଲେ ଟଙ୍କା ରିକଭରି କରାଯିବ ବୋଲି ସେ କହିଛନ୍ତି। ପ୍ରକାଶଯୋଗ୍ୟ, ପ୍ରକଳ୍ପ କାମ ପୂର୍ବରୁ ସୂଚନା ଫଳକ ଲଗାଇବାର ସରକାରୀ ନିର୍ଦ୍ଦେଶ ରହିଛି। କିନ୍ତୁ ଲୋଇସିଂହା ଓ ଆଗଲପୁର ବ୍ଲକରେ ଚାଲିଥିବା ଉନ୍ନୟନ ପ୍ରକଳ୍ପ କାମରେ କାହିଁକି ସୂଚନା ଫଳକ ଲଗାଯାଉନାହିଁ ତାହା ପ୍ରଶ୍ନବାଚୀ ସୃଷ୍ଟି କରିଛି। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି।
