ହର୍ଷବର୍ଦ୍ଧନ ବେହେରା
ଯାଜପୁର ଅଫିସ, ୨୭ା୪: ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ରିକନ୍ଷ୍ଟ୍ରକ୍ଟିଭ୍ ସର୍ଜରି(ଆର୍ସିଏସ୍)ପ୍ରକ୍ରିୟାକୁ ସୁଦୃଢ଼ୀକରଣ କରିବାକୁ ୨୦୨୨-୨୩ରେ ପ୍ରୋଗ୍ରାମ ଇମ୍ପ୍ଲିମେଣ୍ଟେଶନ ପ୍ଲାନ୍ରୁ ବିଭିନ୍ନ ଯନ୍ତ୍ରପାତି କିଣିବାକୁ ନିର୍ଦ୍ଦେଶ ହୋଇଛି। ଏହାସହ ରାଜ୍ୟର ସମସ୍ତ ୩୦ ଜିଲା ସଦର ଡାକ୍ତରଖାନା ସମେତ କ୍ୟାପିଟାଲ ହସ୍ପିଟାଲରେ କୁଷ୍ଠ ରୋଗୀମାନଙ୍କ ଆର୍ସିଏସ୍ ବ୍ୟବସ୍ଥା କରିବାକୁ ଗୁରୁତ୍ୱାରୋପ କରାଯାଇଛି। ସେହିପରି ବେସରକାରୀ ଡାକ୍ତରଖାନାଗୁଡ଼ିକରେ ମାଗଣାରେ ଆର୍ସିଏସ୍ ସୁବିଧା ପାଇବାକୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା(ବିଏସ୍କେୱାଇ)ରେ ଅନ୍ତର୍ଭୁକ୍ତ କରାଯାଇଛି। ମଜୁରି କ୍ଷତିର ଭରଣା ପାଇଁ ଚିକିତ୍ସାଧୀନ କୁଷ୍ଠରୋଗୀଙ୍କୁ ଏକ ସମୟରେ ୧୨ ହଜାର ଟଙ୍କା ସହାୟତା ସମେତ ୧୫୦୦ ଟଙ୍କା ଯିବାଆସିବା ଖର୍ଚ୍ଚ ଏବଂ ଔଷଧ ଖର୍ଚ୍ଚ ବାବଦକୁ ୫୦୦୦ ଟଙ୍କା ଦିଆଯାଉଛି। ଏନେଇ କୁଷ୍ଠରୋଗୀମାନଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ଆଶାକର୍ମୀମାନଙ୍କୁ ୫୦୦ ଟଙ୍କା ଲେଖାଏ ପ୍ରଦାନ କରାଯାଉଛି। ନ୍ୟାଶନାଲ ଲେପ୍ରୋସି ଇରାଡିକେଶନ ପ୍ରୋଗ୍ରାମ (ଏନ୍ଏଲ୍ଇପି)ରେ ୩ ମାସ ମଧ୍ୟରେ ଏହି ପ୍ରକ୍ରିୟା ସାରିବାକୁ ନିର୍ଦ୍ଦେଶ ହୋଇଛି। କିନ୍ତୁ ଆର୍ସିଏସ୍ ପ୍ରକ୍ରିୟା ଏଯାଏ କେତେକ ଜିଲାରେ ଆରମ୍ଭ ହୋଇ ନ ଥିବା ଜଣାପଡ଼ିଛି। ଏଠାରେ ଯାଜପୁର ଜିଲାର ବ୍ୟାସନଗର ସହରରେ ଥିବା ଅବହେଳିତ ଗାନ୍ଧୀ କୁଷ୍ଠାଶ୍ରମକୁ ଉଦାହରଣ ଭାବେ ନିଆଯାଇପାରେ। ଏହି କଲୋନିରେ ୧୫୬ ଜଣ ଅନ୍ତେବାସୀ ରହୁଛନ୍ତି। ଏଯାଏ ଜଣେ ବି କୁଷ୍ଠରୋଗୀଙ୍କ ଆର୍ସିଏସ୍ ହୋଇପାରି ନ ଥିବା ବସ୍ତିବାସିନ୍ଦାଙ୍କଠାରୁ ସୂଚନା ମିଳିଛି। ସୁଷମା ସିଂ, କଟିଆ ରଣା ପ୍ରମୁଖ କହିଛନ୍ତି, ଦୀର୍ଘ ୫୦ ବର୍ଷରୁ ଊର୍ଦ୍ଧ୍ୱ ସମୟ ହେଲା ସେଠାରେ ଜରାଜୀର୍ଣ୍ଣ ଓ ବିପଦସଙ୍କୁଳ ଅବସ୍ଥାରେ ଝାଟିମାଟି କୁଡ଼ିଆରେ ସେମାନେ କାଳାତିପାତ କରୁଛନ୍ତି। ପକ୍କାଘର ଏମାନଙ୍କ ପାଇଁ ସ୍ବପ୍ନ ହୋଇଛି। ସ୍ବତନ୍ତ୍ର ବସତି ସ୍ଥାପନ କରିବେ ବୋଲି ସରକାର କେବଳ ପ୍ରତିଶ୍ରୁତି ଦେଉଛନ୍ତି। ହେଲେ କିଛି ସୁଫଳ ମିଳିପାରିନାହିଁ। ରୋଗୀମାନଙ୍କୁ ଆର୍ସିଏସ୍ କରିବା କଥା ସେମାନେ ନୂଆ ଭାବେ ଶୁଣିବାକୁ ପାଉଛନ୍ତି। ଏଠାରେ କୃଷ୍ଣ ଜେନା, କାର୍ମି ମୁଣ୍ଡା, ଦଶମା ସିଂ ପ୍ରମୁଖ ପ୍ରାୟ ୧୦ ଜଣ କୁଷ୍ଠରୋଗୀଙ୍କ କିଛି ଅଙ୍ଗପ୍ରତ୍ୟଙ୍ଗ କଟି ଯାଇଛି। ସେମାନଙ୍କ ଆର୍ସିଏସ୍ କରାଗଲେ ଉପକୃତ ହୋଇପାରିବେ। ହେଲେ ସରକାରୀ ଭାବେ ଏଯାଏ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ ବୋଲି ସେମାନେ କହିଛନ୍ତି। ଅନ୍ୟପକ୍ଷେ ପ୍ରାୟ ୫ ବର୍ଷ ହେଲା ବ୍ୟାସନଗର ପୌର ପ୍ରଶାସନ ପକ୍ଷରୁ ଯୋଡ଼ାବର ନିକଟସ୍ଥ ଗଣ୍ଡାନାଳ କୂଳରେ ଥଇଥାନ କରିବାକୁ ଯୋଜନା କରାଯାଇଛି। ତାହା ବି ଯୋଜନାରେ ସୀମିତ ରହିଛି।
ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଲେପ୍ରୋସି ସେଲ୍ର ରିପୋର୍ଟ ଅନୁସାରେ ଓଡ଼ିଶାର ୨୨ ଜିଲାର ୮୭ କଲୋନୀରେ ୮,୦୩୨ ଅନ୍ତେବାସୀ ଅବହେଳିତ ଅବସ୍ଥାରେ ରହିଛନ୍ତି। ସେଥିମଧ୍ୟରୁ ଆରୋଗ୍ୟ ଲାଭ କରିଥିବା ୨୭୬ ଜଣଙ୍କ ଆର୍ସିଏସ୍ କରିବାକୁ ବିଭାଗ ପକ୍ଷରୁ ଚିହ୍ନଟ ହୋଇଛି। ୧୭୯ ଜଣଙ୍କ ସର୍ଜରି ଚାଲିଥିବାବେଳେ ୨୧ ଜଣ ରୋଗୀଙ୍କ ସର୍ଜରି ମେଡିକାଲ ଅଯୋଗ୍ୟ ବୋଲି ଚିହ୍ନଟ ହୋଇଛି। ୫୯ ଜଣ ଅନିଚ୍ଛା ପ୍ରକାଶ କରିଥିବାବେଳେ ୧୭ ଜଣ ଦାଦନ ଖଟିବାକୁ ଯାଇଛନ୍ତି। ସାମାଜିକ ସୁରକ୍ଷା ଏବଂ ଭିନ୍ନକ୍ଷମ ସଶକ୍ତୀକରଣ ବିଭାଗ ପକ୍ଷରୁ ୨୨ା୪ା୨୦୨୩ରେ ବାଲେଶ୍ୱର, ବରଗଡ଼, କଟକ, ଯାଜପୁର, ଝାରସୁଗୁଡ଼ା, ଖୋର୍ଦ୍ଧା, ମୟୂରଭଞ୍ଜ, ପୁରୀ ଓ ସୁନ୍ଦରଗଡ଼ ଜିଲାର ଜିଲାପାଳ, ଜିଲା ସାମାଜିକ ସୁରକ୍ଷା ଅଧିକାରୀ ପ୍ରମୁଖଙ୍କୁ କୁଷ୍ଠରୋଗୀମାନଙ୍କ ଆର୍ସିଏସ୍ ପ୍ରକ୍ରିୟା ତ୍ୱରାନ୍ବିତ କରିବାକୁ ନିର୍ଦ୍ଦେଶ ହୋଇଛି।
