ନୂଆଦିଲ୍ଲୀ,୨୯ା୩: ବିଗତ କିଛି ବର୍ଷ ହେବ ଭାରତୀୟ ରିଅଲ ଇଷ୍ଟେଟ୍ ଉଦ୍ୟୋଗ ଅଭିବୃଦ୍ଧି ପଥରେ ଅଗ୍ରସର ହେଉଛି। ଏପରିକି ବିଗତ ୫ ବର୍ଷ ମଧ୍ୟରେ ରିଅଲ ଇଷ୍ଟେଟ୍ ଉଦ୍ୟୋଗକୁ ୩୨ ବିଲିୟନ ଡଲାରର ଅଧିକ ପରିମାଣର ଇକ୍ୱିଟି କ୍ୟାପିଟାଲ ମିଳିଥିବା ଜଣାପଡ଼ିଛି। ବିଶେଷକରି ରିଅଲ ଇଷ୍ଟେଟ୍ ଉଦ୍ୟୋଗରେ ବର୍ଷକୁ ବର୍ଷ ଉଭୟ ଚାହିଦା ଓ ନିବେଶ ପରିମାଣ ବୃଦ୍ଧି ପାଇଚାଲିଛି। ଫଳରେ ୨୦୨୨ ବର୍ଷ ମଧ୍ୟରେ ରିଅଲ ଇଷ୍ଟେଟ୍ ଉଦ୍ୟୋଗ ପ୍ରାୟ ୩୨% ବଜାର ଅଂଶଧନ ଅଭିବୃଦ୍ଧି ହାସଲ ସହ ପ୍ରାୟ ୮ (୭.୮) ବିଲିୟନ ଡଲାରର ଇକ୍ୱିଟି କ୍ୟାପିଟାଲ ହାସଲ କରିପାରିଛି। ସେହିଭଳି ଆସନ୍ତା ୨ ବର୍ଷ ମଧ୍ୟରେ ରିଅଲ ଇଷ୍ଟେଟ୍ ଉଦ୍ୟୋଗକୁ ପ୍ରାୟ ୧୩ ବିଲିୟନ ଡଲାର ନିବେଶ ଆସିବାର ଆକଳନ କରାଯାଉଛି ବୋଲି ରିଇଲ ଇଷ୍ଟେଟ୍ ପରାମର୍ଶ ଫାର୍ମ ସିବିଆର୍ଇ ପକ୍ଷରୁ ଆଶାବ୍ୟକ୍ତ କରାଯାଇଛି। ଉଲ୍ଲେଖଯୋଗ୍ୟ, ସିବିଆର୍ଇର ନୂତନ ରିପୋର୍ଟରେ ଏ ନେଇ ବିସ୍ତୃତ ଭାବେ ଆଲୋକପାତ କରାଯାଇଛି। ଏପରିକି ଉକ୍ତ ରିର୍ପୋଟରେ ଉଲ୍ଲେଖ କରାଯାଇଛି, ୨୦୨୩ ଏବଂ ୨୦୨୪ ବର୍ଷରେ ରିଅଲ ଇଷ୍ଟେଟ୍ ଉଦ୍ୟୋଗରେ ସର୍ବାଧିକ ନିବେଶ ଓ କାର୍ଯ୍ୟାଳୟ ସ୍ଥଳକୁ ମିଳିବାର ଯଥେଷ୍ଟ ସମ୍ଭାବନା ରହିଛି। ମୋଟ ନିବେଶରେ କାର୍ଯ୍ୟାଳୟ ସ୍ଥଳ ପରେ ଶିଳ୍ପ ଏବଂ ଲଜିଷ୍ଟିକ୍ କ୍ଷେତ୍ର ଓ ଭୂମିକୁ ମିଳିପାରେ ବୋଲି ଆକଳନ କରାଯାଉଛି। ଏହାବ୍ୟତୀତ ଡାଟା କେନ୍ଦ୍ରକୁ ମଧ୍ୟ ବଡ଼ ନିବେଶ ମିଳିବାର ଯଥେଷ୍ଟ ସମ୍ଭାବନା ରହିଛି ବୋଲି ବଜାର ବିଶେଷଜ୍ଞମାନେ ଆକଳନ କରିଛନ୍ତି। ଫଳରେ ରିୟଲ ଇଷ୍ଟେଟ୍ କ୍ଷେତ୍ରରେ ଇକ୍ୱିଟି ପ୍ରବାହ ଆଗକୁ ବଢ଼ିବା ଯଥେଷ୍ଟ ସମ୍ଭାବନା ରହିଛି। ଏପରିକି ଆସନ୍ତା ୨ବର୍ଷ ମଧ୍ୟରେ ରିଅଲ ଇଷ୍ଟେଟ୍ ଉଦ୍ୟୋଗରେ ପ୍ରାୟ ୧୨ରୁ ୧୩ ବିଲିୟନ ଡଲାର ନିବେଶ ଆସିବାର ଯଥେଷ୍ଟ ସମ୍ଭାବନା ଅଛି। ୨୦୨୪ ସୁଦ୍ଧା ରିଅଲ ଇଷ୍ଟେଟ୍ କ୍ଷେତ୍ରରେ ବାର୍ଷିକ ହାରାହାରି ୬ ରୁ ୭ ବିଲିୟନ ଡଲାରର ଇକ୍ୱିଟି ନିବେଶର ଆକଳନ କରାଯାଉଛି। ଅପରପକ୍ଷରେ ସିବିଆର୍ଇର ରିପୋର୍ଟ ଅନୁସାରେ ଭାରତର ପ୍ରମୁଖ ସହର ନୂଆଦିଲ୍ଲୀ, ମୁମ୍ବାଇ, ବେଙ୍ଗାଲୁରୁ, ହାଇଦ୍ରାବାଦ ଓ କୋଲକାତାରେ ରିଅଲ ଇଷ୍ଟେଟ୍ କ୍ଷେତ୍ରର ଚାହିଦା ଅଧିକ ରହିଛି। ଏପରିକି ଉକ୍ତ କ୍ଷେତ୍ରରେ ଇକ୍ୱିଟି ନିବେଶ ୨୦୧୮ରେ ପ୍ରାୟ ୬ (୫.୯) ବିଲିୟନ ଡଲାର ରହିଥିଲା ବେଳେ ୨୦୧୯ରେ ତା’ର ପରିମାଣ ୬.୪ ବିଲିୟନ ଡଲାର ହୋଇଯାଇଥିଲା। ଏପରିକି ୨୦୨୦ରେ ରିଅଲ ଇଷ୍ଟେଟ୍ ଉଦ୍ୟୋଗରେ ପ୍ରାୟ ୬ ବିଲିୟନ ଡଲାର ନିବେଶ ହୋଇଥିଲାବେଳେ ୨୦୨୧ରେ ମଧ୍ୟ ପ୍ରାୟ ୬ (୫.୯) ବିଲିୟନ ଡଲାର ଏବଂ ୨୦୨୨ ରେ ଏହାର ପରିମାଣ ପ୍ରାୟ ୮ (୭.୮) ବିଲିୟନ ରହିଥିଲା।
