ନୂଆଦିଲ୍ଲୀ, ୨୯।୯: ରିଅଲ ଇଷ୍ଟେଟ୍ ଅପରାଧ ଓଡ଼ିଶା ଜମାକାରୀ ସ୍ବାର୍ଥ ସୁରକ୍ଷା (ଓପିଆଇଡି) ଆଇନ, ୨୦୧୧ ଅଧୀନରେ ଆସୁ ନ ଥିବା ଓଡ଼ିଶା ହାଇକୋର୍ଟ କହିଛନ୍ତି। ଅନୈତିକ ଫାଇନାନ୍ସ ସଂସ୍ଥାଗୁଡ଼ିକର ଲୋଭନୀୟ ସ୍କିମ୍ରେ ପ୍ରଭାବିତ ହୋଇ ଠକାମିର ଶିକାର ହେଉଥିବା ନିରୀହ ଜମାକାରୀମାନଙ୍କ ସ୍ବାର୍ଥର ସୁରକ୍ଷା ଲକ୍ଷ୍ୟରେ ଓପିଆଇଡି ଆଇନ କାର୍ଯ୍ୟକାରୀ ହୋଇଥିଲା ବୋଲି ଜଷ୍ଟିସ୍ ଏସ୍.କେ. ପାଣିଗ୍ରାହୀଙ୍କ ଖଣ୍ଡପୀଠ କହିଛନ୍ତି। ଏହି ଆଇନ ଜମାରାଶି ଦେଣନେଣ କରୁଥିବା ବ୍ୟବସାୟ ସହ ଜଡ଼ିତ। ତେଣୁ ରିଅଲ ଇଷ୍ଟେଟ କାରବାରକୁ ଏହା ଅଧୀନକୁ ନିଆଯାଇପାରିବ ନାହିଁ। ଓପିଆଇଡ଼ି ଆଇନର ଧାରା ୨(ବି)ରେ ଉଲ୍ଳେଖ ଥିବା ‘ଜମା’ର ସଂଜ୍ଞା ସ୍ଥାବର ସମ୍ପତ୍ତି ପାଇଁ ରିଅଲ ଇଷ୍ଟେଟ୍ର ଅର୍ଥ କାରବାର ନୁହେଁ ବୋଲି ହାଇକୋର୍ଟ କହିଛନ୍ତି। ଓପିଆଇଡି ଆଇନର ଧାରା ୬ରେ ଜଣେ ରିଅଲ ଇଷ୍ଟେଟ୍ କମ୍ପାନୀ ପରିଚାଳନା ନିର୍ଦ୍ଦେଶକଙ୍କ ବିରୋଧରେ ଦାଏର ମକଦ୍ଦମାକୁ ହାଇକୋର୍ଟ ଖାରଜ କରିଦେଇଛନ୍ତି। ତେବେ ସିଆର୍ପିସିର ଧାରା ୪୮୨ରେ ଦାଏର ମାମଲାରେ ହାଇକୋର୍ଟ ହସ୍ତକ୍ଷେପ କରିନାହାନ୍ତି। ୬୦୦ ଲୋକଙ୍କଠାରୁ ୧୨ କୋଟି ଟଙ୍କା ଠକିଥିବା ଅଭିଯୋଗରେ ଆର୍ଥତ୍କ ଅପରାଧ ଶାଖା (ଇଓଡବ୍ଲ୍ୟୁ) ୨୦୧୮ରେ ଜେଡ୍-ଇନ୍ଫ୍ରା କନ୍ଷ୍ଟ୍ରକ୍ସନ୍ ପ୍ରାଇଭେଟ ଲିମିଟେଡ୍ର ମାଲିକଙ୍କ ବିରୋଧରେ ମାମଲା ରୁଜୁ କରିଥିଲା। ଜଟଣୀ ଅଞ୍ଚଳର ଅଭିଯୋଗକାରୀଙ୍କୁ କମ୍ପାନୀ ଏକ ଜମି ବିକ୍ରି କରିଥିବାବେଳେ ଉକ୍ତ ପ୍ଲଟ୍କୁ ଆପ୍ରୋଚ୍ ରୋଡ୍ ଯୋଗାଇଦେବାର ପ୍ରତିଶ୍ରୁତି ଦେଇଥିଲା। ପରବର୍ତ୍ତୀ ସମୟରେ କମ୍ପାନୀ ରାସ୍ତା ତିଆରି କରି ନ ଥିଲା। ରାସ୍ତା ନିର୍ମାଣ ହେବାକୁ ଥିବା ଜମି କମ୍ପାନୀ ମାଲିକାନାରେ ନ ଥିବା ଅଭିଯୋଗକାରୀ ଜାଣିବା ପରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
