ନୂଆଦିଲ୍ଲୀ,୨୫।୧୧: ଦୋଷୀ ସାବ୍ୟସ୍ତ ହୋଇଥିବା ନେତାମାନଙ୍କୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା ନ କରିବାକୁ ସୁପ୍ରିମକୋର୍ଟ ସିଧାସଳଖ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି। ଏହା ସହିତ ସୁପ୍ରିମକୋର୍ଟ ରାଜ୍ୟମାନଙ୍କୁ କହିଛନ୍ତି ଯେ, ସମ୍ପ୍ରତି କାର୍ଯ୍ୟ କରୁଥିବା ଏମ୍ପି ବିଧାୟକ ତଥା ପୂର୍ବତନ ଏମ୍ପି-ବିଧାୟକଙ୍କ ବିରୋଧରେ ହୋଇଥିବା ମାମଲାର ବିଚାର ପାଇଁ ଏକ ସ୍ବତନ୍ତ୍ର ମାଜିଷ୍ଟ୍ରେଟ କୋର୍ଟ ଗଠନ କରନ୍ତୁ। ଆହ୍ଲାବାଦ ହାଇକୋର୍ଟଙ୍କ ନିଷ୍ପତ୍ତିକୁ ଭୁଲ ବ୍ୟାଖ୍ୟା କରି ସୁପ୍ରିମକୋର୍ଟ କହିଛନ୍ତି ଯେ କେବଳ ସ୍ପେଶାଲ ସେସନ କୋର୍ଟ ଗଠନ ହୋଇଥିବାବେଳେ ମାଜିଷ୍ଟ୍ରେଟ କୋର୍ଟ ଗଠନ କରାଯାଇ ନାହିଁ।
ସୁପ୍ରିମକୋର୍ଟ କହିଛନ୍ତି ଯେ ଆଦେଶ ସ୍ପଷ୍ଟ ଥିଲା ଯେ ଯେଉଁଠାରେ ଆବଶ୍ୟକତା ଅଛି ସେଠାରେ ଏକ ମାଜିଷ୍ଟ୍ରେଟ କୋର୍ଟ ଏବଂ ସେସନ କୋର୍ଟ ଗଠନ କରାଯିବା ଉଚିତ। ଏଥିରୁ ସ୍ପଷ୍ଟ ଯେ ସମ୍ପ୍ରତି କାର୍ଯ୍ୟ କରୁଥିବା ଏମ୍ପି ବିଧାୟକ ତଥା ପୂର୍ବତନ ଏମ୍ପି-ବିଧାୟକଙ୍କ ବିରୋଧରେ ହୋଇଥିବା ମାମଲାର ଶୁଣାଣି ଏହି ସ୍ବତନ୍ତ୍ର ଅଦାଲତରେ କରାଯିବ। ଏକ ମାମଲାରେ ସମାଜବାଦୀ ପାର୍ଟି (ଏସପି) ଏମ୍ପି ଆଜମ ଖାଁଙ୍କ ତରଫରୁ ଏକ ଆବେଦନ କରାଯାଇଥିଲା ଏବଂ ହାଇକୋର୍ଟଙ୍କ ବିଜ୍ଞପ୍ତିକୁ ଚ୍ୟାଲେଞ୍ଜ କରାଯାଇଥିଲା ଯେଉଁଥିରେ ଏମ୍ପି ତଥା ବିଧାୟକଙ୍କ ମାମଲା ସେସନ କୋର୍ଟକୁ ହସ୍ତାନ୍ତର କରିବାକୁ ମାଜିଷ୍ଟ୍ରେଟ କୋର୍ଟଙ୍କୁ ନିର୍ଦ୍ଦେଶ ଜାରି ହୋଇଥିଲା।
ସୁପ୍ରିମକୋର୍ଟର ପ୍ରଧାନ ବିଚାରପତି ଏନ.ଭି ରମନା, ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ସୂର୍ଯ୍ୟ କାନ୍ତଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କ ସମ୍ମୁଖରେ ଆହ୍ଲାବାଦ ହାଇକୋର୍ଟର ବିଜ୍ଞପ୍ତିକୁ ଚ୍ୟାଲେଞ୍ଜ କରାଯାଇଥିଲା। କୁହାଯାଇଥିଲା ଯେ ମାଜିଷ୍ଟ୍ରେଟ କୋର୍ଟରେ ଯେଉଁ ମାମଲାଗୁଡ଼ିକ ବିଚାର କରାଯିବା ଉଚିତ ସେସନ କୋର୍ଟରେ ସେସବୁର ବିଚାର କରାଯାଉଛି ଏବଂ ଏହା ଆଇନଗତ ବ୍ୟବସ୍ଥାର ଉଲ୍ଲଂଘନ। ଯେତେବେଳେ ସୁପ୍ରିମକୋର୍ଟ ଏହା ଉପରେ ପ୍ରଶ୍ନ କରିଥିଲେ, ଆହ୍ଲାବାଦ ହାଇକୋର୍ଟର ଆଇନଜୀବୀ କହିଥିଲେ ଯେ ପୂର୍ବତନ ବିଧାୟକ ଏବଂ ଏମ୍ପିଙ୍କ ମାମଲାର ଶୁଣାଣି ପାଇଁ ଏକ ସେସନ କୋର୍ଟ ଗଠନ କରାଯାଇଛି। ତେବେ ସ୍ବତନ୍ତ୍ର ମାଜିଷ୍ଟ୍ରେଟ କୋର୍ଟ ଗଠନ କରାଯାଇ ନାହିଁ।
ଏହାର କାରଣ ପଚରାଯିବା ପରେ ଆଇନଜୀବୀ କହିଛନ୍ତି, କେବଳ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ କୋର୍ଟ ଅଫ ସେସନ ଗଠନ କରାଯାଇଛି। ଏନେଇ ବିଚାରପତି ଚନ୍ଦ୍ରଚୂଡ କହିଛନ୍ତି, ଆମର ଆଦେଶକୁ ଭୁଲ ଭାବେ ବ୍ୟାଖ୍ୟା କରା ଯାଇଛି। ଆମେ କହିଥିଲୁ ଯେଉଁଠାରେ ମାଜିଷ୍ଟ୍ରେଟ ଏବଂ କୋର୍ଟ ଅଫ ସେସନ ଗଠନ କରିବାର ଆବଶ୍ୟକତା ଅଛି, ସେଠାରେ ଏକ ସ୍ବତନ୍ତ୍ର ମାଜିଷ୍ଟ୍ରେଟ ଏବଂ ଏକ କୋର୍ଟ ଅଫ ସେସନ ଗଠନ ହେବା ଆବଶ୍ୟକ।
ଅନ୍ୟ ରାଜ୍ୟରେ ପରିସ୍ଥିତି କ’ଣ ବୋଲି ଶୀର୍ଷକୋର୍ଟ କୋର୍ଟ ପରାମର୍ଶଦାତାଙ୍କୁ ପଚାରିଥିଲେ। ପରାମର୍ଶଦାତା କହିଥିଲେ, କିଛି ରାଜ୍ୟରେ ସେସନ ଏବଂ ମାଜିଷ୍ଟ୍ରେଟ କୋର୍ଟ ଗଠନ କରାଯାଇଛି। ଶୁଣାଣି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ହାଜର ହୋଇଥିବା ଅତିରିକ୍ତ ସୋଲିସିଟର ଜେନେରାଲଙ୍କୁ ସୁପ୍ରିମକୋର୍ଟ ପ୍ରଶ୍ନ କରିଥିଲେ, ଦୋଷୀ ନେତାମାନଙ୍କୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଅଟକାଇବାକୁ ପ୍ରସ୍ତୁତ କି? ଏହି ପ୍ରସଙ୍ଗରେ କେନ୍ଦ୍ରର ଷ୍ଟାଣ୍ଡ କ’ଣ? ବୋଲି ମଧ୍ୟ ପଚାରିଛନ୍ତି।
