ଚେନ୍ନାଇ,୨୨।୪: ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କ ପ୍ରଶଂସାରେ ଶତମୁଖ ଇଂଲଣ୍ଡର ପୂର୍ବ ଅଧିନାୟକ ମାଇକେଲ ଭନ୍। ସେ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ସହ ଜାଡେଜାଙ୍କ ତୁଳନା କରିଛନ୍ତି। ଏପରିକି ଜାଡେଜା ଧୋନୀଙ୍କ ପରେ ସିଏସ୍କେର ଉତ୍ତରାଧିକାରୀ ହେବା ଲାଗି ସମସ୍ତଙ୍କଠାରୁ ଆଗରେ ରହିଥିବା ସେ କହିଛନ୍ତି।
କ୍ରିକ୍ବଜ୍ ସହ ସାକ୍ଷାତକାରରେ ମାଇକେଲ କହିଛନ୍ତି, ଜାଡେଜାଙ୍କ ମଧ୍ୟରେ ଅଧିନାୟକ ହେବାର ସମସ୍ତ ଗୁଣ ରହିଛି। ମଇଦାନରେ ଉଭୟ ବୋଲିଂ ଓ ବ୍ୟାଟିଂରେ ସେ ଭଲ। ତାଙ୍କ ଲୟ ବେଶ୍ ପ୍ରଭାବଶାଳୀ। ମାନସିକସ୍ତରରେ ସେ ଦୃଢ଼। ସମସ୍ତ ପରିସ୍ଥିତିରେ ଖେଳିବା ତାଙ୍କୁ ଜଣା। ହୋଇପାରେ ଧୋନୀ ଆଉ ୨ରୁ ୩ ବର୍ଷ ଚେନ୍ନାଇ ପକ୍ଷରୁ ଖେଳିବେ। ତାଙ୍କ ପରେ ଜାଡେଜା ହିଁ ଟିମ୍ ପାଇଁ ସଠିକ୍ ଚୟନ। ଧୋନୀଙ୍କ ପରେ ତାଙ୍କ ଭିତରେ ଅଧିନାୟକ ହେବାର ଗୁଣ ଦେଖିବାକୁ ମିଳେ ବୋଲି ସେ କହିଛନ୍ତି।
