ରସୁଲପୁର,୬ା୧୨(ଡି.ଏନ.ଏ.): ରସୁଲପୁର ବ୍ଲକରେ ୧୦୦୦ରୁ ଊର୍ଦ୍ଧ୍ୱ ରାଶନକାର୍ଡଧାରୀ ସାମଗ୍ରୀ ପାଇବାରୁ ବଞ୍ଚିତ ହୋଇଛନ୍ତି। ହିତାଧିକାରୀଙ୍କ ନାମ ଏକାଧିକ କାର୍ଡରେ ରହିଥିବାରୁ ସେମାନଙ୍କ କାର୍ଡ ବାତିଲ କରି ଦିଆଯାଇଛି। ଏହି ବର୍ଗରେ ଆସୁଥିବା କାର୍ଡଧାରୀଙ୍କ ରାଶନ ସାମଗ୍ରୀ ରିଟେଲରଙ୍କ କୋଟାରୁ କାଟି ଦିଆଯାଇଛି। ଏହାକୁ ନେଇ କାର୍ଡଧାରୀଙ୍କ ମଧ୍ୟରେ ଅସନ୍ତୋଷ ଦେଖାଯାଉଛି। ଏପଟେ ରାଶନକାର୍ଡରେ ଥିବା ତ୍ରୁଟିବିଚ୍ୟୁତିର ସଂଶୋଧନ ହୋଇପାରୁ ନାହିଁ। ଜାତୀୟ ଖାଦ୍ୟ ସୁରକ୍ଷା ଓ ରାଜ୍ୟ ଖାଦ୍ୟ ସୁରକ୍ଷା ଯୋଜନା ପୋର୍ଟାଲ ବନ୍ଦ ଥିବାରୁ ହିତାଧିକାରୀଙ୍କ ସମସ୍ୟା ସମାଧାନରେ ଅସୁବିଧା ସୃଷ୍ଟି ହୋଇଛି। ଶତାଧିକ ହିତାଧିକାରୀ ବ୍ଲକ ଯୋଗାଣ ବିଭାଗ ଅଫିସକୁ ଯାଇ ନିରାଶ ହୋଇ ଫେରୁଛନ୍ତି। ଅପରପକ୍ଷରେ ରାଶନ କାର୍ଡ ଆଧାରରେ ରାଜ୍ୟ ସରକାର ବିଜୁ ସ୍ବାସ୍ଥ୍ୟ ସ୍ମାର୍ଟ କାର୍ଡ ବାଣ୍ଟୁଛନ୍ତି। ଏହି ହିସାବରେ ଏବେ ରାଶନକାର୍ଡରୁ ବାଦ୍ ପଡ଼ିଥିବା ହିତାଧିକାରୀ ବିଜୁ ସ୍ବାସ୍ଥ୍ୟ କଲ୍ୟାଣରୁ ବଞ୍ଚିତ ହେବା ସମ୍ଭାବନା ସୃଷ୍ଟି ହୋଇଛି। ତେଣୁ ଖାଦ୍ୟ ସୁରକ୍ଷା ପୋର୍ଟାଲ ତୁରନ୍ତ ଖୋଲି ସମସ୍ୟା ସମାଧାନ କରିବାକୁ ସାଧାରଣରେ ଦାବି ହେଉଛି।
୨୦୧୩ରେ କେନ୍ଦ୍ର ସରକାରଙ୍କ ପକ୍ଷରୁ ଜାତୀୟ ଖାଦ୍ୟ ସୁରକ୍ଷା ଆଇନ କରାଯାଇ ରାଜ୍ୟ ସରକାରଙ୍କ ଦ୍ୱାରା ଚିହ୍ନଟ ହିତାଧିକାରୀଙ୍କୁ ରାଶନ ସାମଗ୍ରୀ ଯୋଗାଇ ଦିଆଯାଉଛି। ସେହିପରି ରାଜ୍ୟ ସରକାର ୧ ଅକ୍ଟୋବର ୨୦୧୮ରୁ ନିଜସ୍ବ ଖାଦ୍ୟ ସୁରକ୍ଷା ଯୋଜନା ଜରିଆରେ ହିତାଧିକାରୀଙ୍କୁ ରାଶନ କାର୍ଡ ପ୍ରଦାନ କରି ସାମଗ୍ରୀ ଯୋଗାଉଛନ୍ତି। ଏହି ଯୋଜନାରେ ସାମିଲ ହିତାଧିକାରୀଙ୍କୁ ପର୍ଯ୍ୟାୟ ଅନୁସାରେ ଜାତୀୟ ଖାଦ୍ୟ ସୁରକ୍ଷା ଆଇନ ପରିସରଭୁକ୍ତ କରାଯାଉଛି। ପୂର୍ବରୁ ଜାତୀୟ ଖାଦ୍ୟ ସୁରକ୍ଷା ଆଇନରେ ପଞ୍ଜୀକୃତ ହିତାଧିକାରୀଙ୍କ ନାମ ରାଜ୍ୟ ସରକାରଙ୍କ ଖାଦ୍ୟ ସୁରକ୍ଷା ଯୋଜନା କାର୍ଡରେ ରହିଥିବାରୁ କାର୍ଡ ସ୍ବତଃ କଟି ଯାଉଛି। ଅଗଷ୍ଟରୁ ଖାଦ୍ୟ ସୁରକ୍ଷା ପୋର୍ଟାଲ ବନ୍ଦ ଥିବାରୁ ଯୋଜନା ଲକ୍ଷ୍ୟଚ୍ୟୁତ ହୋଇପଡ଼ିଛି।
ଏହି କ୍ରମରେ ଦେଖିବାକୁ ଗଲେ ରସୁଲପୁର ବ୍ଲକର ୨୮ ପଞ୍ଚାୟତରେ ଜାତୀୟ ଖାଦ୍ୟ ସୁରକ୍ଷା ଯୋଜନାରେ ୩୬,୧୨୩ ପରିବାରର ୧ଲକ୍ଷ ୪୦ ହଜାର ୪୭୫ ଜଣଙ୍କୁ ସାମଗ୍ରୀ ଯୋଗାଇ ଦିଆଯାଉଛି। ରାଜ୍ୟ ସରକାରଙ୍କ ଖାଦ୍ୟ ସୁରକ୍ଷା ଯୋଜନାରେ ବ୍ଲକର ୨,୨୭୧ ପରିବାରର ୮୦୪୩ଜଣଙ୍କୁ ସାମଗ୍ରୀ ମିଳୁଥିଲା। ସେଥିମଧ୍ୟରୁ ୧୦୦୦ରୁ ଊର୍ଦ୍ଧ୍ୱ କାର୍ଡ ଓ ୫୦୦୦ରୁ ଊର୍ଦ୍ଧ୍ୱ ଲୋକ ସାମଗ୍ରୀ ପାଇବାରୁ ବଞ୍ଚିତ ହୋଇଛନ୍ତି। ପୂର୍ବରୁ ଜାତୀୟ ଖାଦ୍ୟ ସୁରକ୍ଷା ଯୋଜନାରେ ପରିବାରର ମୁଖ୍ୟଙ୍କ ସମେତ ଅବିବାହିତ ପୁଅ ଓ ଝିଅଙ୍କ ନାମ ରହିଥିଲା। ସେମାନେ ବିବାହିତ ହୋଇଯିବା ପରେ ନିଜ ପରିବାରକୁ ନେଇ ରାଜ୍ୟ ସରକାରଙ୍କ ଯୋଜନା ଜରିଆରେ ନୂଆ କାର୍ଡ ହାତେଇଛନ୍ତି। ଏହି ମିଶ୍ରଣ ବେଳେ କାର୍ଡରେ ଜଣେ ବ୍ୟକ୍ତିଙ୍କ ନାମ ଏକାଧିକ ସ୍ଥାନରେ ରହୁଛି। ଫଳରେ ହିତାଧିକାରୀ ଯୋଜନାରୁ ବାଦ୍ ପଡୁଛନ୍ତି। ଏ ନେଇ ବ୍ଲକ ଯୋଗାଣ ଅଧିକାରୀ ଟୁନାରାଣୀ ସାହୁ କହିଛନ୍ତି, ଉଭୟ ଜାତୀୟ ଓ ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ହିତାଧିକାରୀଙ୍କ ନାମ ଥିବାରୁ ସେମାନଙ୍କ କାର୍ଡ ସ୍ବତଃ କଟିଯାଇଛି ଓ ରାଶନ ମଧ୍ୟ ବନ୍ଦ ହୋଇଯାଉଛି। ଏଥିରେ ସେମାନଙ୍କ କୌଣସି ଭୂମିକା ନାହିଁ। ପୋର୍ଟାଲ୍ ଖୋଲିଲେ କାର୍ଡରେ ଥିବା ତ୍ରୁଟି ସଂଶୋଧନ କରାଯିବା। ଏହାପରେ ସେମାନେ ପୂର୍ବପରି ରାଶନ ସାମଗ୍ରୀ ପାଇପାରିବେ ବୋଲି ସାହୁ ମତ ରଖିଛନ୍ତି।
