ପୁରୀ ଅଫିସ, ୨୩ା୬: ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ପାଇଁ ଅସ୍ଥାୟୀ ରଥଖଳାରେ ରଥ ନିର୍ମାଣ କାର୍ଯ୍ୟ ଜୋରସୋର୍ରେ ଆଗେଇ ଚାଲିଛି। ତିନିରଥର ଖପୁରି ସମେତ ପାରାଭାଡ଼ିକୁ ମିଶାଇ ତେର ପରସ୍ତ ପୋଟଳ ସେଟିଂ ଶେଷ ହୋଇଥିବା ବେଳେ ବୁଧବାର ତିନିରଥର ପୋଟଳ ତଳକୁ ୪ଟି ଲେଖାଏ ଋଷିପଟା ସେଟିଂ ହୋଇଛି। ତିନିରଥର ବେଦି ପଛ ଭାଗରେ ପଟାବାଡ଼ିଆ ପରେ ସମ୍ମୁଖ ଭାଗରେ ପଟାବାଡ଼ିଆ ସରିବା ସହ ରଥ ଦକ୍ଷିଣ ପାଶର୍ବ ଏବଂ ବାମ ପାଶର୍ବରେ ପଟା ପଡ଼ିବା ଶେଷ ପର୍ଯ୍ୟାୟରେ ପହଞ୍ଚତ୍ଛି। ତିନିରଥର ୪ଟି ଲେଖାଏ ୧୨ଟି ଦୁଆରବେଢ଼ା ନିର୍ମାଣ ସରିବା ପରେ ସେଗୁଡ଼ିକରେ ପ୍ରାଇମର ଦିଆଯାଇ ଚିତ୍ରକାରଙ୍କ ଦ୍ୱାରା ଚିତ୍ର ଅଙ୍କନ ଚାଲିଛି। ତିନିରଥର ପ୍ରଭା ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚତ୍ଛି। ପ୍ରଭାଫ୍ରେମରେ ପଟାବାଡ଼ିଆ ପରେ ବାଙ୍କ ପଡ଼ି ରୂପ ଖୋଦେଇ ପଟା ସେଟିଙ୍ଗ ହୋଇଛି। ରୂପକାର ସେବକମାନେ ତିନିରଥର ଶେଷ ୩ଟି ନାଟଗୋଡ଼ର ରୂପ ଖୋଦେଇରେ ଶେଷ ସ୍ପର୍ଶ ଦେଉଛନ୍ତି। ଚିତ୍ରକର ସେବକମାନେ ଦୁଆର ବେଢ଼ାରେ ଚିତ୍ର କରିବା ସହ ରଥ ପାଶର୍ବ ଦେବଦେବୀ, ନାଟଗୋଡ଼, ଓଲଟ ଶୁଆ, ସଖୀ ଆଦିରେ ରଙ୍ଗ ଦେଉଛନ୍ତି। ଗୁଜ ଓ ପଟାଗୁଜଗୁଡ଼ିକରେ ଖୋଦେଇ, ରୂପରେ ଚିତ୍ର ଅଙ୍କନ କରୁଛନ୍ତି। ଶ୍ରୀମନ୍ଦିର କାର୍ଯ୍ୟାଳୟର ଉପର ପ୍ରକୋଷ୍ଠରେ ୧୭ଜଣ ଦରଜି ସେବକ ବୁଧବାର ସୁଦ୍ଧା ତିନିରଥର କନା କଟିଂ ସାରି ଦୁଆର ବେଢ଼ା ପାଇଁ କନା କଟିଂ ସହ ସିଲଭର ଲେସ ଫିଟିଂ ଓ ଚନ୍ଦ୍ରଶାଳୀରେ ଫୁଲ ପକା କାମ ଶେଷ କରିଛନ୍ତି। ଦୋଳବେଦିସ୍ଥିତ ଅସ୍ଥାୟୀ କମାରଶାଳରେ ଓଝା ସେବକମାନେ ପ୍ରତି ଦୁଆରବେଢ଼ା ପାଇଁ ୧୧ଟି ଲେଖାଏ ମୋଟ ୧୩୨ଟି କଣ୍ଟା ନିର୍ମାଣ ସାରି ଜଗତ ପୃଷ୍ଠ ଶେଣୀ କଣ୍ଟା, ସିଂହାସନ କଣ୍ଟା ଏବଂ ସିଂହାସନ ଗୁଣ୍ଠି କଣ୍ଟା ନିର୍ମାଣ ଜାରି ରଖିଛନ୍ତି।
