ମୁମ୍ବାଇ: ବଲିଉଡ ଅଭିନେତା ରଣବୀର ସିଂଙ୍କ ପରିଚୟର ଆବଶ୍ୟକତା ନାହିଁ । ସୋସିଆଲ ମିଡିଆରେ ବି ତାଙ୍କର ଫ୍ୟାନ ଫଲୋଇଙ୍ଗସ ଜବରଦସ୍ତ । ଏହି କଳାକାର ନିଜ ଅଭିନୟ ବଳରେ ବଲିଉଡ ଇଣ୍ଡଷ୍ଟ୍ରିରେ ତିଆରି କରିଛନ୍ତି ନିଜର ଏକ ସ୍ୱତନ୍ତ୍ର ପରିଚୟ । ତାଙ୍କ ସଫଳତାର କାହାଣୀ ବି ଅନେକଙ୍କୁ ବେଶ ଜଣା । ଏବେ ଏହି ସଫଳତାର ତାଲିକାରେ ଆଉ ଏକ ଫର୍ଦ୍ଦ ଯୋଡି ହୋଇଛି । ରଣବୀରଙ୍କୁ ଚଳିତ ବର୍ଷ ‘ମହାରାଷ୍ଟ୍ରିଆନ୍ ଅଫ ଦ ଇୟର’ ଆୱାର୍ଡରେ ସମ୍ମାନୀତ କରାଯାଇଛି । ଏହାର ଏକ ଫଟୋ ରଣବୀର ସୋସିଆଲ ମିଡିଆରେ ଶେୟାର କରିଛନ୍ତି ।
ଫଟୋରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ରଣବୀରଙ୍କୁ ଆୱାର୍ଡ ଦେଉଥିବା ଦେଖାଯାଇଛି । ଏହାସହ ଫଟୋରେ ମହାରାଷ୍ଟ୍ର ଉପମୁଖମନ୍ତ୍ରୀ ଦେବେନ୍ଦ୍ର ଫଡନଭିଶ ଓ ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ବି ନଜର ଆସିଛନ୍ତି । ଏହି ଫଟୋ ଶେୟାର କରି ରଣବୀର ସମସ୍ତଙ୍କୁ ଧନ୍ୟବାଦ ଦେଇଛନ୍ତି । ଏହି ଫଟୋର କ୍ୟାପଶନରେ ରଣବୀର ଲେଖିଛନ୍ତି, ‘ମହାରାଷ୍ଟ୍ରିଆନ ଅଫ ଦ ଇୟର’ । ମହାରାଷ୍ଟ୍ର ମୋର ଘର, ମୋର ଗୌରବ । ଭାରତର ବଡ ବଡ ନେତା, ଶ୍ରୀ ଏକନାଥ ଶିନ୍ଦେ ଜୀ, ଶ୍ରୀ ଦେବେନ୍ଦ୍ର ଫହନଭିଶ ଜୀ, ଶ୍ରୀ ପ୍ରମୋଦ ସାୱନ୍ତ ଜୀଙ୍କଠାରୁ ସମ୍ମାନୀତ ହୋଇ ମୁଁ ବହୁତ ଖୁସି, ଆୱାର୍ଡ ପାଇଁ ଧନ୍ୟବାଦ ।
କେବଳ ସେତିକି ନୁହେଁ, ବଲିଉଡ ଅଭିନେତ୍ରୀ କିଆରା ଆଡଭାନୀଙ୍କୁ ବି ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ସମ୍ମାନୀତ କରୁଥିବା ଦେଖାଯାଇଛି । ସେ ବି ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ଏକ ଫଟୋ ଶେୟାର କରି ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି । କିଆରାଙ୍କୁ ବି ‘ମହାରାଷ୍ଟ୍ରୀଆନ ଅଫ ଦ ଇୟର’ ଆୱାର୍ଡ ଦିଆଯାଇଛି ।
