ଦଶରଥପୁର,୧୧ା୭(ଡି.ଏନ.ଏ.): ଜଣେ ବ୍ୟକ୍ତିଙ୍କ ଘରେ ଥିବା ବେଙ୍ଗ ଖାଇବାକୁ ଯାଇ ଦୁଇ ସାପଙ୍କ ମଧ୍ୟରେ ଲଢ଼େଇ ହୋଇଥିଲା। ଏଥିରେ ବେଙ୍ଗର ମୃତ୍ୟୁ ହୋଇଥିବା ବେଳେ ରଣା ସାପ ବୋଡ଼ା ଗିଳିଦେଇଛି। ଏପରି ଏକ ଘଟଣା ଦେଖିବାକୁ ମିଳିଛି ଯାଜପୁର ଜିଲା ମଙ୍ଗଳପୁର ଥାନା ଅଧୀନ ଚାଉଳିଆ ଗ୍ରାମରେ। ଶନିବାର ପୂର୍ବାହ୍ନ ୧୧ଟା ସମୟରେ ଗ୍ରାମର କୈଳାସ ପଣ୍ଡାଙ୍କ ବାସଗୃହରେ ପାଖାପାଖି ୭ଫୁଟ୍ ଲମ୍ବର ରଣା ସାପ ଓ ବୋଡ଼ା ସାପ ଏକ ବେଙ୍ଗ ଖାଇବାକୁ ଲଢ଼େଇ ଲାଗିଥିଲୋ। ଉଭୟ ସାପ ଦୁଇଟି ବେଙ୍ଗକୁ ଉଭୟ ପାର୍ଶ୍ୱରୁ ଖାଇବାକୁ ଉଦ୍ୟମ କରିଥିବା ପରିବାର ଲୋକେ ଦେଖି ଭୟଭିତ ହୋଇପଡ଼ିଥିଲେ। ଖବର ଜଣାପଡ଼ିବା ପରେ ସାପ ଦେଖିବାକୁ ସେଠାରେ ସ୍ଥାନୀୟ ଲୋକଙ୍କ ସମାଗମ ବଢ଼ିଥିଲା। ଖବର ପାଇ ସ୍ନେକ୍ ହେଲ୍ପଲାଇନ୍ ସଦସ୍ୟ ଚିତ୍ତରଞ୍ଜନ ପଣ୍ଡା ପହଞ୍ଚତ୍ଥିଲେ। ମାତ୍ର ସେତେବେଳକୁ ବେଙ୍ଗର ମୃତ୍ୟୁ ହୋଇସାରିଥିବା ବେଳେ ରଣା ସାପଟି ବୋଡ଼ା ସାପକୁ ଅର୍ଦ୍ଧାଧିକ ଗିଳି ସାରିଥିଲା। ଚିତ୍ତରଞ୍ଜନ ଚତୁରତାର ସହିତ ରଣାକୁ କରାୟତ କରିଥିଲେ। ପରେ ରଣା ସାପଟି ଗିଳିଥିବା ବୋଡ଼ାକୁ ବାହାର କରିଥିଲା। କିନ୍ତୁ ବୋଡ଼ା ସାପଟି ମରିଯାଇଥିବା ଦେଖିବାକୁ ମିଳିଛି। ତେବେ ରଣା ସାପଟିକୁ ତା’ର ପ୍ରାକୃତିକ ଆବାସସ୍ଥଳୀରେ ଛଡ଼ାଯାଇଥିବା ଜଣାପଡ଼ିଛି।
