ନୂଆଦିଲ୍ଲୀ,୨୫।୯: ଭାଜପା ଏମ୍ପି ରମେଶ ବିଧୁରୀ ଲୋକ ସଭାରେ ଦେଇଥିବା ବୟାନ ପରେ ରାଜନୀତି ତୀବ୍ର ହୋଇଛି। ବୟାନକୁ ନେଇ ଭାଜପା ଅଧ୍ୟକ୍ଷ ଜେପି ନଡ୍ଡା ରମେଶ ବିଧୁରୀଙ୍କୁ କାରଣ ଦର୍ଶାଅ ନୋଟିସ ଜାରି କରିଥିଲେ। ଯାହା ପରେ ରମେଶ ବିଧୁରୀ ସୋମବାର ଜେପି ନଡ୍ଡାଙ୍କୁ ଭେଟିବାକୁ ଭାଜପା ମୁଖ୍ୟାଳୟରେ ପହଞ୍ଚିଛନ୍ତି। ନୋଟିସରେ ପଚରାଯାଇଥିଲା ଯେ, ଅସଂସଦୀୟ ଭାଷା ବ୍ୟବହାର କରିବା ଉପରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ନୁହେଁ କାହିଁକି?
ଏହାପୂର୍ବରୁ ବିଏସପି ଏମ୍ପି ଦାନିଶ ଅଲି ଲୋକ ସଭା ବାଚସ୍ପତି ଓମ ର୍ବିଲାଙ୍କୁ ରମେଶ ବିଧୁରୀଙ୍କ ବିରୋଧରେ ଏକ ଚିଠି ଲେଖି କାର୍ଯ୍ୟାନୁଷ୍ଠାନ ଦାବି କରିଥିଲେ। ସେ ଚିଠିରେ ଲେଖିଛନ୍ତି, ବିଧୁରୀଙ୍କ ବିରୋଧରେ ନିୟମ ୨୨୨, ୨୨୬ ଏବଂ ୨୨୭ ଅନୁଯାୟୀ ନୋଟିସ ଦେବାକୁ ଚାହୁଁଛନ୍ତି। ସଂସଦରେ ଚନ୍ଦ୍ରୟାନ-୩ର ସଫଳତା ଉପରେ ଆଲୋଚନାରେ ସାମିଲ ହୋଇଥିବା ଦାନିଶ ଅଲିଙ୍କ ବିରୋଧରେ ଆପତ୍ତିଜନକ ଶବ୍ଦ ବ୍ୟବହାର କରାଯିବା ପରେ ଏହି ମାମଲା ଆରମ୍ଭ ହୋଇଥିଲା।
ରମେଶ ବିଧୁରୀଙ୍କ ବୟାନ ବିରୋଧରେ ବିରୋଧୀଙ୍କ ମଧ୍ୟରେ ଅସନ୍ତୋଷ ରହିଛି ଏବଂ ସେମାନେ ବିଧୁରୀଙ୍କୁ ନିଲମ୍ବନ କରିବାକୁ ଦାବି କରୁଛନ୍ତି। ଏସପିର ରାଷ୍ଟ୍ରୀୟ ସଚିବ ଓମ ର୍ବିଲାଙ୍କୁ ରମେଶ ବିଧୁରୀଙ୍କ ବରଖାସ୍ତ ଦାବି କରିଛନ୍ତି। କେବଳ ଏତିକି ନୁହେଁ ତେଲଙ୍ଗାନାର ବିଆରଏସ ବିଧାନ ପରିଷଦ ସଦସ୍ୟ କେ. କବିତା ମଧ୍ୟ ଓମ ର୍ବିଲାଙ୍କୁ ଏହି ପ୍ରସଙ୍ଗରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରିଛନ୍ତି। ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ମଧ୍ୟ ରମେଶ ବିଧୁରୀଙ୍କ ଅପମାନଜନକ ମନ୍ତବ୍ୟକୁ ନିନ୍ଦା କରିଛନ୍ତି।
ସୂଚନାଯୋଗ୍ୟ, ସଂସଦ ସ୍ବତନ୍ତ୍ର ଅଧିବେଶନରେ ଭାଜପାର ଲୋକ ସଭା ସଦସ୍ୟ ରମେଶ ବିଧୁରୀ ବହୁଜନ ସମାଜ ପାର୍ଟି (ବିଏସ୍ପି) ଏମ୍ପି କୁଅଁର ଦାନିସ ଅଲୀଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇ ବିବାଦୀୟ ହୋଇଛନ୍ତି। ନିମ୍ନ ସଦନରେ ଚନ୍ଦ୍ରୟାନ-୩ ମିଶନର ସଫଳତା ଉପରେ ଆଲୋଚନା ଚାଲିଥିବାବେଳେ ଦକ୍ଷିଣ ଦିଲ୍ଲୀ ସଂସଦୀୟ ଆସନର ସଦସ୍ୟ ବିଧୁରୀ ଉତ୍ତର ପ୍ରଦେଶ ଦାନିସ ଅଲୀଙ୍କୁ ‘ମୁସଲମାନ ଆତଙ୍କବାଦୀ’ ଆଖ୍ୟା ଦେଇଥିଲେ। ଏହାର ଭିଡିଓ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହେବା ପରେ ବିବାଦୀୟ ସ୍ଥିତି ଉପୁଜିଛି।
