ଅସ୍ତରଙ୍ଗ,୨୬ା୫(ପ୍ରଦୀପ୍ତ କୁମାର ଦୀକ୍ଷିତ): ପବିତ୍ର ସାବିତ୍ରୀ ବ୍ରତରେ ସବୁ ସ୍ତ୍ରୀମାନେ ତାଙ୍କ ସ୍ବାମୀଙ୍କ ଦୀର୍ଘାୟୁ କାମନାକରି ଏହି ଓଷା କରୁଛନ୍ତି। ହେଲେ ଏମିତି ଜଣେ ସ୍ତ୍ରୀ ଅଛନ୍ତି, ଯିଏ ସ୍ବାମୀଙ୍କ ପାଇଁ ଦୀର୍ଘଦିନ ହେଲା ତପସ୍ୟା କରୁଛନ୍ତି କହିଲେ ଚଳେ। ଅଚାନକ ଗାଡ଼ି ଦୁର୍ଘଟଣା ହେତୁ ବିଛଣାରେ କଟୁଛି ତାଙ୍କ ସ୍ବାମୀଙ୍କ ଜୀବନ। ସେ ହାରିଯାଇନାହାନ୍ତି, ଭଗବାନ୍ଙ୍କ ଉପରେ ଭରସା ରଖି କାର୍ଯ୍ୟ କରୁଛନ୍ତି। ଆଶା ରଖିଛନ୍ତି ସ୍ବାମୀ ଭଲ ହୋଇଯିବେ। ସ୍ବାମୀଙ୍କୁ ଭଲ କରିବାକୁ ଆପ୍ରାଣ ଉଦ୍ୟମ ଜାରି ରଖିଛନ୍ତି। ଆଉ ଆଜି ସାବିତ୍ରୀରେ ସବୁ ମହିଳାଙ୍କ ପାଇଁ ପ୍ରେରଣା ସାଜିଛନ୍ତି। ସେମାନେ ହେଲେ ପୁରୀ ଜିଲା ଅସ୍ତରଙ୍ଗ ବ୍ଲକ ବିଜିପୁର ଗ୍ରାମର ଦିବ୍ୟାଙ୍ଗ ସ୍ବାମୀ ପ୍ରମୋଦ ସାହୁ ଓ ସ୍ତ୍ରୀ ରମା ସାହୁ।
ହସଖୁସିରେ ଚଳୁଥିଲେ। କିନ୍ତୁ ଦଇବ ଦାଉ ସାଧିଲା ଭଳି ନିତିଦିନ ପରିି ନିଜ ରୋଜଗାର ପନ୍ଥା ବାନ୍ଧିଥିବା ପ୍ରମୋଦ ଚାଉଳ ସଂଗ୍ରହକରି ଯାଉଥିବା ବେଳେ ଗାଡ଼ିରୁ ପଡ଼ି ଯାଇଥିଲେ, ଫଳରେ କ୍ରମଶଃ ଦିବ୍ୟାଙ୍ଗ ହୋଇଗଲେ। ବର୍ତ୍ତମାନ ପାରାଲିସିସ୍ରେ ଆକ୍ରାନ୍ତ ହୋଇ ସ୍ବାମୀ ପ୍ରମୋଦ ଦୀର୍ଘଦିନ ହେବ ବିଛଣାରେ ପଡ଼ିରହିଛନ୍ତି। ଖାଇବାଠାରୁ ଶୋଇବା ପର୍ଯ୍ୟନ୍ତ ସମସ୍ତ ନିତ୍ୟକର୍ମ ସ୍ତ୍ରୀ କରିଥାନ୍ତି। ହେଲେ ଦୁର୍ଘଟଣାରେ ଦିବ୍ୟାଙ୍ଗ ହେବା ପରେ ଘର ଚଳିବା କଷ୍ଟକର। ବନ୍ଧୁ ପରିଜନଙ୍କ ସ୍ବଳ୍ପ ସହାୟତାରେ ପରିବାର କଷ୍ଟରେ ଚଳୁଛି। ମନରେ ଯେତେ ଦୁଃଖ ଥିଲେ ବି ସେ କାହାକୁ କୁହନ୍ତି ନାହିଁ। ନିଜର କର୍ତ୍ତବ୍ୟ କରିଚାଲିଛନ୍ତି। ରମାଙ୍କର ସ୍ବାମୀଙ୍କ ପ୍ରତି ଥିବା ନିଷ୍ଠା ଓ ଭଲପାଇବା ଦେଖି ସମସ୍ତେ ପ୍ରଶଂସା କରୁଥିବା ବେଳେ କେହି କେହି କହୁଛନ୍ତି, ସେ ଯେତିକି ତାଙ୍କ ସ୍ବାମୀଙ୍କ ପାଇଁ କରୁଛନ୍ତି ଆମେ କରିପାରିବୁ ନାହିଁ। ତାଙ୍କ ସ୍ବାମୀ ଶୀଘ୍ର ସୁସ୍ଥ ହୋଇଯାଆନ୍ତୁ, ପୁଣି ତାଙ୍କ ହସଖୁସିର ସଂସାର ଫେରିଆସୁ ବୋଲି ଜଣେ ମହିଳା କହିଛନ୍ତି।
