ନୂଆଦିଲ୍ଲୀ/ପାଟନା,୪ ।୧୦: ଗତ କିଛିଦିନ ହେବ ଅସୁସ୍ଥ ଥିବା କେନ୍ଦ୍ରମନ୍ତ୍ରୀ ରାମ ବିଳାସ ପାୱାନଙ୍କର ଶନିବାର ବିଳମ୍ବିତ ରାତ୍ରିରେ ହାର୍ଟ ସର୍ଜରୀ କରାଯାଇଛି । ରାମ ବିଳାସଙ୍କ ପୁଅ ତଥା ଏଲ୍ଜେପିର ରାଷ୍ଟ୍ରୀୟ ଅଧ୍ୟକ୍ଷ ଚିରାଗ ପାଶୱାନ ଟୁଇଟ୍ କରି ଏହି ସୂଚନା ଦେଇଛନ୍ତି । ସେ ଲେଖିଛନ୍ତି କିଛିଦିନ ହେବ ତାଙ୍କ ପିତାଙ୍କର ଦିଲ୍ଲୀସ୍ଥିତ ଏକ ହସ୍ପିଟାଲରେ ଚିକିତ୍ସା ଚାଲିଥିବା ବେଳେ ଶନିବାର ରାତିରେ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡି ଯିବାରୁ ହାର୍ଟ ସର୍ଜରୀ କରିବାକୁ ପଡିଲା । ଆବଶ୍ୟକ ପଡିଲେ ଏକ ସପ୍ତାହ ପରେ ଆଉ ଏକ ସର୍ଜରୀ କରିବାକୁ ପଡିବ ବୋଲି ଚିରାଗ ସୂଚନା ଦେଇଛନ୍ତି । ଏହି ସଙ୍କଟ ସମୟରେ ଆପଣମାନେ ମୋ ପରିବାରକୁ ସହଯୋଗ କରିଥିବାରୁ ଧନ୍ୟବାଦ ବୋଲି ଲେଖିଛନ୍ତି ଚିରାଗ । ବିହାର ନିର୍ବାଚନ ପାଖେଇ ଆସୁଥିବା ବେଳେ ରାମବିଳାସ ହଠାତ୍ ଅସୁସ୍ଥ ହୋଇ ପଡିବା ଦଳ ପାଇଁ ଚିନ୍ତାର କାରଣ ପାଲଟି ଯାଇଛି । ଶନିବାର ଏଲ୍ଜେପିର ସଂସଦୀୟ ବୋର୍ଡର ବୈଠକକୁ ବାତିଲ କରାଯାଇଛି । ସୂଚନାଯୋଗ୍ୟ, ଶନିବାର ଯେତେବେଳେ ବୈଠକ ଆୟୋଜନ ହେବାର ଥିଲା ଠିକ୍ ସେତିକି ବେଳେ ରାମ ବିଳାସଙ୍କ ଦେହ ଅଧିକ ଖରାପ ହେବାରୁ ବୈଠକ ଛାଡି ଚିରାଗ ହସ୍ପିଟାଲ ଚାଲି ଯାଇଥିଲେ ଫଳରେ ବୈଠକୁ ବାତିଲ କରିବାକୁ ପଡିଥିଲା ।
