ନୂଆଦିଲ୍ଲୀ,୨୨।୯: କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଲୋକ ସଭାରେ ଭାଜପା ଏମ୍ପି ରମେଶ ବିଧୁରୀଙ୍କ ଅଶ୍ଲୀଳ ଭାଷା ପାଇଁ କ୍ଷମା ପ୍ରାର୍ଥନା କରିଛନ୍ତି। ଚନ୍ଦ୍ରୟାନ-୩ ମିଶନ ଉପରେ ଆଲୋଚନା ବେଳେ ରମେଶ ବିଧୁରୀ ବିଏସପି ଏମ୍ପି କୁନୱାର ଡାନିଶ ଅଲିଙ୍କ ବିରୋଧରେ ଅଶ୍ଲୀଳ ଭାଷା ବ୍ୟବହାର କରିଥିଲେ। ବିରୋଧୀଦଳ ଏନେଇ ହଙ୍ଗାମା କରିଛନ୍ତି। ରମେଶ ବିଧୁରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ କଂଗ୍ରେସ ଦାବି କରିଛି। ଲୋକସଭା ବାଚସ୍ପତି ଓମ ବିର୍ଲା ମଧ୍ୟ ରମେଶ ବିଧୁରୀଙ୍କୁ ଚେତାବନୀ ଦେଇଛନ୍ତି ଏବଂ ତାଙ୍କୁ ଗୃହରେ ସମ୍ମାନଜନକ ଭାଷା ବ୍ୟବହାର କରିବାକୁ କହିଛନ୍ତି।
ସଂସଦରେ ଚାଲିଥିବା ପ୍ରକ୍ରିୟା ସମୟରେ ଭାଜପା ଏମ୍ପି ରମେଶ ବିଧୁରୀ ଚନ୍ଦ୍ରୟାନ- ୩ ମିଶନ ଏବଂ ଇସ୍ରୋର ସଫଳତା ବିଷୟରେ କହିଥିଲେ। ଏହି ସମୟରେ ସେ ପ୍ରଧାନମନ୍ତ୍ରୀ ମୋଦି ସରକାରଙ୍କୁ ପ୍ରଶଂସା କରିଥିଲେ। ଏହି ସମୟରେ କୁନୱାର ଡାନିଶ ଅଲି ଠିଆ କିଛି ପ୍ରଶ୍ନ ଉଠାଇଥିଲେ। ରମେଶ ଅଶ୍ଳୀଳ ଭାଷା ବ୍ୟବହାର କରି ଏଥିରେ ଅସନ୍ତୋଷ ବ୍ୟକ୍ତ କରିଥିଲେ।
ଭାଜପା ଏମ୍ପିଙ୍କ ବିବୃତ୍ତିରେ କଂଗ୍ରେସ ନେତା ଜୟରାମ ରମେଶ ଦାବି କରିଛନ୍ତି ଯେ, ରମେଶ ବିଧୁରୀଙ୍କୁ ଗୃହରୁ ନିଲମ୍ବନ କରାଯାଉ। ନ୍ୟାଶନାଲ କନଫରେନ୍ସ ନେତା ଓମାର ଅବଦୁଲ୍ଲା କହିଛନ୍ତି, ଯଦି ସେ ଆତଙ୍କବାଦୀ ବୋଲି କହିଛନ୍ତି, ତେବେ ଆମେ ଏଥିରେ ଅଭ୍ୟସ୍ତ। ଭାଜପା ସହ ଜଡିତ ମୁସଲମାନମାନେ ଏହାକୁ କିପରି ସହ୍ୟ କରିପାରୁଛନ୍ତି ମୁଁ ବୁଝିପାରୁନାହିଁ।
