ପାଟଣା, ୧୮।୭ (ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ୍ ରାଜନଗର ସ୍ଥିତ ଶ୍ରୀ ଦଧିବାମନ ଜୀଉଙ୍କ ଘୋଷଯାତ୍ରାରେ ଘଟିଥିବା ରଥ ଅଘଟଣର ସଫଳ ସମାଧାନ ହୋଇଛି। ଗୁରୁବାର ପରମ୍ପରା ଅନୁଯାୟୀ ରଥଯାତ୍ରା ଆରମ୍ଭ ହୋଇଥିବା ବେଳେ ମାତ୍ର ୩୦ ମିଟର ଗଡ଼ିବା ପରେ ରଥର ପଛ ପଟ ଦୁଇଟି ଅଖ ଭାଙ୍ଗି ଯାଇଥିଲା। ଏହି ଖବର ପାଇବା ପରେ ପ୍ରଶାସନ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ରଥ ମରାମତି କାର୍ଯ୍ୟ ହାତକୁ ନିଆଯାଇଥିଲା। ପାଟଣା ତହସିଲଦାର ଆଶ୍ୱିନ କୁମାର ନାଏକ ଗୁରୁବାର ରାତିରେ ହିଁ ନୂତନ ଅଖ ପାଇଁ କାଠ ଯୋଗାଡ଼ କରିଥିଲେ।
ଏହାପରେ ଶୁକ୍ରବାର କେନ୍ଦୁଝରରୁ ଡେପୁଟି କଲେକ୍ଟର ପ୍ରକାଶ ସେଠୀ, ଜଣେ ସୁପରଭାଇଜର ଓ ଦୁଇଜଣ ମହାରଣା (ରଥ କାରିଗର) ଘଟଣାସ୍ଥଳରେ ପହଞ୍ଚି ରଥର ମରାମତି କାର୍ଯ୍ୟ ସମ୍ପନ୍ନ କରିଥିଲେ। ଶନିବାର ରଥ ପ୍ରସ୍ତୁତ ହେବା ପରେ ପ୍ରବଳ ବର୍ଷା ସତ୍ତ୍ୱେ ସୀମିତ ସଂଖ୍ୟକ ଭକ୍ତ ବର୍ଷାରେ ଭିଜି ଭିଜି ଶ୍ରଦ୍ଧାର ସହ ରଥକୁ ଟାଣି ନେଇଥିଲେ। ଶେଷରେ ମହାପ୍ରଭୁଙ୍କ ରଥ ମାଉସୀମା ମନ୍ଦିରରେ ପହଞ୍ଚିଛି।
ରାଜନଗରରେ ପରିଛା ଦୁର୍ଯ୍ୟୋଧନ ମିଶ୍ରଙ୍କ ଉପସ୍ଥିତିରେ ବ୍ରହ୍ମା ପ୍ରଦୀପ କୁମାର ମିଶ୍ରଙ୍କ ଦ୍ୱାରା ମହାପ୍ରଭୁଙ୍କ ନୀତିକାନ୍ତି ଓ ପୂଜାର୍ଚ୍ଚନା କରାଯାଇଥିଲା। କୋଠ ତହସିଲଦାର ତଥା କଣ୍ଟିଆପଡ଼ା ଆର.ଆଇ. ଶିବ ପ୍ରସାଦ ମହାନ୍ତଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ରଥଟଣା କାର୍ଯ୍ୟ ସୁରୁଖୁରୁରେ ସମ୍ପନ୍ନ ହୋଇଛି। ଶିକ୍ଷାବିତ୍ ଅକ୍ଷୟ ନାରାୟଣ ମିଶ୍ର ରଥଯାତ୍ରାର ସମଗ୍ର ଧାରାବିବରଣୀ ପ୍ରଦାନ କରିଥିଲେ।
