ନୂଆଦିଲ୍ଲୀ,୬ ।୮: ଟୋକିଓ ଅଲିମ୍ପିକ୍ସରେ ପୁରୁଷ ହକି ଦଳ ପଦକ ଜିତିବା ପରେ ଦେଶରେ ଏକ ପ୍ରକାର ଉଲ୍ଲାସର ବାତାବରଣ ସୃଷ୍ଟି ହୋଇଛି । ଏହାରି ଭିତରେ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ରାଜୀବ ଗାନ୍ଧୀ ଖେଳରତ୍ନ ପୁରସ୍କାର’ର ନାମ ପରିବର୍ତ୍ତନ କରି ‘ମେଜର ଧ୍ୟାନଚାନ୍ଦ ଖେଳରତ୍ନ ପୁରସ୍କାର’ କରି ଦେଇଛନ୍ତି । ଏବେ ଏହାକୁ ନେଇ ଆରମ୍ଭ ହୋଇଛି ରାଜନୀତି । କଂଗ୍ରେସ ପ୍ରବକ୍ତା ରଣଦୀପ ସୁରଜେୱାଲା କହିଛନ୍ତି, ଖେଳ ରତ୍ନ ପୁରସ୍କାରର ନାମ ପରିବର୍ତ୍ତନକୁ ଆମେ ସ୍ୱାଗତ କରୁଛୁ । ଏହା ଯେମିତି ସମ୍ଭବ ହେଲା ସେହିପରି ନରେନ୍ଦ୍ର ମୋଦି ଓ ଅରୁଣ ଜେଟଲି ଷ୍ଟାଡିୟମର ନାମ ପରିବର୍ତ୍ତନ କରାଯାଉ । ଏହା କୌଣସି ଖେଳାଳିଙ୍କ ନାମରେ ନାମିତ କରାଯାଉ । ଯଦି ଏମିତି କାମ ଆରମ୍ଭ କରାଯାଇଛି ତେବେ ଭଲଭାବେ କରାଯାଉ ବୋଲି ସେ କହିଛନ୍ତି । ସୁରଜେୱାଲା କହିଛନ୍ତି, ରାଜୀବ ଗାନ୍ଧୀ ଏହି ଦେଶର ନାୟକ ଥିଲେ । ସେ କୌଣସି ପୁରସ୍କାର ସହ ନ ଥିଲେ । ତାଙ୍କ ନିଜସ୍ୱ ପରିଚୟ ହିଁ ତାଙ୍କ ପାଇଁ ବହୁତ ଥିଲା । ଆଧୁନିକ ଭାରତର ନିର୍ମାଣ ପାଇଁ ସେ ବେଶ୍ ଜଣାଶୁଣା । ହକିର ଯାଦୁଗର ମେଜର ଧ୍ୟାନଚାନ୍ଦଙ୍କ ପ୍ରତି ଏହା ଏକ ସମ୍ମାନ ହୋଇଥିବାରୁ ଆମେ ଏହାକୁ ସ୍ୱାଗତ କରୁଛୁ । କିନ୍ତୁ ଏହାଯଦି ମୋଦିଙ୍କ ହୀନ ରାଜନୀତି ମଧ୍ୟକୁ ଚାଲିଯାଇ ନ ଥାଆନ୍ତା ତେବେ ଆମେ ଷ୍ଟାଡିୟମର ନାମ ପରିବର୍ତ୍ତନ କଥା ଉଠାଇ ନ ଥାଆନ୍ତୁ । ଏବେ ସମୟ ଆସିଛି ମୋଦି ଓ ଜେଟଲିଙ୍କ ଷ୍ଟାଡିୟମର ନାମ ପରିବର୍ତ୍ତନ କରି ଖେଳାଳିଙ୍କ ନାମରେ ରଖାଯାଉ ।
