ଭୁବନେଶ୍ୱର,୧୦।୨(ଅନୁରାଧା ମହାରଣା): ବାଲେଶ୍ୱର ରେଳ ଷ୍ଟେଶନର ନବୀକରଣ କରାଯିବ। ଏଥିପାଇଁ ରେଳ ମନ୍ତ୍ରଣାଳୟ ପକ୍ଷରୁ ୧୯୭ କୋଟି ଟଙ୍କା ବ୍ୟୟ ମଞ୍ଜୁର କରାଯାଇଥିବାବେଳେ ଆସନ୍ତା ୫୦ବର୍ଷ ପାଇଁ ଏହି ଉନ୍ନତିକରଣ ହେବ। ବାଲେଶ୍ୱରର ପାରମ୍ପରିକ ସ୍ଥାପତ୍ୟ ଆଧାରରେ ଷ୍ଟେଶନର ଡିଜାଇନ ପ୍ରସ୍ତୁତ କରାଯାଇଛି। ସେହିପରି ଷ୍ଟେଶନର ସମ୍ମୁଖ ଭାଗରେ କୋଣାର୍କ ଚକ୍ର ଓ ଶିଖରକୁ ଶ୍ରୀ ମନ୍ଦିର ସଦୃଶ ନିର୍ମାଣ କରାଯିବ। ସଉରା ଜନଜାତିଙ୍କ ପରମ୍ପାରିକ ଚିତ୍ର ଷ୍ଟେଶନର ଅନ୍ୟତମ ଆକର୍ଷଣ ରହିବ। ଦୈନିକ ୫୦ହଜାର ଯାତ୍ରୀଙ୍କ ଯାତାୟାତକୁ ଦୃଷ୍ଟିରେ ରଖି ପ୍ରସ୍ତୁତ କରାଯାଉଥିବା ଏହି ଷ୍ଟେଶନରେ ଅତ୍ୟାଧୁନିକ ସେବା ମିଳିବ। ସହରର ଉଭୟ ପାର୍ଶ୍ୱରେ ଥିବା ଷ୍ଟେଶନ ବିଲ୍ଢିଂଗୁଡ଼ିକ ୧୮ ମିଟର ଚଉଡା ରୁଫ୍ ପ୍ଲାଜା ଦ୍ୱାରା ସଂଯୁକ୍ତ ରହିବ। ସର୍କୁଲାର କ୍ଷେତ୍ରରେ ଉନ୍ନତି ସହ କଭର୍ ଶେଡ୍ ବ୍ୟବସ୍ଥା କରାଯିବ। ଅପେକ୍ଷାସ୍ଥଳର ମଧ୍ୟ ଉନ୍ନତିକରଣ କରାଯିବା ସହ ଏସି ଲାଉଞ୍ଜ ପ୍ରସ୍ତୁତ କରାଯିବ। ୨୦ଟି ପ୍ରବେଶ ଦ୍ୱାର ସହ ୧୪ଟି ଲିଫ୍ଟ ଏବଂ ୬ଟି ଏସ୍କାଲେଟର ରହିବ। ୩ଟି ‘ଫ୍ରି ଅନ୍ ବୋର୍ଡ’ ସମସ୍ତ ପ୍ଲାଟଫର୍ମକୁ ସଂଯୋଗ କରିବ। ସେହିପରି ୭ହଜାର ବର୍ଗମିଟରରୁ ଅଧିକ ସ୍ଥାନରେ ପାର୍କିଂ ବନ୍ଦୋବସ୍ତ କରାଯିବ। ୧୩୩ କିଲୋଓ୍ବାଟର ସୋଲାର ପ୍ୟାନେଲ ଏବଂ ୧୦୦୦ କେଏଲଡି ଜଳ ପୁନଃଚକ୍ରଣ ପ୍ଲାଣ୍ଟ ରହିବ। ଷ୍ଟେଶନରେ ଥିବା ଗୁଡସ୍ ଶେଡର ମଧ୍ୟ ମରାମତି ତଥା ଉନ୍ନତିକରଣ କରାଯିବ। ଆସନ୍ତା ୩୦ ମାସରେ ଏହି ପୁନରୁଦ୍ଧାରୁ କାର୍ଯ୍ୟ ଶେଷ କରିବାକୁ ଯୋଜନା ରଖାଯାଇଛି।
