ନୂଆଦିଲ୍ଲୀ,୨୩।୬:ଆରମ୍ଭ ହେବାକୁ ଯାଉଛି ୧୮ତମ ସଂସଦର ସ୍ବତନ୍ତ୍ର ଅଧିବେଶନ। ଆସନ୍ତାକାଲି ଠାରୁ ଏହି ଅଧିବେଶନ ଆରମ୍ଭ ହେବ। ଏଥିରେ ଲୋକ ସଭାର ବାଚସ୍ପତି ସମେତ ଏମପିମାନେ ଶପଥ ଗ୍ରହଣ କରିବେ। ଏସବୁ ଭିତରେ ଲୋକ ସଭାର ବିରୋଧୀ ଦଳ ନେତାକୁ ନେଇ ସସପେନ୍ସ ଲାଗି ରହିଥିବାବେଳେ ବିରୋଧୀ ଇଣ୍ଡିଆ ମେଣ୍ଟ ଓ କଂଗ୍ରେସ ରାହୁଲ ଗାନ୍ଧୀଙ୍କ ନାଁ ସୁପାରିଶ କରିଛି। ତେବେ ଏପର୍ଯ୍ୟନ୍ତ କୌଣସି ସ୍ପଷ୍ଟ ଚିତ୍ର ମିଳି ନ ଥିବାବେଳେ ଯଦି ରାହୁଲ ବିରୋଧୀ ଦଳ ନେତା ହୁଅନ୍ତି ତେବେ ସେ ପ୍ରଧାନମନ୍ତ୍ରୀ ମୋଦିଙ୍କ ସହ ଗୋଟିଏ ଟେବୁଲରେ ବସିବେ। ଏବଂ ଦେଶର ଗୁରୁତ୍ୱପୂର୍ଣ୍ଣ ପଦବୀ ନିଯୁକ୍ତିରେ ତାଙ୍କର ମଧ୍ୟ ଦାୟିତ୍ୱ ରହିବ। ମୋଦିଙ୍କ ସହ ସେ ମିଶି ବହୁ ନିଷ୍ପତ୍ତି ନେବେ।
ମୋଦି ଓ ରାହୁଲ ଗାନ୍ଧୀଙ୍କ ଭିତରେ ଦେଶର କୌଣସି ପ୍ରସଙ୍ଗ ନେଇ ଘମାଘୋଟ ଟାର୍ଗେଟ ରହିଥିବାବେଳେ ଏବେ ଦୁହେଁ ଲୋକ ସଭାରେ ବଡ଼ ବଡ଼ ପଦବୀରେ ନିଯୁକ୍ତି ହେବେ। ମୋଦି ଗୃହର ନେତା ଭାବେ ଦାୟିତ୍ୱ ନେଇ ସାରିଥିବାବେଳେ ରାହୁଲ ବିରୋଧୀ ଦଳ ନେତା ଭାବେ ଦାୟିତ୍ୱ ନେଇ ପାରନ୍ତି। ତେବେ ଦୁହିଁଙ୍କୁ ଏବେ ବହୁ ଗୁରୁତ୍ୱପୂର୍ଣ୍ଣ କାର୍ଯ୍ୟରେ ଏକାଠି ନିଷ୍ପତ୍ତି ନେବାକୁ ପଡିବ। ପାଓ୍ବାରଫୁଲ ପଦବୀର ନିଯୁକ୍ତିର ନିଷ୍ପତ୍ତି ମଧ୍ୟ ଦୁହେଁ ଏକାଠି ନେବେ। ବିରୋଧୀ ଦଳ ନେତା ବହୁତ ପାଓ୍ବାରଫୁଲ ହୋଇଥାଏ। ଏହି ପଦ କ୍ୟାବିନେଟ ମନ୍ତ୍ରୀଙ୍କ ସହ ସମାନ ଥାଏ। ଏଥିସହ ଗୃହର ନେତା ଅର୍ଥାତ ମୋଦିଙ୍କ ପରି ବିରୋଧୀ ଦଳ ନେତାଙ୍କୁ ସେତିକି ପ୍ରଭାବ ଥାଏ। ସଂସଦରେ ଅଲଗା ଅଲଗା କକ୍ଷର ବଣ୍ଟନ ମଧ୍ୟରେ ଲୋକ ସଭା ସଚିବାଳୟ ବିରୋଧୀ ଦଳ ନେତାଙ୍କ ରାୟ ନେଇଥା’ନ୍ତି। ବିରୋଧୀ ଦଳ ନେତା ସେହି କମିଟିର ଅଧ୍ୟକ୍ଷ ହୋଇଥା’ନ୍ତି ଯାହା ବଡ଼ ବଡ଼ ପଦର ନିଯୁକ୍ତି କରିଥାଏ। ଏହି ସମିତିରେ କ୍ୟାବିନେଟ ମନ୍ତ୍ରୀ, ବିରୋଧୀ ଦଳ ନେତା ଓ ପ୍ରଧାନମନ୍ତ୍ରୀ ସଦସ୍ୟ ରହିଥା’ନ୍ତି। ବିରୋଧୀଦଳର ନେତା ପବ୍ଲିକ ଆକାଉଣ୍ଟସ, ପବ୍ଲିକ ଅଣ୍ଡରଟେକିଂ ଇତ୍ୟାଦି ଅନେକ ଗୁରୁତ୍ୱପୂର୍ଣ୍ଣ କମିଟିର ସଦସ୍ୟ ରୁହନ୍ତି। ଅନେକ ମିଳିତ ସଂସଦୀୟ ପ୍ୟାନେଲରେ ରହିବା ବ୍ୟତୀତ ବିରୋଧୀ ଦଳର ନେତା ମଧ୍ୟ ଅନେକ ଚୟନ କମିଟିର ଏକ ଅଂଶ ଅଟନ୍ତି। ଏହି କମିଟି ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି), ନିର୍ବାଚନ କମିଶନର, ଜାତୀୟ ମାନବଧିକାର କମିଶନର, କେନ୍ଦ୍ରୀୟ ସୂଚନା ଆୟୋଗ, କେନ୍ଦ୍ରୀୟ ତଦନ୍ତ ବ୍ୟୁରୋ ଆଦି ପରି କେନ୍ଦ୍ରୀୟ ଏଜେନ୍ସିର ମୁଖ୍ୟମାନଙ୍କୁ ନିଯୁକ୍ତି କରିଥା’ନ୍ତି। ଯଦି ରାହୁଲ ଏହି ବିରୋଧୀ ଦଳ ନେତାର ମଙ୍ଗ ଧରନ୍ତି ତେବେ ଏହି କମିଟି କୌଣସି ନିଷ୍ପତ୍ତି ନେବା ପୂର୍ବରୁ ରାହୁଲଙ୍କ ଅନୁମତି ନେବ।
ଲୋକ ସଭାର ବିରୋଧୀ ଦଳର ନେତା କ୍ୟାବିନେଟ ମନ୍ତ୍ରୀଙ୍କ ପଦ ସହ ସମାନ। ଏହି ପୋଷ୍ଟଟି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ। ଏହି ପଦବୀରେ ଥିବା ବ୍ୟକ୍ତି ବେତନ, ଭତ୍ତା କେନ୍ଦ୍ର ମନ୍ତ୍ରୀଙ୍କ ଭଳି ସମାନ ସୁବିଧା ପାଇଥାନ୍ତି। ସୂଚନାନୁସାରେ, ବିରୋଧୀଦଳର ନେତାଙ୍କୁ ମାସକୁ ୩,୩୦,୦୦୦ ଟଙ୍କା ଦରମା ମିଳିଥାଏ। ଏହା ବ୍ୟତୀତ ଜଣେ କ୍ୟାବିନେଟ ମନ୍ତ୍ରୀ ଆବାସ ଏବଂ ଡ୍ରାଇଭର ସହିତ ଏକ କାର ପାଇଥାନ୍ତି। ଏହା ବ୍ୟତୀତ ବିରୋଧୀଦଳର ନେତା ପ୍ରାୟ ୧୪ଜଣ କର୍ମଚାରୀ ପାଇଥାନ୍ତି, ଯାହାର ଖର୍ଚ୍ଚ ସରକାର ବହନ କରନ୍ତି। ସଂସଦ ଗୃହ ବ୍ୟତୀତ ବିରୋଧୀ ଦଳର ନେତା ମଧ୍ୟ ପ୍ରଧାନମନ୍ତ୍ରୀଙ୍କ ସହ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ବିଚାରବିମର୍ଶ କରିଥା’ନ୍ତି।
