ନୂଆଦିଲ୍ଲୀ,୩।୧୧: ପୂର୍ବତନ ଅଧିନାୟକ ରାହୁଲ ଡ୍ରାଭିଡ୍ଙ୍କୁ ବୁଧବାର ଭାରତୀୟ ଦଳର ମୁଖ୍ୟ କୋଚ୍ ଭାବେ ନିଯୁକ୍ତ କରାଯାଇଛି। ଚଳିତ ଟି୨୦ ବିଶ୍ୱକପ୍ ଶେଷ ହେବା ପରେ ସେ ରବି ଶାସ୍ତ୍ରୀଙ୍କ ସ୍ଥାନ ନେବେ। ଆସନ୍ତା ୧୭ ତାରିଖରୁ ଭାରତରେ ଖେଳାଯିବାକୁ ଥିବା ନ୍ୟୁଜିଲାଣ୍ଡ ବିପକ୍ଷ ଟି୨୦ ସିରିଜ୍ରୁ ସିନିୟର ଦଳର କୋଚ୍ ଭାବେ ଡ୍ରାଭିଡ୍ କ୍ୟାରିୟର ଆରମ୍ଭ କରିବେ। ଏହି ସିରିଜ୍ରେ ୩ ଟି୨୦ ଓ ଦୁଇ ଟେଷ୍ଟ ଖେଳାଯିବ।
ପୂର୍ବତନ କ୍ରିକେଟର ଆର ପି ସିଂ ଓ ସୁଲକ୍ଷଣା ନାଏକଙ୍କୁ ନେଇ ଗଠିତ କ୍ରିକେଟ ଉପଦେଷ୍ଟା କମିଟି (ସିଏସି) ସର୍ବସମ୍ମତି କ୍ରମେ ପୂର୍ବତନ ଅଧିନାୟକଙ୍କୁ ମୁଖ୍ୟ କୋଚ୍ ଭାବେ ନିଯୁକ୍ତ କରିଛି। ତେବେ ବିସିସିଆଇ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତିରେ ଅନ୍ୟ ପ୍ରାର୍ଥୀଙ୍କ ନାମ ଉଲ୍ଲେଖ କରାଯାଇ ନାହିଁ।
“ଭାରତୀୟ ସିନିୟର ଦଳର ମୁଖ୍ୟ କୋଚ୍ ଭାବେ ଡ୍ରାଭିଡ୍ଙ୍କୁ ବିସିସିଆଇ ସ୍ବାଗତ କରୁଛି। ଜଣେ ଖେଳାଳି ଭାବେ କ୍ୟାରିୟରରେ ଅନେକ ସଫଳତା ହାସଲ କରିଥିବା ଡ୍ରାଭିଡଙ୍କୁ କିମ୍ବଦନ୍ତୀ ଭାବେ ଗଣନା କରାଯାଏ। ଏହାବାଦ୍ ସେ ସଫଳତାର ସହିତ ଜାତୀୟ କ୍ରିକେଟ୍ ଏକାଡେମୀ (ଏନ୍ସିଏ)ର ମୁଖ୍ୟ ଦାୟିତ୍ୱ ସମ୍ଭାଳିଛନ୍ତି” ବୋଲି ଡ୍ରାଭିଡ୍ଙ୍କ ପୂର୍ବତନ ସାଥି ଖେଳାଳି ତଥା ବିସିସିଆଇ ସଭାପତି ସୌରଭ ଗାଙ୍ଗୁଲି କହିଛନ୍ତି।
