ଚିକିତ୍ସା ବିଜ୍ଞାନରେ ରେଡିଓଲୋଜି ଏବେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ହାସଲ କରିଛି । ଏକ୍ସ-ରେ ଦ୍ୱାରା ରେଡିଓଲୋଜି ସହଜ ହୋଇପାରିଛି। ୧୮୯୫ ନଭେମ୍ବର ୮ରେ ୱିଲହେଲମ କନରାଡ ରୋଣ୍ଟଜେନ ଜର୍ମାନୀର ୟୁୟେର୍ଜବୁର୍ଗ ବିଶ୍ୱବିଦ୍ୟାଳୟରେ କ୍ୟାଥୋଡ ରଶ୍ମିର ଉଦ୍ଭାବନ କରିଥିଲେ। ଏହି ସମୟରେ ଏକ୍ସ-ରେ ସମ୍ପର୍କରେ ଜଣାପଡ଼ିଥିଲା। ଏକ୍ସ-ରେ ସହିତ ରେଡିଓଲୋଜିର ଡାକ୍ତରୀ ଚିକିତ୍ସାରେ ବ୍ୟବହାର ପାଇଁ ମୂଳଦୁଆ ପଡ଼ିଥିଲା। ଏହା ଯୋଗୁ ଚିକିତ୍ସା ବିଜ୍ଞାନରେ ଇମେଜିଂ ପ୍ରଣାଳୀର ବିଭିନ୍ନ ପଦ୍ଧତିକୁ ଅନ୍ତର୍ଭୁକ୍ତ କରିବା ଏବଂ ଆଧୁନିକ ଚିକିତ୍ସାର ଏକ ଗୁରୁତ୍ୱପୂର୍ଣ୍ଣ ଉପାଦାନ ଭାବରେ ପ୍ରତିଷ୍ଠିତ କରିବା କାର୍ଯ୍ୟ ସମ୍ଭବ ହୋଇପାରିଥିଲା।
ଚିକିତ୍ସା ବିଜ୍ଞାନ ସହିତ ଜଡ଼ିତ ଥିବା ଏକ୍ସ-ରେ ସମ୍ପର୍କରେ ସଚେତନତା ସୃଷ୍ଟି ପାଇଁ ପ୍ରତିବର୍ଷ ନଭେମ୍ବର ୮କୁ ଅନ୍ତର୍ଜାତୀୟ ରେଡିଓଲୋଜି ଦିବସ ପାଳନ କରାଯାଇଥାଏ।
ୟୁରୋପୀୟ ସୋସାଇଟି ଅଫ ରେଡିଓଲୋଜି (ଇଏସ୍ଆର୍), ରେଡିଓଲୋଜିକାଲ ସୋସାଇଟି ଅଫ ଉତ୍ତର ଆମେରିକା (ଆର୍ଏସ୍ଏନ୍ଏ) ଏବଂ ଆମେରିକୀୟ କଲେଜ ଅଫ ରେଡିଓଲୋଜି (ଏସିଆର୍) ର ମିଳିତ ସହଯୋଗରେ ୨୦୧୨ ନଭେମ୍ବର ୮ ଠାରୁ ଏହା ପାଳିତ ହୋଇ ଆସୁଛି।
ଅନ୍ତର୍ଜାତୀୟ ରେଡିଓଲୋଜି ଦିବସ ୟୁରୋପୀୟ ରେଡିଓଲୋଜି ଦ୍ୱାରା ୨୦୧୧ରେ ଆରମ୍ଭ କରାଯାଇଥିଲା। ପ୍ରଥମ ୟୁରୋପୀୟ ରେଡିଓଲୋଜି ଡେ ୨୦୧୧ ଫେବୃଆରୀ ୧୦ରେ ରୋଣ୍ଟଜେନଙ୍କ ମୃତ୍ୟୁ ବାର୍ଷିକୀ ପାଳନ ଅବସରରେ ଅନୁଷ୍ଠିତ ହୋଇଥିଲା। ତେବେ ଉତ୍ସବର ତାରିଖକୁ ରୋଣ୍ଟଜେନଙ୍କ ମୃତ୍ୟୁ ବାର୍ଷିକୀରୁ ଏକ୍ସ-ରେ ଆବିଷ୍କାର ତାରିଖକୁ ଘୁଞ୍ଚାଇବା ଲାଗି ପ୍ରସ୍ତାବ ଆଗତ ହୋଇଥିଲା। ୨୦୧୧ ନଭେମ୍ବର ୨୮ରେ ସିକାଗୋରେ ବାର୍ଷିକ ଆର୍ଏସ୍ଏନ୍ଏ ବୈଠକରେ ଏହାକୁ ସ୍ବୀକୃତି ମିଳିଥିଲା। ଫଳରେ ୨୦୧୨ ନଭେମ୍ବର ୮ରେ ଏହି ଦିବସ ପାଳିତ ହୋଇ ଆସୁଛି।
ଏହି ଅବସରରେ ପ୍ରଦର୍ଶନୀ, କର୍ମଶାଳା, ବକ୍ତୃତା, ଏବଂ ସୋସିଆଲ ମିଡିଆ ଅଭିଯାନ କରାଯାଇ ରେଡିଓଲୋଜିଷ୍ଟଙ୍କ ଦ୍ୱାରା ସାଧାରଣ ଜନତାଙ୍କୁ ରେଡିଓଲୋଜି ବିଷୟରେ ଅଧିକ ଜାଣିବା ପାଇଁ ପ୍ରୟାସ କରାଯାଇଥାଏ।
