ନୟାଗଡ଼ ଅଫିସ/ରଣପୁର,୧୨।୧୨ (ସ୍ବ.ପ୍ର.): ନୟାଗଡ଼ ଜିଲା ରଣପୁର ତହସିଲ ଝାରପଡ଼ା ଆରଆଇ ସର୍କଲର ଓସ୍ତପଡ଼ା ଅଞ୍ଚଳରେ ଲୋକଙ୍କ ବିରୋଧ ସତ୍ତ୍ୱେ ମାଙ୍କଡା ପଥର ଖଣିକୁ ନିଲାମ ଦିଆଯାଇଥିବା ଅଭିଯୋଗ ହୋଇଛି। ଅନ୍ୟପକ୍ଷେ ୫ ବର୍ଷ ପାଇଁ ନିଲାମ ହୋଇଥିବା ୩ ଏକରରୁ ଦେଢ଼ ଏକରରେ ମାଙ୍କଡା ପଥର ଖନନ ହୋଇ ସାରିଲାଣି। ୧ ଏକର ଜମିରୁ ଆକାଶିଆ ଓ କାଜୁ ଜଙ୍ଗଲ କଟା ହୋଇସାରିଛି । ପ୍ରଶାସନ ପ୍ରତିଶ୍ରୁତି ଦେଇ ପ୍ରତାରଣା କରି ଖଣି ନିଲାମ ଦେଇଥିବାରୁ ଆନ୍ଦୋଳନ କରିବାକୁ ଗାଁ ଲୋକ ନିଷ୍ପତ୍ତି ନେଇଛନ୍ତି ।
ଅଭିଯୋଗ ଅନୁଯାୟୀ, ଓସ୍ତପଡ଼ା ଗାଁ ନିକଟରେ ୩ ଏକର ସରକାରୀ ଜମିରୁ ସାଢ଼େ ୨ ଏକରରେ ଆକାଶିଆ ଓ ଇଉକାଲପଟାସ ଜଙ୍ଗଲ ଅଛି । ଏବେ ନିଲାମ ନେଇଥିବା ବ୍ୟକ୍ତି ପୂର୍ବରୁ ସ୍ବତନ୍ତ୍ର ନିଲାମ ନେଇ ଖଣି ଖନନ କାର୍ଯ୍ୟ ଆରମ୍ଭ କରିଥିଲେ । ଗାଁ ଲୋକ ଏହାକୁ ବିରୋଧ କରି ପ୍ରଶାସନର ଦ୍ୱାରସ୍ଥ ହୋଇଥିଲେ। ପରେ ନିଲାମ ନୋଟିସ୍ ବାହାରିବାରୁ ପୁଣି ଗାଁ ଲୋକ ବିରୋଧ କରି ପ୍ରଶାସନକୁ ଅବଗତ କରିଥିଲେ । ତଥାପି ଖଣି ନିଲାମ ହୋଇଥିବାରୁ ବିବାଦ ବଢ଼ି ଚାଲିଛି। ଗାଁ ଲୋକେ ଆନ୍ଦୋଳନ କରି ଖଣି ବନ୍ଦ କରିବାକୁ ଚେତାବନୀ ଦେଇଛନ୍ତି। ଏନେଇ ଓସ୍ତପଡ଼ା ଗାଁର ଦୀପକ ଖଣ୍ଡାୟତ ରାୟ କୁହନ୍ତି, ଓସ୍ତପଡାରେ ମାଙ୍କଡ଼ା ପଥର ଖନନ କରାଯାଇ ଖଣି କରାଯିବ ନାହିଁ ବୋଲି ଗାଁ ଲୋକ ନିଷ୍ପତ୍ତି ନେଇଛନ୍ତି। ତେବେ ସରକାରୀସ୍ତରରେ ପଥର ଖଣି ନିଲାମ ନୋଟିସ ବାହାରିବା ପରେ ଗାଁ ଲୋକ ପ୍ରତିବାଦ କଲେ । ଗତ ସେପ୍ଟେମ୍ବର ୧୩ ଓ ଅକ୍ଟୋବର ୧୨ରେ ଗାଁ ଲୋକେ ରଣପୁର ତହସିଲଦାର, ଜିଲାପାଳ, ୫-ଟି ସଚିବ, ପରିବେଶ ବିଭାଗକୁ ଅବଗତ କଲେ । ଜିଲା ପ୍ରଶାସନ ଓ ତହସିଲ ପକ୍ଷରୁ ଖଣି ଖନନ କରାଯିବାକୁ ଦିଆଯିବନି ବୋଲି କୁହାଯାଇଥିଲା । ଏହା ପରେ ପୁଣି ଖଣି ନିଲାମ ଦିଆଯିବା ପଛରେ ମୋଟା ଅଙ୍କର ଲାଞ୍ଚ କାରବାର ହୋଇଥିବା ଅଭିଯୋଗ କରି ଗାଁ ଲୋକ ବିରୋଧ କରିଛନ୍ତି । ବୀର କିଶୋର ମହାନ୍ତି କୁହନ୍ତି, ଗାଁ ଲୋକ ଖଣି ଖନନକୁ ବିରୋଧ କରୁଥିବାବେଳେ ପ୍ରଶାସନ କାହିଁକି ଖଣି ନିଲାମକୁ ଆଗ୍ରହ ପ୍ରକାଶ କରୁଛି । ଏହାରି ପଛରେ ଅର୍ଥ କାରବାର ହେଉଥିବା ଚର୍ଚ୍ଚା ହେଉଛି । ପ୍ରଶାସନ ପକ୍ଷରୁ ଲୋକଙ୍କୁ ପ୍ରତିଶ୍ରୁତି ଦେଇ ଖଣି ପାଇଁ ୱାର୍କ ଅର୍ଡର ଦିଆଯିବା କ’ଣ ଠିକ୍। ପ୍ରଶାସନ ଲୋକଙ୍କ ସ୍ବାର୍ଥ ପାଇଁ କାମ କରିବ ନା ନିଲାମ ସପକ୍ଷରେ ଯିବ। ପ୍ରଶାସନର ଏପରି କାର୍ଯ୍ୟାନୁଷ୍ଠାନକୁ ଗାଁ ଲୋକ ବିରୋଧ କରି ଆନ୍ଦୋଳନ କରିବାକୁ ନିଷ୍ପତ୍ତି ନେଇଛନ୍ତି । ବିକ୍ରମ ପରିଡ଼ା କୁହନ୍ତି, ୩ ଏକର ଜମିରୁ ଅଢ଼େଇ ଏକରରେ କାଜୁ ଓ ଆକାଶିଆ ଜଙ୍ଗଲ ରହିଛି। ଆମ ଗାଁ ଜମି ନିଲାମ ହୋଇଛି କି ନା ଆମେ ଜାଣିନୁ । ଆମେ ଶୁଣିଛୁ ପରିବେଶ ମଞ୍ଜୁରି ମିଳିନି। କିନ୍ତୁ ନିଲାମଧାରୀ ନିଲାମ ନେଇଛନ୍ତି କହି ୩ ଏକରରୁ ପ୍ରାୟ ଦେଢ଼ ଏକର ଖନନ କରି ସାରିଲେଣି । ଏବେ ପ୍ରାୟ ୧୫ ଫୁଟର ଗର୍ତ୍ତ ହୋଇଗଲାଣି । ଯେଉଁ ରେଞ୍ଜରେ ଖନନ ଚାଲିଛି ୨ ବର୍ଷ ପରେ ୨୦ରୁ ୩୦ ଫୁଟର ଗର୍ତ୍ତ ହୋଇ ସାରିଥିବ । ପ୍ରଶାସନ ଖଣି ଖନନର ଠିକ୍ ସମୀକ୍ଷା କରୁନି। ଗାଁ ଲୋକଙ୍କ ଅଭିଯୋଗ ଶୁଣୁନି। ଏଣୁ ଖଣି ଖନନକୁ ନେଇ ବିବାଦ ସୃଷ୍ଟି ହୋଇଛି । ଗାଁ ଲୋକ ଆନ୍ଦୋଳନ କରିବାକୁ ସଜବାଜ ହେଉଛନ୍ତି । ରଣପୁର ତହସିଲଦାର ପ୍ରଭାକର ପଣ୍ଡା କୁହନ୍ତି, ସବୁକିଛି ଠିକ୍ ଚାଲିଛି । ସମ୍ପୃକ୍ତ ଖଣି ନିଲାମ ଦିଆଯାଇଛି। ସରକାର ରାଜସ୍ବ ପାଉଛନ୍ତି। ନିଲାମ ନ ହେଲେ ବେଆଇନ ଖନନ ହେବ, ସରକାର ରାଜସ୍ବ ହରାଇବେ।
