ମସ୍କୋ,୫।୬: ଋଷିଆ ଭାରତକୁ ଖୋଲାଖୋଲି ଭାବେ ସମର୍ଥନ କରିଛି। ଭାରତର ବୈଦେଶିକ ନୀତି ଏବଂ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିବା ସହ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ କଡ଼ା ଚେତାବନୀ ଦେଇଛନ୍ତି ଋଷ ରାଷ୍ଟ୍ରପତି ବ୍ଲାଦିମିର ପୁଟିନ। ସେ ଭାରତକୁ ଏକ ସାର୍ୱଭୌମ ଦେଶ, ନିଜର ସବୁଠାରୁ ବୁଦ୍ଧିମାନ ବନ୍ଧୁ ଏବଂ ବିଶ୍ୱାସଯୋଗ୍ୟ ସହଯୋଗୀ ବୋଲି ଅଭିହିତ କରିଛନ୍ତି। ପୁଟିନ କହିଛନ୍ତି ଯେ ଭାରତ ବିଶ୍ୱର ପ୍ରମୁଖ ଅର୍ଥନୈତିକ ଶକ୍ତିଗୁଡ଼ିକ ମଧ୍ୟରୁ ଅନ୍ୟତମ। ଭାରତର ଅର୍ଥବ୍ୟବସ୍ଥା ବିଶ୍ୱର ଅଗ୍ରଣୀ ଅର୍ଥନୀତି ମଧ୍ୟରେ ଗଣାଯାଉଛି ଏବଂ ଋଷ ସହିତ ଏହାର ସମ୍ପର୍କ ଅତ୍ୟନ୍ତ ସୁଦୃଢ଼ ରହିଛି।
ପାଶ୍ଚାତ୍ୟ ଦେଶ, ବିଶେଷ କରି ଆମେରିକା, ଋଷିଆ ଏବଂ ଭାରତର ସହଯୋଗ ଉପରେ ଚାପ ସୃଷ୍ଟି କରିବାକୁ ଚେଷ୍ଟା କରୁଛି, କିନ୍ତୁ ପ୍ରଧାନମନ୍ତ୍ରୀ ମୋଦିଙ୍କ ଉପରେ ଚାପ ପକାଇବା ସମ୍ପୂର୍ଣ୍ଣ ବେକାର। ଆମେରିକା ଦ୍ୱାରା ଭାରତ ଏବଂ ପ୍ରଧାନମନ୍ତ୍ରୀ ମୋଦୀଙ୍କ ଉପରେ ଚାପ ପକାଇବା ଚେଷ୍ଟା ନିଜ ପାଇଁ କ୍ଷତିକାରକ ସାବ୍ୟସ୍ତ ହେବ। ଭାରତ ଏବଂ ଋଷିଆର ସମ୍ପର୍କ ଅତି ମଜଭୁତ ଏବଂ ଏହା ବିଶ୍ୱାସର ଭିତ୍ତିଭୂମି ଉପରେ ଠିଆ ହୋଇଛି। ଭାରତ-ଋଷିଆର ଦ୍ୱିପାକ୍ଷିକ ସମ୍ପର୍କକୁ କୌଣସି ବାହ୍ୟ ଚାପ ପ୍ରଭାବିତ କରିପାରିବ ନାହିଁ। ତେଣୁ ଆମେରିକା ରାଷ୍ଟ୍ରପତି ଟ୍ରମ୍ପ ଏହାକୁ ଖରାପ କରିପାରିବେ ନାହିଁ।
ଋଷିଆ ରାଷ୍ଟ୍ରପତି ବ୍ଲାଦିମିର ପୁଟିନ ଗୁରୁବାର ଦିନ ସେଣ୍ଟ ପିଟର୍ସବର୍ଗରେ ବିଶ୍ୱର ବଡ଼ ବଡ଼ ସମ୍ୱାଦ ସରବରାହ ସଂସ୍ଥା (ନ୍ୟୁଜ ଏଜେନ୍ସି) ର ମୁଖ୍ୟମାନଙ୍କ ସହ ଏକ ବିଶେଷ ବୈଠକ କରିଥିଲେ। ଏଥିରେ ସେ ଭାରତ, ଆମେରିକା ଏବଂ ପାକିସ୍ତାନକୁ ନେଇ ନିଜର ମତାମତ ବ୍ୟକ୍ତ କରିଥିଲେ। ସେ କହିଛନ୍ତି ଯେ ଯଦି ଅନ୍ୟ ଦେଶଗୁଡ଼ିକ ସହିତ ଭାରତର ସହଯୋଗ ବଢ଼ୁଛି, ତେବେ ଏହା ଋଷ ସହିତ ତାର ଦ୍ୱିପାକ୍ଷିକ ସମ୍ପର୍କ ପ୍ରତି କୌଣସି ବିପଦ ନୁହେଁ। ଆମେରିକା ଅଶୋଧିତ ତୈଳ (କ୍ରୁଡ ଅଏଲ) କୁ ନେଇ ଭାରତ ଉପରେ ଚାପ ପକାଇଛି, କିନ୍ତୁ ଏହା ଦ୍ୱାରା ଭାରତର ଋଷ ସହ ଥିବା ସମ୍ପର୍କ ପ୍ରଭାବିତ ହେବ ନାହିଁ।
ପୁଟିନ କହିଛନ୍ତି ଯେ ଭାରତ ଉପରେ ଚାପ ପକାଇବା, ନରେନ୍ଦ୍ର ମୋଦିଙ୍କ ଉପରେ ଚାପ ପକାଇବା ଆମେରିକାର ଆନ୍ତର୍ଜାତୀୟ ଏବଂ ଦ୍ୱିପାକ୍ଷିକ ସମ୍ପର୍କ ପାଇଁ କ୍ଷତିକାରକ ସାବ୍ୟସ୍ତ ହୋଇପାରେ। ଋଷିଆ ଏବଂ ଭାରତର ସମ୍ପର୍କ କ୍ରମାଗତ ଭାବେ ବିକଶିତ ହେଉଛି। ଆଗକୁ ମଧ୍ୟ ଏହି ସମ୍ପର୍କ ବଜାୟ ରହିବ, ସୁଦୃଢ଼ ହେବ ଏବଂ ଆହୁରି ଆଗକୁ ବଢ଼ିବ। କେବଳ ଅଶୋଧିତ ତୈଳ କିଣିବା ମଧ୍ୟରେ ଭାରତ ଏବଂ ଋଷର ସମ୍ପର୍କ ସୀମିତ ନୁହେଁ। ଆସନ୍ତା କିଛି ବର୍ଷ ମଧ୍ୟରେ ଦୁଇ ଦେଶର ଦ୍ୱିପାକ୍ଷିକ ବାଣିଜ୍ୟ ୧୦୦ ବିଲିୟନ (୧୦ ହଜାର କୋଟି) ଡଲାରରେ ପହଞ୍ଚିପାରେ। ଭାରତ ସର୍ୱଦା ନିଜର ଜାତୀୟ ସୱାର୍ଥକୁ ସର୍ୱୋପରି ମନେକରି କାର୍ଯ୍ୟ କରିଥାଏ।
