ମସ୍କୋ, ୯।୫ : ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ୭୦ ବର୍ଷ ବୟସରେ ବାପା ହେବାକୁ ଯାଉଛନ୍ତି ବୋଲି ଚର୍ଚ୍ଚା ହେଉଛି। ତାଙ୍କର ୩୮ ବର୍ଷୀୟା ଗର୍ଲଫ୍ରେଣ୍ଡ ଆଲିନା କବାବା ପୁଣି ଥରେ ଗର୍ଭବତୀ ଅଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ସୂଚନା ସାମ୍ନାକୁ ଆସିବା ପରେ ପୁଟିନ ଆଶ୍ଚର୍ଯ୍ୟ ହୋଇଯାଇଛନ୍ତି।
ଚଳିତ ବର୍ଷ ଅକ୍ଟୋବରରେ ପୁଟିନଙ୍କୁ ୭୦ ବର୍ଷ ବୟସ ହୋଇଛି ଏବଂ ତାଙ୍କର ପୂର୍ବତନ ଅଲିମ୍ପିକ ଜିମ୍ନାଷ୍ଟ ଆଲିନାଙ୍କର ଦୁଇଟି ସନ୍ତାନ ଅଛନ୍ତି। ପୁଟିନ ଆଉ ସନ୍ତାନ ଚାହୁଁ ନଥିଲେ ଏବଂ ଏହି ଖବର ଆସିବା ପରେ ସେ ଆଶ୍ଚର୍ଯ୍ୟ ହୋଇଯାଇଛନ୍ତି।
ରୁଷିଆର ନ୍ୟୁଜ ଚ୍ୟାନେଲ ଜେନେରାଲ ଏସଭିଆର ଟେଲିଗ୍ରାମ ପ୍ରକାଶ କରିଛି ଯେ ଆଲିନା ପୁଣି ଗର୍ଭବତୀ ଅଛନ୍ତି। ସୂଚନାନୁସାରେ, ପୁଟିନ ରେଡ୍ ସ୍କୋୟାରରେ ରୁଷିଆର ବିଜୟ ଦିବସ ପରେଡ ପାଇଁ ପ୍ରସ୍ତୁତ ହେଉଥିବା ସମୟରେ ତାଙ୍କୁ ଆଲିନାଙ୍କ ଗର୍ଭଧାରଣ ବିଷୟରେ ସୂଚନା ଦିଆଯାଇଥିଲା। ପୁଟିନ ତାଙ୍କ ପତ୍ନୀଙ୍କଠାରୁ ଛାଡପତ୍ର ନେଇ ସାରିଛନ୍ତି।
ରୁଷିଆର ନ୍ୟୁଜ୍ ଚ୍ୟାନେଲ କହିଛି ଯେ ପୁଟିନ ଜାଣିବାକୁ ପାଇଛନ୍ତି ଯେ ତାଙ୍କ ଗର୍ଲଫ୍ରେଣ୍ଡ ପୁନର୍ବାର ଗର୍ଭବତୀ ଅଛନ୍ତି ଏବଂ ଏହା ଯୋଜନା ଅନୁଯାୟୀ ନ ଥିବା ଜଣା ପଡୁଛି।
ଆଲିନାଙ୍କ ସହ ତାଙ୍କର ସମ୍ପର୍କ ଥିବା ପୁଟିନ ଏପର୍ଯ୍ୟନ୍ତ ସ୍ବୀକାର କରିନାହାଁନ୍ତି। ଆଲିନା ରୁଷିଆର ଏକ ମିଡିଆ ଗ୍ରୁପ୍ର ମାଲିକ ଏବଂ ଏହା ପୂର୍ବରୁ ସେ ସ୍ବିଜରଲ୍ୟାଣ୍ଡରେ ରହୁଥିଲେ। ଏକ ସ୍ଥାନୀୟ ଖବରକାଗଜ ପ୍ରକାଶ କରିଛି ଯେ ଆଲିନାଙ୍କର ୨୦୧୫ରେ ସ୍ବିଜରଲ୍ୟାଣ୍ଡରେ ଏବଂ ୨୦୧୯ରେ ମସ୍କୋରେ ଦୁଇ ଜଣ ପୁତ୍ର ସନ୍ତାନ ଜନ୍ମ ହୋଇଥିଲେ। ୟୁକ୍ରେନ ଯୁଦ୍ଧ ମଧ୍ୟରେ ଆଲିନାଙ୍କ ଉପରେ ବର୍ତ୍ତମାନ ୟୁରୋପୀୟ ଦେଶମାନଙ୍କ ଦ୍ୱାରା ପ୍ରତିବନ୍ଧକ ଲାଗୁ ହେବା ନେଇ ଆଶଙ୍କା ଦେଖାଦେଇଛି।
ଜିମ୍ନାଷ୍ଟ ଖେଳରୁ ଅବସର ନେବା ପରେ ଆଲିନା ରାଜନୀତିରେ ଯୋଗ ଦେଇଥିଲେ। ଆଲିନା ପୁଟିନଙ୍କ ୟୁନାଇଟେଡ ରୁଷିଆ ପାର୍ଟିର ସାଂସଦ ହୋଇଥିଲେ। ଦ ସନ ରିପୋର୍ଟ ଅନୁଯାୟୀ ପୁଟିନଙ୍କ ଗର୍ଲଫ୍ରେଣ୍ଡ ଆଲିନା ଏକ ପତ୍ରିକା ପାଇଁ ନିଜର ଅର୍ଦ୍ଧ ନଗ୍ନ ଚିତ୍ର ପାଇଁ ପୋଜ ଦେଇଛନ୍ତି। ଗାୟିକା ହେବା ପାଇଁ ଆଲିନା ମଧ୍ୟ ବହୁତ ଚେଷ୍ଟା କରିଥିଲେ, କିନ୍ତୁ ସଫଳ ହୋଇପାରି ନଥିଲେ।
୨୦୦୭ରୁ ୨୦୧୪ ପର୍ଯ୍ୟନ୍ତ ଆଲିନା ରୁଷିଆ ସଂସଦର ନିମ୍ନ ଗୃହର ଡେପୁଟି ଷ୍ଟେଟ ଡୁମା ଥିଲେ। ସେପ୍ଟେମ୍ବର ୨୦୧୪ରେ ଆଲିନାଙ୍କୁ ରୁଷିଆର ନ୍ୟାଶନାଲ ମିଡିଆ ଗ୍ରୁପ ଅଫ ଡାଇରେକ୍ଟର୍ସ ବୋର୍ଡର ଚେୟାରମ୍ୟାନ ଭାବରେ ନିଯୁକ୍ତ କରାଯାଇଥିଲା।
