ଖୋର୍ଦ୍ଧା ଅଫିସ,୪ା୩: ଖୋର୍ଦ୍ଧା ଜିଲାରେ ଧାନକିଣାରେ ବ୍ୟାପକ ଅବ୍ୟବସ୍ଥା ଲାଗି ରହିଛି। ମଣ୍ଡିରେ ଧାନବସ୍ତା ରଖି ଚାଷୀ ଜଗି ବସିଥିବା ବେଳେ ମିଲର୍ସ ବିଭିନ୍ନ ଆଳ ଦେଖାଇ ଧାନ ଉଠାଉ ନାହାନ୍ତି। ଫଳରେ ଚାଷୀ ନାହିଁ ନ ଥିବା ହଇରାଣ ହେଉଛନ୍ତି। ଅନ୍ୟପଟେ ଏହାର ସୁଯୋଗ ନେଇ ଆନ୍ଧ୍ର ବେପାରୀ ଦଲାଲଙ୍କ ଜରିଆରେ ଗଁାରେ ପଶି ସରକାରୀ ଧାର୍ଯ୍ୟଠାରୁ କମ୍ ମୂଲ୍ୟରେ ଧାନ କିଣି ନେଉଛନ୍ତି। ଏ ନେଇ ଖବର ରହିଥିବା ସତ୍ତ୍ୱେ ଯୋଗାଣ ବିଭାଗ ନୀରବଦ୍ରଷ୍ଟା ସାଜିଛି। ମିଲର୍ସଙ୍କ ଉପରେ ମଧ୍ୟ ପ୍ରଶାସନର ନିୟନ୍ତ୍ରଣ ନାହିଁ। ଗତବର୍ଷ ମାର୍ଚ୍ଚ ୩ ସୁଦ୍ଧା ପ୍ରାୟ ୧୨ଲକ୍ଷ କୁଇଣ୍ଟାଲ ଧାନ କିଣାଯାଇଥିବା ବେଳେ ଚଳିତ ବର୍ଷ ଗୁରୁବାର ସୁଦ୍ଧା ୨୪,୬୦୦ ଚାଷୀଙ୍କଠାରୁ ମାତ୍ର ୮.୪୯ ଲକ୍ଷ କୁଇଣ୍ଟାଲ ଧାନ କିଣାଯାଇଥିବା ଯୋଗାଣ ବିଭାଗରୁ ସୂଚନା ମିଳିଛି। ତେବେ ଜିଲାର ମଣ୍ଡିରେ ଧାନକିଣା ମନ୍ଥର ଗତିରେ ଚାଲିଥିବାରୁ ଟାର୍ଗେଟ୍ ପୂରଣ ହେବା ନେଇ ଆଶଙ୍କା ଦେଖାଦେଇଛି।
ପ୍ରକାଶ ଯେ, ଚଳିତ ବର୍ଷ ଖରିଫ ଧାନ ବିକ୍ରି ଲାଗି ୪୬ହଜାର ଚାଷୀ ନାମ ପଞ୍ଜୀକରଣ କରିଥିବା ବେଳେ ୧୮ ଲକ୍ଷ କୁଇଣ୍ଟାଲ ଧାନ କିଣିବା ଲାଗି ଯୋଗାଣ ବିଭାଗ ପକ୍ଷରୁ ଲକ୍ଷ୍ୟଧାର୍ଯ୍ୟ କରାଯାଇଛି। ତେବେ ସମୟ ସରିଆସୁଥିବା ବେଳେ ଧାନକିଣା ମନ୍ଥର ଗତିରେ ଚାଲିଛି। ଧାର୍ଯ୍ୟ ଅନୁସାରେ ଧାନ କିିଣାଯିବା ନେଇ ଆଶଙ୍କା ଦେଖାଦେଇଛି। ମଣ୍ଡିରେ ଧାନ କିଣାଯାଉ ନ ଥିବା ନେଇ ବିଭିନ୍ନ ଅଞ୍ଚଳର ଚାଷୀ ଦୈନିକ ଜିଲା ପ୍ରଶାସନର ଦ୍ୱାରସ୍ଥ ହୋଇ ଅଭିଯୋଗ କରୁଛନ୍ତି। ପ୍ରତିବର୍ଷ ଡିସେମ୍ବର ଶେଷଆଡ଼କୁ ଧାନକିଣା ହୋଇ ମାର୍ଚ୍ଚ ୩୧ରେ ଶେଷ ହୋଇଥାଏ। ଚଳିତ ବର୍ଷ ଡିସେମ୍ବର ୨୫ ପରିବର୍ତ୍ତେ ଜାନୁୟାରୀ ୧୨ରେ ମଣ୍ଡିକୁ ଜିଲାପାଳ ଉଦ୍ଘାଟନ କଲେ। ତେବେ ଜିଲାପାଳଙ୍କ ଦ୍ୱାରା ମଣ୍ଡି ଉଦ୍ଘାଟନ ସତ୍ତ୍ୱେ ଧାନ ଗୁଣାତ୍ମକ ମାନର ନ ଥିବା କହି ମିଲର୍ସମାନେ କ୍ରୟ କରି ନ ଥିଲେ। ଫଳରେ ଚାଷୀ ଧାନ ବ୍ରିକି କରିପାରି ନ ଥିଲେ। ଏହାପରେ ସମସ୍ତ ମଣ୍ଡିରେ ଏଭଳି ଅବ୍ୟବସ୍ଥା ଦେଖିବାକୁ ମିଳିଥିଲା। ଏନେଇ ବିଭିନ୍ନ ଚାଷୀ ସଙ୍ଗଠନ ରାସ୍ତାକୁ ଓହ୍ଲାଇବା ସହ ଧାନବସ୍ତା ରାସ୍ତା ଉପରେ ରଖି ଧାରଣା ଦେଇଥିବା ଦେଖିବାକୁ ମିଳିଥିଲା। ଏହାସତ୍ତ୍ୱେ ଜିଲା ପ୍ରଶାସନ ପକ୍ଷରୁ ଶୃଙ୍ଖଳିତ ଧାନକିଣା ନେଇ କୌଣସି ବ୍ୟବସ୍ଥା କରାଯାଇ ନ ଥିବା କେତେକ ଚାଷୀ ସଙ୍ଗଠନ ଅଭିଯୋଗ ଆଣିଛନ୍ତି। ଚାଷୀଙ୍କୁ ଧାନ କେବଳ ଝୋଟଅଖାରେ ଆଣିବା ପାଇଁ ରାଜ୍ୟ ଯୋଗାଣ ବିଭାଗର ନିର୍ଦ୍ଦେଶ ସତ୍ତ୍ୱେ ଏଥିରେ ବ୍ୟତିକ୍ରମ ଦେଖିବାକୁ ମିଳୁଛି। ଏକାଧିକ ମିଲର୍ସ ଚାଷୀଙ୍କଠାରୁ କମ୍ ମୂଲ୍ୟରେ ଧାନ କିଣି ଗୋଦାମରେ ଷ୍ଟକ୍ ରଖୁଥିବା ଜଣାପଡିଛି। ବାଲିଅନ୍ତାର ଏକ ମିଲ୍ ମାଲିକଙ୍କୁ ଜିଲାପାଳ ବ୍ଲାକ୍ ଲିଷ୍ଟେଡ୍ ଘୋଷଣା କରିବା ସହ ଧାନକିଣା ଉପରେ ରୋକ୍ ଲଗାଇଛନ୍ତି। ଜିଲାର ଅନ୍ୟ ମିଲ୍ ମାଲିକମାନେ ଦଲାଲଙ୍କ ଜରିଆରେ ଚାଷୀଙ୍କଠାରୁ କମ୍ ମୂଲ୍ୟରେ ଧାନ କିଣୁଥିବା ଜଣାପଡ଼ିଛି। ଏପଟେ ଟୋକନ ଅବଧି ସରିବାକୁ ବସିଲାଣି। ଚାଷୀ ମଣ୍ଡିକୁ ଧାନ ଆଣୁଥିବା ବେଳେ ମିଲର୍ସମାନେ ବିଭିନ୍ନ ଆଳ ଦେଖାଇ କୁଇଣ୍ଟାଲ ପିଛା ୭ରୁ ୧୦ କେଜି ପର୍ଯ୍ୟନ୍ତ କଟ୍ନିଛଟ୍ନି କରୁଛନ୍ତି। ପ୍ରତିବାଦ କଲେ ଗୁଣାତ୍ମକ ମାନ ଠିକ୍ ନ ଥିବା କହୁଥିବା ଚାଷୀ ସଙ୍ଗଠନ ଅଭିଯୋଗ ଆଣିଛନ୍ତି। ଏ ସମ୍ପର୍କରେ ଯୋଗାଣ ଅଧିକାରୀ ସୁଗୁଡା ମୁର୍ମୁଙ୍କ ପ୍ରତିକ୍ରିୟା ମିଳିପାରିନାହିଁ।
