ବେଙ୍ଗାଲୁରୁ,୭ା୭(ପି.ଟି.):ଦୁଲୀପ୍ ଟ୍ରଫି ସେମିଫାଇନାଲରେ ବୋଲରଙ୍କ ପ୍ରାଧାନ୍ୟ ଜାରି ରହିଥିବା ବେଳେ ଅର୍ଦ୍ଧଶତକ ହାସଲ କରିଛନ୍ତି ଚେତେଶ୍ୱର ପୂଜାରା ଓ ସୂର୍ଯ୍ୟକୁମାର ଯାଦବ। ଉଭୟଙ୍କ ଅର୍ଦ୍ଧଶତକ ବଳରେ ଦ୍ୱିତୀୟ ଦିନର ଷ୍ଟମ୍ପ୍ସ ଅପସାରଣ ସୁଦ୍ଧା ପଶ୍ଚିମାଞ୍ଚଳ ୩ ଉଇକେଟରେ ୧୪୯ ରନ୍ କରିବା ସହିତ ୨୪୧ ରନ୍ରେ ଆଗୁଆ ରହିଛି। ଅନ୍ୟପକ୍ଷରେ ଉତ୍ତରାଞ୍ଚଳ ପ୍ରଥମ ଇନିଂସରେ ୩ ରନ୍ର ଅଗ୍ରଣୀ ହାସଲ କରିଛି।
ନାଗ୍ବାସ୍ବାଲାଙ୍କୁ ୫ ଉଇକେଟ: ପଶ୍ଚିମାଞ୍ଚଳ ଓ କେନ୍ଦ୍ରାଞ୍ଚଳ ମଧ୍ୟରେ ଅନୁଷ୍ଠିତ ମ୍ୟାଚରେ ପଶ୍ଚିମାଞ୍ଚଳ ୨୨୦ ରନ୍ରେ ସମସ୍ତ ଉଇକେଟ ହରାଇଥିଲା। ଅତୀତ ସେଠ୍ ସର୍ବାଧିକ ୭୪ ରନ୍ କରିଥିବା ବେଳେ କେନ୍ଦ୍ରାଞ୍ଚଳ ପକ୍ଷରୁ ଶିବମ ମାଭି ୬ ଉଇକେଟ ନେଇଥିଲେ। ଜବାବରେ ଅର୍ଜନ ନାଗ୍ବାସ୍ବାଲାଙ୍କ ୫ ଉଇକେଟ ସଫଳତା ବଳରେ କେନ୍ଦ୍ରାଞ୍ଚଳ ୧୨୮ ରନ୍ରେ ସମସ୍ତ ଉଇକେଟ ହରାଇଥିଲା। ରିଙ୍କୁ ସିଂ ସର୍ବାଧିକ ୪୮ ରନ୍ କରିଥିବା ବେଳେ ଧ୍ରୁବ୍ ଜୁରେଲ ୪୬ ରନ୍ କରିଥିଲେ। ଦଳର ୮ ଖେଳାଳି ଦୁଇ ଅଙ୍କ ଛୁଇଁପାରି ନ ଥିଲେ। ଅର୍ଜନ ୭୪ ରନ୍ରେ ୫ ଉଇକେଟ ନେଇଥିବା ବେଳେ ଅତୀତ ସେଠ୍ ୩ ଓ ଚିନ୍ତନ ଗଜା ୨ ଉଇକେଟ ନେଇଥିଲେ। ୯୨ ରନ୍ର ଅଗ୍ରଣୀ ହାସଲ କରିଥିବା ପଶ୍ଚିମାଞ୍ଚଳ ଦ୍ୱିତୀୟ ଇନିଂସରେ ଦୃଢତାର ସହିତ ବ୍ୟାଟିଂ କରିଥିଲା। ପୃଥ୍ବୀ ଶ(୨୫) ଓ ପ୍ରିୟଙ୍କ ପାଞ୍ଚଲ(୧୫) ପ୍ରଥମ ଉଇକେଟରେ ୩୬ ରନ୍ ଯୋଡିଥିଲେ। ଉଭୟ ଓପନର ମାତ୍ର ୪ ରନ୍ ବ୍ୟବଧାନରେ ପ୍ୟାଭିଲିୟନ୍ ଫେରିଥିବା ବେଳେ ଚେତେଶ୍ୱର ପୂଜାରା(୫୦*) ଓ ସୂର୍ଯ୍ୟକୁମାର ଯାଦବ(୫୨) ଚତୁର୍ଥ ଉଇକେଟରେ ୯୫ ରନ୍ ଯୋଡିଥିଲେ। ଷ୍ଟମ୍ପ ଅପସାରଣ ବେଳକୁ ଚେତେଶ୍ୱର ପୂଜାରା ୧୦୩ ବଲ୍ ଖେଳି ୫୦ ରନ୍ରେ ବ୍ୟାଟିଂ କରୁଛନ୍ତି। ଅନ୍ୟତମ ବ୍ୟାଟର ସର୍ଫରାଜ ଖାଁ ୬ରନ୍ କରି ବ୍ୟାଟିଂ କରୁଛନ୍ତି। କେନ୍ଦ୍ରାଞ୍ଚଳ ପକ୍ଷରୁ ସୌରଭ କୁମାର ଦୁଇଟି ଓ ୟଶ ଠାକୁର ଗୋଟିଏ ଉଇକେଟ ନେଇଛନ୍ତି।
ଉତ୍ତରାଞ୍ଚଳ ୩ ରନ୍ରେ ଆଗୁଆ: ଦକ୍ଷିଣାଞ୍ଚଳ ବିପକ୍ଷ ଲୋ ସ୍କୋରିଂ ମ୍ୟାଚ୍ରେ ୩ ରନ୍ର ପ୍ରଥମ ଇନିଂସ ଅଗ୍ରଣୀ ହାସଲ କରିଛି ଉତ୍ତରାଞ୍ଚଳ। ଉତ୍ତରାଞ୍ଚଳର ୧୯୮ ରନ୍ ଜବାବରେ ମୟଙ୍କ ଅଗ୍ରଓ୍ବାଲଙ୍କ ୭୬ ଓ ତିଳକ ବର୍ମାଙ୍କ ୪୬ ରନ୍ ସତ୍ତ୍ୱେ ଦକ୍ଷିଣାଞ୍ଚଳ ପ୍ରଥମ ଇନିଂସରେ ମାତ୍ର ୧୯୫ ରନ୍ରେ ଅଲଆଉଟ ହୋଇ ୩ ରନ୍ ପଛରେ ରହିଥିଲା। ଦ୍ୱିତୀୟ ଇନିଂସରେ ଜୟନ୍ତ ଯାଦବ ଓ ବୈଭବ ଅରୋରା ୩ଟି ଲେଖାଏ ଉଇକେଟ ନେଇ ଦଳକୁ ମହତ୍ତ୍ୱପୂର୍ଣ୍ଣ ଅଗ୍ରଣୀ ପ୍ରଦାନ କରିଥିଲେ। ମୟଙ୍କ ୧୧୫ ବଲ୍ ଖେଳି ୧୦ ଚୌକା ସହିତ ୭୬ ରନ୍ କରିଥିଲେ। ସେ ତିଳକ ବର୍ମାଙ୍କ ସହିତ ୧୧୦ ରନ୍ ଯୋଡିଥିବା ବେଳେ ୫୦ ରନରେ ଦଳର ଶେଷ ୫ ଉଇକେଟର ପତନ ଘଟିଥିଲା।
ଜବାବରେ ଦ୍ୱିତୀୟ ଇନିଂସ ଆରମ୍ଭ କରି ଉତ୍ତରାଞ୍ଚଳ ଦୁଇ ଉଇକେଟ ହରାଇ ୫୧ ରନ୍ ସଂଗ୍ରହ କରିଛି। ଧ୍ରୁବ ସୋରେ ୫ ଓ ପ୍ରଶାନ୍ତ ଚୋପ୍ରା ୧୯ ରନ୍ କରି ପ୍ୟାଭିଲିୟନ ଫେରିଥିବା ବେଳେ ଅଙ୍କିତ କାଲସି ୨୧ ଓ ପ୍ରଭସିମରନ୍ ସିଂ ୬ ରନ୍ରେ ବ୍ୟାଟିଂ କରୁଛନ୍ତି। ଦକ୍ଷିଣାଞ୍ଚଳ ପକ୍ଷରୁ ବିଜୟ କୁମାର ବୈଶାକ ଓ ବିଦ୍ୱାଥ କଭେରପ୍ପା ଗୋଟିଏ ଲେଖାଏ ଉଇକେଟ ନେଇଛନ୍ତି।
