ନିଶ୍ଚିନ୍ତକୋଇଲି,୧୨।୪(ସ୍ବ.ପ୍ର.): କଟକ ଜିଲା ନିଶ୍ଚିନ୍ତକୋଇଲି ତହସିଲ ଅଧୀନ ବନ୍ଧକଟିଆ ପଞ୍ଚାୟତ କେଶୁଲ ଗ୍ରାମ ହରିଜନ ସାହିରେ ଗୋଚର ଜମିରେ ଏକ ପୂଜା ମଣ୍ଡପ ରହିଛି । ଏହି ପୂଜାମଣ୍ଡପ ନିକଟରେ ରହୁଥିବା ଜଣେ ବ୍ୟକ୍ତି ଗୋଚର ଜମି ଜବର ଦଖଲ କରିବା ସହ ପ୍ରଶାସନକୁ ହାତ କରି ଉକ୍ତ ମଣ୍ଡପକୁ ଭାଙ୍ଗିବାକୁ ପ୍ରୟାସ କରୁଥିବା ଜଣାପଡ଼ଛି। ଏହା ଜାଣିବା ପରେ ସ୍ଥାନୀୟ ହରିଜନ ମହିଳାମାନେ ସୋମବାର ସକାଳୁ ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ତେବେ ତହସିଲଦାର ନ ଥିବାରୁ ଉତ୍ତେଜନା ଦେଖାଦେଇଛି । ଖବର ପାଇ ଅତିରିକ୍ତ ତହସିଲଦାର ଉମାଶଙ୍କର ବିଶ୍ୱାଳ ମହିଳାଙ୍କୁ ବୁଝାସୁଝା କରିଛନ୍ତି। ତହସିଲଦାର ପୁନଃ ତଦନ୍ତ ପ୍ରତିଶ୍ରୁତି ଦେବାପରେ ଧାରଣା ପ୍ରତ୍ୟାହୃତ ହୋଇଛି। ତେବେ ତହସିଲ ପକ୍ଷରୁ ଉଚ୍ଛେଦ ପାଇଁ କୌଣସି ପ୍ରକ୍ରିଆ ହୋଇ ନ ଥିବା ତହସିଲଦାର ପ୍ରକାଶ କରିଛନ୍ତି।
