କଟକ ଅଫିସ,୧୦ା୧୧: ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା(ବିଏସ୍କେୱାଇ) କାର୍ଡ ହିତାଧିକାରୀଙ୍କଠାରୁ କଟକର ଏକ ଅଗ୍ରଣୀ ଘରୋଇ ହସ୍ପିଟାଲ କର୍ତ୍ତୃପକ୍ଷ ଟଙ୍କା ଆଦାୟ କରିବା ଘଟଣାରେ ହାଇକୋର୍ଟ କ୍ଷୁବ୍ଧ ହୋଇଛନ୍ତି। ଆସନ୍ତା ୧୨ ତାରିଖ ମଧ୍ୟରେ ଚିକିତ୍ସିତ ରୋଗୀଙ୍କୁ ଆଇସିୟୁ ବାବଦ ଅଗ୍ରିମ ନେଇଥିବା ୩୦ ହଜାର ଟଙ୍କା ଓ ଅନ୍ୟାନ୍ୟ ଖର୍ଚ୍ଚ ବାବଦ ୩୫ ହଜାର ଟଙ୍କା ୭ଦିନ ଭିତରେ ଫେରାଅ। ସେହିପରି କାର୍ଡର ନିୟମ ମୁତାବକ ହସ୍ପିଟାଲ କର୍ତ୍ତୃପକ୍ଷ ମାଗଣାରେ ଚିକିତ୍ସା କରାଇବାକୁ ମୁଖ୍ୟ ବିଚାରପତି ଏସ୍. ମୁରଲୀଧର ଓ ଜଷ୍ଟିସ୍ ଏ.କେ. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ମଙ୍ଗଳବାର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି।
ଆବେଦନକାରୀ ପୁରୀ ଜିଲା ଗୋପ ଅଞ୍ଚଳର ଆରତୀ ଚାଟାର୍ଜୀ ପିଟିଶନରେ ଦର୍ଶାଇଥିଲେ, ଗରିବ ଲୋକଙ୍କୁ ରାଜ୍ୟ ସରକାରଙ୍କ ପକ୍ଷରୁ ମାଗଣା ଚିକିତ୍ସା ଯୋଗାଇଦେବାକୁ ବିଏସ୍କେୱାଇ କାର୍ଡ ପ୍ରଚଳନ କରାଯାଇଛି। ସେହି କାର୍ଡ ଧରି କିଡ୍ନୀ ରୋଗ ଚିକିତ୍ସା ପାଇଁ ସ୍ବାମୀ ମଳୟ କୁମାର ଚାଟାର୍ଜୀଙ୍କୁ କଟକର ଏକ ଘରୋଇ ହସ୍ପିଟାଲକୁ ଗତ ୭ ତାରିଖରେ ଯାଇଥିଲେ। ଉକ୍ତ ହସ୍ପିଟାଲ ବିଏସ୍କେୱାଇ ଅନ୍ତର୍ଭୁକ୍ତ ହୋଇଥିଲେ ମଧ୍ୟ କର୍ତ୍ତୃପକ୍ଷ ବେଡ୍ ଓ ଆଇସିୟୁ ନଥିବା ଆଳ ଦେଖାଇ ମାଗଣା ଚିକିତ୍ସା କରିବାକୁ ମନା କରିଥିଲେ। ପରେ ଆରତୀ ଟଙ୍କା ପଇଠ କରି ସ୍ବାମୀଙ୍କ ଚିକିତ୍ସା କରାଇବାକୁ ରାଜି ହୋଇଥିଲେ। ତଦନୁଯାୟୀ, ଆଇସିୟୁ ବାବଦକୁ ୩୦ ହଜାର ଟଙ୍କା ଅଗ୍ରିମ ପଇଠ କରିବା ପରେ ଚିକିତ୍ସା ଆରମ୍ଭ ହୋଇଥିଲା। ପରେ ମେଡିସିନ ଓ ଅନ୍ୟ ଚିକିତ୍ସା ବାବଦକୁ ୩୫ ହଜାର ଟଙ୍କା ଦାଖଲ କରିଥିଲେ। ହସ୍ପିଟାଲର ଏଭଳି ମନମାନି ବିରୋଧରେ ଗତ ୮ ତାରିଖରେ ଆବେଦନକାରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ହାଇକୋର୍ଟ ସୋମବାର ଏହାର ଶୁଣାଣି କରି ଉକ୍ତ ହସ୍ପିଟାଲ କର୍ତ୍ତୃପକ୍ଷଙ୍କୁ ଟଙ୍କା ଫେରାଇବା ପାଇଁ ନୋଟିସ ଜାରି କରିଥିଲେ। ଆବେଦନକାରୀଙ୍କ ପକ୍ଷରୁ ଆଇନଜୀବୀ ସହସ୍ରାଂଶୁ ସୌରଭ ଓ ଗୌରବ ମହାନ୍ତି ମାମଲା ପରିଚାଳନା କରୁଛନ୍ତି।
