ପୁରୀ ଅଫିସ,୧୫।୩:ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିବାଦ କ୍ରମଶଃ ଜଟିଳ ହେବାରେ ଲାଗିଛି। ପ୍ରକଳ୍ପକୁ ଆଶିଂକ ଅନୁମତି ଥିବାବେଳେ ପ୍ରଶାସନ ମନଇଚ୍ଛା ବେଆଇନ ଭାବେ କାର୍ଯ୍ୟ କରୁଥିବା ଅଭିଯୋଗ ହେଉଛି। ବେଆଇନ ନିର୍ମାଣ କାର୍ଯ୍ୟ ବନ୍ଦ କରିବା ପାଇଁ ବିଭିନ୍ନ ମହଲରେ ଦାବି ଜୋର୍ ଧରୁଛି। ଏହି କ୍ରମରେ ସୋମବାର ବିଶ୍ୱ ହିନ୍ଦୁ ପରିଷଦ ପକ୍ଷରୁ ଉପଜିଲାପାଳ ପ୍ରଦୀପ କୁମାର ସାହୁଙ୍କୁ ଦାବିପତ୍ର ଦିଆଯାଇଛି।
ଦାବିପତ୍ରରେ ଉଲ୍ଲେଖ ହୋଇଛି, ଶ୍ରୀମନ୍ଦିର ସୌନ୍ଦର୍ଯ୍ୟକରଣ ନାମରେ ଶ୍ରୀମନ୍ଦିର ଭିତ୍ତିଭୂମିକୁ ଯେପରି ଭାବେ ଦୁର୍ବଳ କରାଯାଉଛି ତାହା ଆଦୌ ଗ୍ରହଣୀୟ ନୁହେଁ। ଓଡ଼ିଆଙ୍କ ଅସ୍ମିତା ଓ ପ୍ରାଣକେନ୍ଦ୍ର ମହାପ୍ରଭୁ ଶ୍ରୀଜଗନ୍ନାଥଙ୍କ ଶ୍ରୀମନ୍ଦିରକୁ ସୁରକ୍ଷା ଦେବାକୁ ସବୁବେଳେ ଏହି ଜାତି ପ୍ରାଥମିକତା ହୋଇଆସିଛି। ମାତ୍ର ପରିତାପର ବିଷୟ, ବର୍ତ୍ତମାନ ଶ୍ରୀମନ୍ଦିର ସୌନ୍ଦର୍ଯ୍ୟକରଣ ନାମରେ ମନ୍ଦିର ଦକ୍ଷିଣପଶ୍ଚିମ ଦ୍ୱାରଠାରୁ ମାତ୍ର ୨୦ ମିଟର ଦୂରରେ ବଡ଼ ବଡ଼ ଭାଇବ୍ରେଟର ମେଶିନ୍ ସହାୟତାରେ ବିରାଟ ଗାତ ଖୋଳାଯାଇ ନିର୍ମାଣ କାର୍ଯ୍ୟ କରାଯାଉଛି। ଯାହା ଶ୍ରୀମନ୍ଦିର ପ୍ରତି ବିପଦ ସୃଷ୍ଟି କରୁଛି। ଶ୍ରୀମନ୍ଦିର ପରିଦର୍ଶନ ବେଳେ ଏଏସ୍ଆଇ ଡିଜି ଭି. ବିଦ୍ୟାବତୀ ଏହି ଖନନକୁ ଦେଖି ଉଦବେଗ ପ୍ରକାଶ କରିବା ସହ କାମ ବନ୍ଦ ରଖିବାକୁ ନିର୍ଦ୍ଦେଶ ଦେଇଥିଲେ। ମାତ୍ର ତାଙ୍କ ନିର୍ଦ୍ଦେଶକୁ ଅଣଦେଖା କରାଯାଇ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ ଆଗେଇ ଚାଲିଛି। ଯାହା ଜଗନ୍ନାଥପ୍ରେମୀମାନଙ୍କୁ ଗଭୀର ଆଘାତ ଦେଉଛି। ପୁରୀ ସହରର ଅନେକ ଅନୁଷ୍ଠାନ ଏଭଳି ବେଆଇନ କାର୍ଯ୍ୟକୁ ବିରୋଧ କରୁଛନ୍ତି। ସୌନ୍ଦର୍ଯ୍ୟକରଣକୁ ବିରୋଧ କରିବାର ପ୍ରଶ୍ନ ଉଠୁନାହିଁ, ମାତ୍ର ଏହା ଶ୍ରୀମନ୍ଦିର ଭିତ୍ତିଭୂମିକୁ ସାମାନ୍ୟତମ ପ୍ରଭାବିତ ନ କରିବା ଉଚିତ। ନିର୍ମାଣ କାର୍ଯ୍ୟ ସମ୍ପର୍କରେ ଏଏସ୍ଆଇ ତୁରନ୍ତ ସ୍ପଷ୍ଟୀକରଣ ରଖିବା ଦରକାର, ନଚେତ୍ ନିର୍ମାଣ କାର୍ଯ୍ୟ ବନ୍ଦ ରହୁ ବୋଲି ବିଶ୍ୱ ହିନ୍ଦୁ ପରିଷଦ ପକ୍ଷରୁ କୁହାଯାଇଛି।
ଓକିଲ ସଂଘର ଲିଗାଲ ସେଲ୍ ବୈଠକ ଅନୁଷ୍ଠିତ ହୋଇଯାଇଛି। ଆଇନଜୀବୀ ଶରତ ରାୟଗୁରୁ କହିଛନ୍ତି, ବେଆଇନ ପ୍ରକଳ୍ପ କାର୍ଯ୍ୟ ନେଇ ଓକିଲ ସଂଘ ପକ୍ଷରୁ ସିଭିଲ୍ କୋର୍ଟରେ ମାମଲା ଦାୟର ସହ ଥାନାରେ ଅପରାଧିକ ଅଭିଯୋଗ କରାଯିବ। ଏଥିସହ ଧର୍ମଘଟ କରାଯିବ। ସେହିପରି ପୁରୀ ସହରର ବିଭିନ୍ନ ସାହି କମିଟି କର୍ମକର୍ତ୍ତା ଓ ବୁଦ୍ଧିଜୀବୀଙ୍କ ସହିତ ଆଲୋଚନା କରି ସାଧାରଣରେ ସଚେତନତା ସୃଷ୍ଟି କରାଯିବ। ଏହି ବୈଠକରେ ଓକିଲ ସଂଘ ସଭାପତି ଭଗବାନ ମିଶ୍ର ଏବଂ ସମ୍ପାଦକ ଶାରଦା ସାମଲଙ୍କ ସମେତ ବହୁ ଆଇନଜୀବୀ ଉପସ୍ଥିତ ଥିଲେ।
