ଭୁବନେଶ୍ୱର,୬।୬(ବ୍ୟୁରୋ): ଭୁବନେଶ୍ୱରରେ ବିଧାୟକ କ୍ୱାର୍ଟର୍ସ ନିର୍ମାଣ ପାଇଁ ପୁରୁଣା ଏମ୍ଏଲ୍ଏ କଲୋନୀରୁ ଶତାଧିକ ଗଛ କଟାଯିବା ପରେ ଆନ୍ଦୋଳନ ଜୋରଦାର ହୋଇଛି। ମହାନଦୀ ବଞ୍ଚାଅ ଆନ୍ଦୋଳନ ପକ୍ଷରୁ ଚାଲିଥିବା ଏହି ଆନ୍ଦୋଳନରେ ବିଭିନ୍ନ ସଙ୍ଗଠନ, ରାଜନୈତିକ ଦଳ, ପରିବେଶ ଓ ବୃକ୍ଷପ୍ରେମୀ, ଛାତ୍ରୀଛାତ୍ର ସାମିଲ ହୋଇଛନ୍ତି। ଚାରିଆଡୁ ବିରୋଧ ପରେ ରାଜ୍ୟ ସରକାର ଗଛକଟାକୁ ସ୍ଥଗିତ ରଖିଥିଲେ ମଧ୍ୟ ସ୍ଥାୟୀ ପଦକ୍ଷେପ ଦାବି କରି ଆନ୍ଦୋଳନ ଜାରି ରହିଛି। ରବିବାର ବିଶ୍ୱ ପରିବେଶ ଦିବସରେ ମହାନଦୀ ବଞ୍ଚାଅ ଆନ୍ଦୋଳନ ପକ୍ଷରୁ ସେଠାରେ ନଦୀ ପାଠଶାଳାର ଶୁଭାରମ୍ଭ କରାଯାଇଛି। ଗଛକଟାକୁ ନିଆରା ଢଙ୍ଗରେ ପ୍ରତିବାଦ ସ୍ବରୂପ ଜଙ୍ଗଲ ସୃଷ୍ଟି ପାଇଁ ବିଭିନ୍ନ କିସମର ମଞ୍ଜିଗୋଳା ପ୍ରସ୍ତୁତିର ପ୍ରଶିକ୍ଷଣ ଦିଆଯାଇଛି। ମହାନଦୀ ବଞ୍ଚାଅ ଆନ୍ଦୋଳନ, ଆର୍ଯ୍ୟାଭଟ୍ଟ ଫାଉଣ୍ଡେଶନ, ଓପନ ଲର୍ନିଂ ସିଷ୍ଟମ, ରୁଚିକା ଫାଉଣ୍ଡେଶନ ଏବଂ ଓଡ଼ିଶା ନଦୀ ସୁରକ୍ଷା ସମିତି ପକ୍ଷରୁ ଏହି କାର୍ଯ୍ୟକ୍ରମର ଆୟୋଜନ କରାଯାଇଛି। ଆନ୍ଦୋଳନର ଆବାହକ ସୁଦର୍ଶନ ଦାସ କହିଛନ୍ତି, ମେଶିନ ସହାୟତାରେ ଗଛକୁ ଉପାଡ଼ି ସ୍ଥାନାନ୍ତରଣ ପାଇଁ ସରକାର ଚିନ୍ତା କରୁଛନ୍ତି। ମାତ୍ର ଏହାହେଲେ ବହୁ ବଡ ବଡ଼ ଗଛ ମରିଯିବ। ତେଣୁ ଗଛ ସ୍ଥାନାନ୍ତର ନ କରି ବିଧାୟକଙ୍କ ବାସଭବନ ଅନ୍ୟତ୍ର କରିବା ପାଇଁ ଚିନ୍ତା କରନ୍ତୁ। ଅନ୍ୟଥା ଯେଉଁ ଅଞ୍ଚଳରେ ଗଛ କାଟି ଦିଆଯାଇଛି ସେଠାରେ ଅଟ୍ଟାଳିକା ନିର୍ମାଣ କରିବାର ବନ୍ଦୋବସ୍ତ କରନ୍ତୁ।
ଆର୍ଯ୍ୟଭଟ୍ଟ ଫାଉଣ୍ଡେଶନ ଅଧ୍ୟକ୍ଷ ଡ. ସୁଧୀର ରାଉତ ଓ ସହଯୋଗୀଙ୍କ ଦ୍ୱାରା ୫ହଜାର ଗଛ ସୃଷ୍ଟି ପାଇଁ ମଞ୍ଜି ଗୋଳା ତିଆରି ପ୍ରଶିକ୍ଷଣ ଦିଆଯାଇଥିଲା। ଏହି ଗୋଳାଗୁଡିକୁ ବର୍ଷା ଋତୁ ଆରମ୍ଭ ହେବା ପରେ ଚନ୍ଦକା ଜଙ୍ଗଲରେ ଫିଙ୍ଗାଯିବ। ଏହାଦ୍ୱାରା ଉଜୁଡି ଯାଇଥିବା ଜଙ୍ଗଲ ପୁନଃ ସୃଷ୍ଟି ହୋଇପାରିବ। ସାମାଜିକ କମୀ, ପରିବେଶ ପ୍ରେମୀ, ବୁଦ୍ଧିଜୀବୀ, ଭୁବନେଶ୍ୱର ବାସିନ୍ଦା, ଛୋଟପିଲା କାର୍ଯ୍ୟକ୍ରମରେ ଯୋଗଦେଇ ଭୁବନେଶ୍ୱର ତଥା ଓଡିଶାକୁ ସବୁଜ ସୁନ୍ଦର କରିବାକୁ ସଚେତନତାର ବାର୍ତ୍ତା ଦେଇଥିଲେ।
