ଭୁବନେଶ୍ୱର,୧୧।୭: ରାଜ୍ୟରେ ଓଡ଼ିଶା ଡ୍ରାଇଭର ମହାସଂଘର ଷ୍ଟିଅରିଂ ଛାଡ଼ ଆନ୍ଦୋଳନ ଜାରି ରହିଛି। ମହାସଂଘ ସଭାପତି ପ୍ରଶାନ୍ତ ମେଣ୍ଡୁଲି କହିଛନ୍ତି, ସରକାର ଲିଖିତ ପ୍ରତିଶ୍ରୁତି ନ ଦେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ। ଆନ୍ଦୋଳନ ବନ୍ଦ ହେବ ନାହିଁ ବୋଲି ସେ କହିଛନ୍ତି। ଏପରି କି ଆନ୍ଦୋଳନରେ ୩୦ଟି ଜିଲାର ଡ୍ରାଇଭରଙ୍କୁ ଯୋଗ ଦେବାକୁ ସଭାପତି ଅନୁରୋଧ କରିଛିନ୍ତି।
ଅନ୍ୟପକ୍ଷେ ରାଜରାସ୍ତାରେ ବିଶୃଙ୍ଖଳା କିମ୍ବା ଗାଡ଼ି ଅଟକାଇଲେ ସରକାର ଆକ୍ସନ ନେଇପାରନ୍ତି। ତେଣୁ ସଂଘ ପକ୍ଷରୁ ଶାନ୍ତିପୂର୍ଣ୍ଣ ଭାବେ ଧାରଣାରେ ବସି ଆନ୍ଦୋଳନ ଜାରି ରହିବ ବୋଲି କହିଛନ୍ତି।
କଂଗ୍ରେସର ଅନୁରୋଧକୁ ରକ୍ଷାକରି ଡ୍ରାଇଭର ସଂଘ ଶୁକ୍ରବାର ସମ୍ବିଧାନ ବଞ୍ଚାଅ ରାଲି ପାଇଁ କଂଗ୍ରେସ ଗାଡ଼ିକୁ ଅଟକାଇ ନ ଥିଲା। ହେଲେ ଡ୍ରାଇଭର ସଂଘର ଆନ୍ଦୋଳନ ଜନସାଧାରଣଙ୍କ ଉପରେ ପ୍ରଭାବ ପକାଇଛି। ବିଭିନ୍ନ ସ୍ଥାନରୁ ଗାଡ଼ି ଚଳାଚଳ ବନ୍ଦ ରହିଥିବା ବେଳେ ଯାତ୍ରୀମାନେ ବିଭିନ୍ନ ବସ୍ଷ୍ଟାଣ୍ଡରେ ଫସି ରହିଥିବା ଜଣାପଡିଛି।
ଓଡ଼ିଶା ଗସ୍ତରେ ଆସିଥିବା କଂଗ୍ରେସ ନେତା ରାହୁଲ ଗାନ୍ଧୀ ଡ୍ରାଇଭରଙ୍କ ଆନ୍ଦୋଳନ ପ୍ରସଙ୍ଗ ଉଠାଇ ରାଜ୍ୟ ସରକାରଙ୍କୁ ତୀବ୍ର ଆକ୍ରମଣ କରିଛନ୍ତି। ସମାବେଶରେ ସମ୍ବୋଧନ କରି ରାହୁଲ କହିଛନ୍ତି, ସରକାର ଡ୍ରାଇଭର ମହାସଂଘ ଉପରେ ଚାପ ପକାଇ ସେମାନଙ୍କ ସମାବେଶକୁ ଭଣ୍ଡୁର କରିବାକୁ ଉଦ୍ୟମ କରିଥିଲେ। କିନ୍ତୁ ଡ୍ରାଇଭର ମହାସଂଘ ସରକାରଙ୍କ ଚାପକୁ ନ ମାନି ଆନ୍ଦୋଳନ ଜାରି ରଖିଥିବାରୁ ରାହୁଲ ଡ୍ରାଇଭର ସଂଘର କର୍ମକର୍ତ୍ତାଙ୍କୁ ଧନ୍ୟବାଦ ଜଣାଇଛନ୍ତି। ଡ୍ରାଇଭରଙ୍କ ନ୍ୟାୟସଙ୍ଗତ ଦାବିକୁ ସରକାର ଗୁରୁତ୍ୱ ଦେଇ ତାହା ପୂରଣ କରିବା ଉଚିତ ବୋଲି ରାହୁଲ କହିଛନ୍ତି।
