ଭୁବନେଶ୍ୱର,୨୨।୯(ସୁନିତ୍ ମିଶ୍ର): ଓଡ଼ିଶାର ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ନୂଆ ପାଠ୍ୟପୁସ୍ତକରେ ଯେଉଁ ତ୍ରୁଟି କରାଯାଇଛି ତାହାର ଜବାବ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଏବଂ ଶିକ୍ଷା ବିଭାଗର ସରକାରୀ ଅଧିକାରୀମାନଙ୍କୁ ଦେବାକୁ ପଡ଼ିବ। ବିଧାନସଭା ଘେରାଉ ପୂର୍ବରୁ ସରକାର ଯଦି ନବନିର୍ମାଣ ଯୁବଛାତ୍ର ସଙ୍ଗଠନର ୬ ଦଫା ଦାବି ନ ଶୁଣନ୍ତି, ତା’ ହେଲେ ଆଗାମୀ ଦିନରେ ସଙ୍ଗଠନର ଏହି ଦାବିଗୁଡ଼ିକୁ ଲାଗୁ କରାଇବା ପାଇଁ କକ୍ରୋଚ ଜନତା ପାର୍ଟି(ସିଜେପି) ଦାୟିତ୍ୱ ନେବ ବୋଲି ଏହାର ରାଷ୍ଟ୍ରୀୟ ମୁଖପାତ୍ର ସୌରଭ ଦାସ କହିଛନ୍ତି। ଓଡ଼ିଶା ପାଠ୍ୟପୁସ୍ତକ ତ୍ରୁଟି ଏକ ବଡ଼ ପ୍ରସଙ୍ଗ। ପିଲା ଭୁଲ୍ ବହି ପଢ଼ିଲେ ଦେଶ ତଥା ରାଜ୍ୟର ପ୍ରଗତି କେମିତି ହେବ ବୋଲି ଓଡ଼ିଶା ଗସ୍ତରେ ଆସି ସୌରଭ ଏହା କହିଛନ୍ତି।
ପାଠ୍ୟପୁସ୍ତକରେ ତ୍ରୁଟି ନେଇ ରାଜ୍ୟ ଗଣଶିକ୍ଷା ମନ୍ତ୍ରୀଙ୍କ ଇସ୍ତଫା ସହିତ ୬ ଦଫା ଦାବି ପୂରଣ ଲାଗି ନବନିର୍ମାଣ ଯୁବଛାତ୍ର ସଙ୍ଗଠନ ପକ୍ଷରୁ ଲୋୟର ପିଏମ୍ଜିଠାରେ ଅନିର୍ଦ୍ଦିଷ୍ଟକାଳ ପର୍ଯ୍ୟନ୍ତ ସତ୍ୟାଗ୍ରହ ଜାରି ରହିଛି। ସଙ୍ଗଠନର ପ୍ରତିଷ୍ଠାତା ଅକ୍ଷୟ କୁମାର ଗତ ୧୬ ଦିନ ହେବ ଅନଶନ ଜାରି ରଖିଥିବାବେଳେ ସିଜେପି ଏହାକୁ ସମର୍ଥନ ଦେଇଛି। ସିଜେପି ରାଷ୍ଟ୍ରୀୟ ମୁଖପାତ୍ର ସୌରଭ ଦାସ ଏବଂ ସେକ୍ରେଟାରୀ ବାଲ୍କ୍ରିଷ୍ଣ ସୋମବାର ନବନିର୍ମାଣ ଯୁବଛାତ୍ର ସଙ୍ଗଠନ ଅନଶନସ୍ଥଳରେ ପହଞ୍ଚି ଏହାକୁ ସମର୍ଥନ ଦେଇଛନ୍ତି। ସିଜେପିର ଉଭୟ ସଦସ୍ୟ ଭୁବନେଶ୍ୱର ବିମାନବନ୍ଦରଠାରେ ଦିନ ୧୧ଟା ୩୦ ମିନିଟ୍ ସମୟରେ ପହଞ୍ଚିଥିଲେ। ସେଠାରେ ନବନିର୍ମାଣ ଯୁବଛାତ୍ର ସଙ୍ଗଠନର ନେତାମାନେ ଉଭୟଙ୍କୁ ସ୍ବାଗତ ଜଣାଇଥିଲେ। ଏହାପରେ ଦୁହେଁ ‘ସ୍କୁଲ ଠିକ୍ କରୋ’ କାର୍ଯ୍ୟକ୍ରମ ଆଧାରରେ ଖୋର୍ଦ୍ଧାର ୩ଟି ସରକାରୀ ବିଦ୍ୟାଳୟ ପରିଦର୍ଶନରେ ଯାଇଥିଲେ। ଅପରାହ୍ନ ୪ଟା ସମୟରେ ସିଜେପି ସଦସ୍ୟଙ୍କୁ ଏକ ଶୋଭାଯାତ୍ରାରେ ଲୋୟର ପିଏମ୍ଜି ପର୍ଯ୍ୟନ୍ତ ଅଣାଯାଇଥିଲା।
ଏହି ଅବସରରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସୌରଭ ଆହୁରି କହିଛନ୍ତି, ରାଜ୍ୟର ସମସ୍ତ ଅଭିଭାବକ ନିଜ ପିଲାଙ୍କ ଭବିଷ୍ୟତ କଥା ଚିନ୍ତା କରି ଅକ୍ଷୟ କୁମାରଙ୍କ ହାତରେ ହାତ ମିଶାଇ ଶିକ୍ଷା ବ୍ୟବସ୍ଥାର ସୁଧାର ପାଇଁ ମଙ୍ଗଳବାର ନବନିର୍ମାଣ ଯୁବଛାତ୍ର ସଙ୍ଗଠନର ବିଧାନସଭା ଘେରାଉ କାର୍ଯ୍ୟକ୍ରମରେ ଛିଡ଼ା ହୁଅନ୍ତୁ। ସିଜେପି ସବୁଠାରେ ରହିବ ତା’ର କିଛି ମାନେନାହିଁ। ତୃଣମୂଳସ୍ତରରେ ଯେଉଁମାନେ କାମ କରିବେ, ସେମାନଙ୍କ ମାର୍ଗଦର୍ଶନରେ ସିଜେପି ଚାଲିବ। ଦେଶବ୍ୟାପୀ ବର୍ତ୍ତମାନ ଆନ୍ଦୋଳନ ଚାଲିଛି। ଯନ୍ତରମନ୍ତର ପରେ ସବୁ ରାଜ୍ୟରେ ଉତ୍ତରଦାୟିତ୍ୱ ସ୍ଥିର କରିବାକୁ ଆନ୍ଦୋଳନ ହେଉଛି। ଏମିତି ସବୁ ଆନ୍ଦୋଳନକାରୀଙ୍କ ସହିତ ସିଜେପି ରହିବ। ସୌରଭ ଆହୁରି କହିଛନ୍ତି, ସିଜେପି ସଦସ୍ୟମାନେ ତୃଣମୂଳସ୍ତରରେ ଗାଁକୁ ଯାଉଛନ୍ତି। ଓଡ଼ିଶାରେ ଚାଲିଥିବା ନବନିର୍ମାଣ ଯୁବଛାତ୍ର ସଙ୍ଗଠନ ଅନେକ ଦିନ ହେଲାଣି ଅନଶନ ଚଳାଇ ରଖିଛି। ଏଭଳିସ୍ଥଳେ ସମସ୍ତେ ଚିନ୍ତା କରିବା ଦରକାର ସେମାନେ ଦେଶ ପାଇଁ କ’ଣ କରିପାରିବେ ବୋଲି ସୌରଭ କହିଛନ୍ତି।