ଭୁବନେଶ୍ୱର, ୭।୧(ବ୍ୟୁରୋ): ବିଶ୍ୱକପ୍ ହକି ପାଇଁ ରାଜଧାନୀରେ ଜବରଦଖଲ ଉଚ୍ଛେଦ ଜାରି ରହିଛି। ଏହାକୁ ବିରୋଧକରି କିଛିଦିନ ହେବ ଉଠା ଦୋକାନୀମାନେ ଆନ୍ଦୋଳନ ଚଳାଇଥିବା ବେଳେ ଏବେ ଏଥିରେ ଦେହଜୀବୀମାନେ ସାମିଲ ହୋଇଛନ୍ତି। ହକି ଖେଳକୁ ଆଳକରି ଭୁବନେଶ୍ୱର ବାଣୀବିହାରରେ ଥିବା ଦେହଜୀବୀଙ୍କ ବସ୍ତିକୁ ବିଏମ୍ସି, ବିଡିଏ ଓ ଏନ୍ଏଚ୍ଏଆଇ ପକ୍ଷରୁ ମିଳିତ ଭାବେ ଉଚ୍ଛେଦ କରାଯାଇଛି। ଏହାଦ୍ୱାରା ଭିଟାମାଟି ଛାଡ଼ି ଭୁବନେଶ୍ୱରରେ ଦୀର୍ଘ ୩୦ ବର୍ଷ ଧରି ରହିଆସୁଥିବା ଦେହଜୀବୀମାନେ ବାସହରା ହୋଇ ପଡ଼ିଛନ୍ତି। ୭ ଦିନ ମଧ୍ୟରେ ରାଜ୍ୟ ସରକାର ସମ୍ପୃକ୍ତ ଦେହଜୀବୀଙ୍କୁ ଥଇଥାନ ନ କଲେ ହଜାର ହଜାର ଦେହଜୀବୀ ନବୀନ ନିବାସ ଘେରାଉ କରିବେ ବୋଲି ବାଣୀବିହାର ଦେହଜୀବୀ ବସ୍ତି ସଭାପତି ଅଞ୍ଜନା ବେହେରା ଚେତାବନୀ ଦେଇଛନ୍ତି। ଶୁକ୍ରବାର ବାଣୀବିହାର ଦେହଜୀବୀ ବସ୍ତି ପକ୍ଷରୁ ଆୟୋଜିତ ଖବରଦାତା ସମ୍ମିଳନୀରେ ସଭାପତି ଅଞ୍ଜନା କହିଛନ୍ତି, ବାଣୀବିହାର ଅଞ୍ଚଳରେ ଥିବା ଜଙ୍ଗଲକୁ ସଫାକରି ସେଠାରେ ଦେହଜୀବୀମାନେ ବାସଗୃହ ନିର୍ମାଣ କରି ରହିବା ସହ ଦେହ ବ୍ୟବସାୟ କରି ସେମାନଙ୍କ ଗୁଜରାଣ ମେଣ୍ଟାଇ ଆସୁଥିଲେ। ଏବେ ରାଜ୍ୟ ସରକାରଙ୍କ ମିଳିତ ସ୍କ୍ବାଡ୍ ସୁପ୍ର୍ରିମ୍କୋର୍ଟଙ୍କ ନିର୍ଦ୍ଦେଶକୁ ଅବମାନନା କରି ବସ୍ତିରେ ରହୁଥିବା ପାଖାପାଖି ୧୫ଟି ପରିବାରକୁ ଉଚ୍ଛେଦ କରିଛନ୍ତି। ଏହାଦ୍ୱାରା ସେମାନେ ବାସହରା ହେବା ସହିତ ପିଲାଛୁଆଙ୍କୁ ଧରି ରାସ୍ତାକଡ଼ରେ ଶୀତ କାକରରେ ରାତ୍ରିଯାପନ କରୁଛନ୍ତି। ସେହିପରି ଓଡ଼ିଶା ବସ୍ତି ମହାସଂଘ ସଭାପତି ପ୍ରତାପ କୁମାର ସାହୁ କହିଛନ୍ତି, ବସ୍ତି, ଉଠାଦୋକାନ ଉଚ୍ଛେଦ କରି ଓଡ଼ିଶାକୁ ବିଶ୍ୱସ୍ତରରେ ବଦନାମ୍ କରିବା ପାଇଁ କିଛି ଅଣଓଡ଼ିଆ ଆଇଏଏସ୍ ଅଫିସରଙ୍କ ଏହା ସୁଚିିନ୍ତିତ ଷଡ଼ଯନ୍ତ୍ର। ତୁରନ୍ତ ଉଚ୍ଛେଦ ବନ୍ଦ ନ କଲେ ବସ୍ତିବାସିନ୍ଦା, ଉଠାଦୋକାନୀ ଏବଂ ଦେହଜୀବୀମାନେ ବଡ଼ଧରଣର ବିକ୍ଷୋଭ ପ୍ରଦର୍ଶନ କରିବେ ବୋଲି ପ୍ରତାପ ଚେତାବନୀ ଦେଇଛନ୍ତି। ଏହି ଖବରଦାତା ସମ୍ମିଳନୀରେ ବସ୍ତିର ରାନୀ ସାହୁ, ରୀନା ସ୍ବାଇଁ ପ୍ରମୁଖ ଉପସ୍ଥିତ ଥିଲେ।
