ନୂଆଦିଲ୍ଲୀ,୭ା୧: ଲାଞ୍ଚ ମାମଲାରେ କୌଣସି ଅଭିଯୁକ୍ତ କୋର୍ଟରେ ଦୋଷୀ ପ୍ରମାଣିତ ନ ହେବା ଯାଏ ତାଙ୍କ ନାମ କିମ୍ବା ଫଟୋ ପ୍ରଘଟ ନ କରିବାକୁ ରାଜସ୍ଥାନର ଆଣ୍ଟାଇ-କରପ୍ସନ ବ୍ୟୁରୋ (ଏସିବି) ପକ୍ଷରୁ ଏହାର ଅଧିକାରୀମାନଙ୍କୁ ଦିଆଯାଇଥିବା ଏକ ନିର୍ଦ୍ଦେଶକୁ ନେଇ ବିବାଦ ସୃଷ୍ଟି ହୋଇଛି। ଏପରି ନିର୍ଦ୍ଦେଶନାମା ପଛରେ ଗେହଲଟ୍ ସରକାରଙ୍କ କି ଉଦ୍ଦେଶ୍ୟ ଅଛି ବୋଲି ବିରୋଧୀ ଭାଜପା ପ୍ରଶ୍ନ କରିବା ପରେ ଶୁକ୍ରବାର ଉକ୍ତ ଅର୍ଡରକୁ ପ୍ରତ୍ୟାହାର କରିନିଆଯାଇଛି।
ରାଜସ୍ଥାନର ଦୁର୍ନୀତି ନିରୋଧୀ ସଂସ୍ଥା ଏସିବି ମହାନିର୍ଦ୍ଦେଶକ ବି.ଏଲ୍. ସୋନି ଗତ ୩୧ରେ ଅବସର ନେବା ପରେ ବୁଧବାର ଗେହଲଟ୍ ସରକାର ବରିଷ୍ଠ ପୋଲିସ ଅଧିକାରୀ ହେମନ୍ତ ପ୍ରିୟଦର୍ଶୀଙ୍କୁ ତାଙ୍କ ପଦରେ ଅବସ୍ଥାପିତ କରିଛନ୍ତି। ଏସିବିର କାର୍ଯ୍ୟକାରୀ ଡିଜି ଭାବେ ଦାୟିତ୍ୱ ଗ୍ରହଣ ପରେ ହେମନ୍ତ ନିଜ ଅଧିକାରୀମାନଙ୍କ ଉଦ୍ଦେଶ୍ୟରେ ରାତିରେ ଏକ ନିର୍ଦ୍ଦେଶନାମା ଜାରି କରିଥିଲେ। ସମସ୍ତ ଥାନାର ଭାରପ୍ରାପ୍ତ ଅଧିକାରୀ ଏବଂ ଏସିବି ୟୁନିଟ୍ ଇନ୍-ଚାର୍ଜମାନଙ୍କ ନିକଟକୁ ପଠାଯାଇଥିବା ପତ୍ରରେ ଉଲ୍ଲେଖ କରାଯାଇଛି ଯେ କୌଣସି ଅଧିକାରୀ ବା କର୍ମଚାରୀଙ୍କ ବିରୋଧରେ ଲାଞ୍ଚ ଗ୍ରହଣ ଅଭିଯୋଗ ଥିଲେ ତାହା କୋର୍ଟରେ ପ୍ରମାଣିତ ନ ହେବା ପର୍ଯ୍ୟନ୍ତ ତାଙ୍କ ନାମ କିମ୍ବା ଫଟୋକୁ ସାର୍ବଜନୀନ କରାଯିବ ନାହିଁ। ଗଣମାଧ୍ୟମ ସହ କେବଳ ଅଭିଯୁକ୍ତଙ୍କ ର଼୍ୟାଙ୍କ/ଡେଜିଗ୍ନେଶନ ଏବଂ ବିଭାଗର ନାମ ଶେୟାର କରାଯିବ। ପ୍ରଫେସନାଲ ଏଜେନ୍ସିଗୁଡ଼ିକ ଏହି ପଦ୍ଧତି ଆପଣାଇଥାଆନ୍ତି। ସୁପ୍ରିମକୋର୍ଟଙ୍କ ଗାଇଡ୍ଲାଇନ୍ସ ଅନୁସାରେ ଏହି ଅର୍ଡର ଦିଆଯାଇଛି। ଏପରି କି କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ମଧ୍ୟ ଅନେକ ବର୍ଷ ଧରି ଏହାକୁ ମାନିଆସୁଛି। ଅଭିଯୁକ୍ତ ଦୋଷୀ କି ନୁହନ୍ତି ତାହା ଅଦାଲତ ବିଚାର କରିଥାଆନ୍ତି ବୋଲି ହେମନ୍ତ କହିଥିଲେ। ବିରୋଧୀ ଦଳ ନେତା ଗୁଲାବଚନ୍ଦ କଟାରିଆ ଏହାକୁ ‘ତୋଗଲକି’ ଅର୍ଡର ଭାବେ ଅଭିହିତ କରି ତୁରନ୍ତ ପ୍ରତ୍ୟାହାର କରିବା ପାଇଁ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ଅନୁରୋଧ କରିଥିଲେ। ଗେହଲଟ୍ ସମାଲୋଚିତ ହେବା ପରେ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ଏସିବି ମୁଖ୍ୟ ଏହି ନିର୍ଦ୍ଦେଶନାମାକୁ ତତ୍କାଳ ପ୍ରତ୍ୟାହାର କରିଛନ୍ତି। ଦୁର୍ନୀତିଗ୍ରସ୍ତଙ୍କ ଚେହେରା ସମାଜ ଓ ଆଇନର ନଜରକୁ ଆସିବା ଜରୁରୀ ବୋଲି କେନ୍ଦ୍ର ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାଏ କରିଛନ୍ତି।
