ଯାଜପୁର ଅଫିସ,୨ା୬: ଯାଜପୁର ଜିଲା କର୍ମ ନିୟୋଜନ ସଂସ୍ଥା ଥାଇ ବି ମୂଲ୍ୟହୀନ। ବିଗତ ବର୍ଷଗୁଡ଼ିକରେ ପଞ୍ଜିକୃତ ଶିକ୍ଷିତ ଯୁବତୀଯୁବକଙ୍କୁ ଏହି ସଂସ୍ଥା ମାଧ୍ୟମରେ ନିଯୁକ୍ତି ନ ମିଳିବା ଏହି ଅଭିଯୋଗକୁ ସ୍ପଷ୍ଟ କରିଛି। ଜିଲା କର୍ମ ନିୟୋଜନ ସଂସ୍ଥା ପକ୍ଷରୁ ମିଳିଥିବା ତଥ୍ୟ ଅନୁଯାୟୀ, ୨୦୨୧ରୁ ୨୦୨୩ ଏପ୍ରିଲ ପର୍ଯ୍ୟନ୍ତ ସମୁଦାୟ ୧୮,୫୫୩ ଜଣ ପଞ୍ଜିକୃତ କରିଛନ୍ତି। ହେଲେ ଶିଳ୍ପ ସମୃଦ୍ଧ ଯାଜପୁର ଜିଲାରେ ଏଥିରୁ ଜଣଙ୍କୁ ବି ନିଯୁକ୍ତି ମିଳିନାହିଁ। ଏହା ଲଜ୍ଜାକର ଏବଂ ବିଡମ୍ବନା ଛଡା ଅନ୍ୟ କିଛି ନୁହେଁ ବୋଲି ଚର୍ଚ୍ଚା ହେଉଛି। ଅନ୍ୟପକ୍ଷେ ଯାଜପୁରର ଶିକ୍ଷିତ ଯୁବତୀଯୁବକମାନେ ନିଯୁକ୍ତି ପଛରେ ଧାଇଁବେ ନାହିଁ, ବରଂ ସେମାନେ ନିଯୁକ୍ତି ଦେବେ ବୋଲି ବିଭିନ୍ନ ସଭାସମିତିରେ ସ୍ଥାନୀୟ ଲୋକ ପ୍ରତିନିଧି ବଡ଼ବଡ଼ ପ୍ରତିଶ୍ରୁତି ଦେଉଛନ୍ତି। ଅଥଚ ବାହାର ରାଜ୍ୟର ଅଧିକାଂଶ ଠିକାସଂସ୍ଥାଗୁଡିକୁ ଏଠାରେ ନିଯୁକ୍ତି ଦେବାରେ ଲୋକ ପ୍ରତିନିଧିମାନେ ପରୋକ୍ଷରେ ସହଯୋଗ କରି ଓଡିଆ କର୍ମଚାରୀ ଓ ଶ୍ରମିକଙ୍କୁ ଶୋଷଣ କରାଯାଉଛି ବୋଲି ମତପ୍ରକାଶ ପାଇଛି। ଇତିମଧ୍ୟରେ ଖଡଗପୁରରେ ନିଯୁକ୍ତି ପ୍ରକ୍ରିୟାରେ ଓଡ଼ିଆ ଆଶାୟୀଙ୍କୁ ମାଡ ମାରି ତଡି ଦେବା ଘଟଣା ସହ ସ୍ଥାନୀୟ ନିଯୁକ୍ତିରେ ଅଣଦେଖାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି।
ଜିଲାରେ ଗୋଟିଏ ପରେ ଗୋଟିଏ ଶିଳ୍ପ କାରଖାନା ଗଢି ଉଠିବାରେ ଲାଗିଛି। ଇତିମଧ୍ୟରେ ନୂଆ କେତେକ ସିମେଣ୍ଟ କାରଖାନା ଏବଂ ଅନ୍ୟାନ୍ୟ ଛୋଟବଡ ଶିଳ୍ପ ପ୍ରତିଷ୍ଠା ହେଉଛି। ଏସବୁ ଶିଳ୍ପ ସଂସ୍ଥା କିନ୍ତୁ ସ୍ଥାନୀୟ ନିଯୁକ୍ତିକୁ ଜାଣିଶୁଣି ଉପେକ୍ଷା କରି ଚାଲିଛନ୍ତି । ଯେଉଁ କେତେଜଣ ସ୍ଥାନୀୟ ଲୋକଙ୍କୁ ନିଯୁକ୍ତି ଦିଆଯାଉଥିବା କୁହାଯାଉଛି ତାହା ସଂପୂର୍ଣ୍ଣ ଅସ୍ଥାୟୀ ଓ ଠିକା ନିଯୁକ୍ତି, ଦିନ ମଜୁରିଆ କହିଲେ ଅତ୍ୟୁକ୍ତି ନୁହେଁ । ସ୍ଥାନୀୟ କର୍ମଚାରୀ ଓ ଶ୍ରମିକମାନଙ୍କୁ ନିୟନ୍ତ୍ରଣ କରିବାର କ୍ଷମତା କେବଳ ଅଧିକାଂଶ ଅଣଓଡିଆଙ୍କ ହାତରେ ରହିଛି। କେତେକ ଶିଳ୍ପ ସଂସ୍ଥା ନିଜର ଠିକାସଂସ୍ଥା ଖୋଳି ନିଯୁକ୍ତି ଦେବା ନାମରେ ଶୋଷଣ କରି ଚାଲିଛନ୍ତି। ଉଚ୍ଚ ଶିକ୍ଷିତ ଏବଂ ବୈଷୟିକ ଜ୍ଞାନ କୌଶଳରେ ପାରିଦର୍ଶିତା ଥିବା ଓଡିଆ କର୍ମଚାରୀମାନଙ୍କୁ କମ ଦରମା ଦେଇ ଖରାରେ ଖଟାଉଥିବାବେଳେ ସେହି ଦକ୍ଷତା ଓ ଶିକ୍ଷାଗତ ଯୋଗ୍ୟତା ଥିବା ଅଣଓଡିଆଙ୍କୁ ଶୀତତାପ ନିୟନ୍ତ୍ରଣ କୋଠରୀରେ ନିଯୁକ୍ତି ଦିଆଯାଉଛି ବୋଲି ଅଭିଯୋଗ ହେଉଛି। ସ୍ଥାୟୀ ନିଯୁକ୍ତି ପାଇଁ ଜିଲା କର୍ମ ନିୟୋଜନ ସଂସ୍ଥା ମାଧ୍ୟମରେ କମ୍ପଲସରି ନୋଟିଫିକେଶନ ଅଫ ଭେକେନ୍ସି ଆକ୍ଟ ୧୯୫୯ ଅନୁଯାୟୀ ଖାଲି ପଦବୀରେ ନିଯୁକ୍ତି ବ୍ୟବସ୍ଥାକୁ ଉଦ୍ଦେଶ୍ୟମୂଳକ ଭାବେ ଶିଳ୍ପ ସଂସ୍ଥାଗୁଡିକ ଉଲ୍ଲଂଘନ କରି ଚାଲିଛନ୍ତି । ଏଥିରୁ ସ୍ପଷ୍ଟ ଯେ, ଆଇନ କାନୁନ ଓ ନୀତି, ନିୟମ ପ୍ରତି ମଧ୍ୟ ଶିଳ୍ପସଂସ୍ଥାଙ୍କ ବେଖାତିର ମନୋଭାବ ରହି ଆସିଛି । ତଥାପି ଶିକ୍ଷିତ ଯୁବତୀଯୁବକ କର୍ମ ନିୟୋଜନ ସଂସ୍ଥାରେ ପଞ୍ଜିକୃତ କରି ନିଯୁକ୍ତି ଆଶା ଛାଡୁ ନାହାନ୍ତି। ୨୦୨୧ରେ ପୁରୁଷ ୨୯୭୬ ଓ ମହିଳା ୧୩୮୧, ୨୦୨୨ରେ ପୁରୁଷ ୩୩୦୧ ଓ ମହିଳା ୧୨୮୬ ଏବଂ ୨୦୨୩ ଏପ୍ରିଲ ପର୍ଯ୍ୟନ୍ତ ପୁରୁଷ ୫୬୩୧ ଓ ମହିଳା ୩୯୭୮ ଜଣ ପଞ୍ଜିକୃତ କରିଛନ୍ତି। ଅନ୍ୟପକ୍ଷେ ଗତ ୨ ଆର୍ଥିକ ବର୍ଷରେ ପୃଥକ ଭାବେ ୬ ଦିନ କ୍ଷୁଦ୍ର ନିଯୁକ୍ତି ମେଳାର ଆୟୋଜନ ହୋଇଛି। ହେଲେ ଏହି ନିଯୁକ୍ତିମେଳାଗୁଡିକରେ କଳିଙ୍ଗନଗର ଶିଳ୍ପାଞ୍ଚଳର ବୃହତ୍ କାରଖାନାଗୁଡିକ ଭାଗ ନେଇ ନାହାନ୍ତି। ଏଭଳି ପ୍ରସଙ୍ଗ ଜିଲାରେ ସର୍ବୋଚ୍ଚ ସ୍ତରରେ ପ୍ରତିନିଧିତ୍ୱ କରୁଥିବା ଜନ ପ୍ରତିନିଧିଙ୍କ ଦୃଷ୍ଟିକୁ ଆସୁନାହିଁ । ବିଧାନସଭା ଓ ସଂସଦରେ ଏଭଳି ଜନ ସମସ୍ୟାକୁ ଉପସ୍ଥାପନ କରି ଜିଲାର ବେକାର ଯୁବତୀ ଯୁବକଙ୍କ ମଙ୍ଗଳ ପାଇଁ ଚିନ୍ତା କରିବା ସମୟ ନାହିଁ । ତଥାପି ଲୋକଙ୍କ ଦରଦି ହେବାର ଅଭିନୟ କରି ଶସ୍ତା ରାଜନୀତିରେ ବ୍ୟସ୍ତ ନେତାଏ ପ୍ରସଙ୍ଗକୁ ଅପ୍ରସଙ୍ଗ ଏବଂ ଅପ୍ରସଙ୍ଗକୁ ପ୍ରସଙ୍ଗ କରିବାରେ ମାତିଛନ୍ତି । ଲୋକଙ୍କ ଆଶା ଅନୁରୂପ ଜନସମସ୍ୟାର ପ୍ରକୃତ ଉପସ୍ଥାପନ ନ ହେବାରୁ ଲୋକ ମଧ୍ୟ ନିରାଶ ହେବାରେ ଲାଗିଛନ୍ତି ।
ଏ ସଂକ୍ରାନ୍ତରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ରଙ୍କୁ ପଚାରିବାରୁ ସେ କହିଛନ୍ତି ସ୍ଥାନୀୟ ନିଯୁକ୍ତିକୁ ପ୍ରାଧାନ୍ୟ ଦେବାକୁ ଶିଳ୍ପ କମ୍ପାନୀ କର୍ତ୍ତୃପକ୍ଷଙ୍କୁ ବାରମ୍ବାର ପରାମର୍ଶ ଦିଆଯାଉଛି ା
