ପାଟନା, ୨୪ା୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ବିହାରର ୩ଟି ସ୍ଥାନରେ ନିର୍ବାଚନ ରାଲି କରି ଭୋଟରଙ୍କୁ ମନାଇବା ଲାଗି ପ୍ରୟାସ କରିଛନ୍ତି। ବିହାରର ସାସାରାମ, ଗୟା ଓ ଭାଗଲପୁରରେ ସେ ବିରୋଧୀ କଂଗ୍ରେସ ଓ ଆର୍ଜେଡି ଉପରେ ବର୍ଷିଛନ୍ତି। ସାସାରାମରେ ଅନୁଷ୍ଠିତ ନିର୍ବାଚନୀ ରାଲିରେ ମୋଦି ବିରୋଧୀଙ୍କୁ ଟାର୍ଗେଟ କରିଛନ୍ତି। ଜମ୍ମୁ-କଶ୍ମୀରରୁ ୩୭୦ ଧାରା ଉଚ୍ଛେଦ କରାଯିବାକୁ ବିରୋଧୀ ଦଳ ସହିପାରୁନି। ଏଥିଲାଗି କେନ୍ଦ୍ର ସରକାରଙ୍କୁ ସମାଲୋଚନା କରାଯାଉଛି। କ୍ଷମତାକୁ ଫେରିଲେ ପୁଣି ସେଠାରେ ୩୭୦ ଲାଗୁ କରାଯିବ ବୋଲି ପ୍ରତିଶ୍ରୁତି ଦିଆଯାଉଛି। ଦେଶର ସୁରକ୍ଷା ଲାଗି ସୀମାରେ ରାଜ୍ୟର ଯୁବତୀଯୁବକମାନେ ମୁତୟନ ଥିବାବେଳେ ବିରୋଧୀଙ୍କ ଏଭଳି ଆଭିମୁଖ୍ୟ ବିହାର ଲାଗି ଅପମାନଜନକ ବୋଲି ମୋଦି ସାସାରାମ ରାଲିରେ କହିଛନ୍ତି।
ପୂର୍ବ ସରକାର ମାଓବାଦୀଙ୍କୁ ସମର୍ଥନ କରି ବିହାରକୁ ଦୁୁର୍ବଳ, ଦରିଦ୍ର କରିପକାଇଥିବା ସେ ପ୍ରକାଶ କରିଛନ୍ତି। ଆର୍ଜେଡିର ୧୫ ବର୍ଷ ଶାସନକାଳରେ ବିଭିନ୍ନ ଲୁଟ୍, ଅପରାଧ ଚରମସୀମାରେ ପହଞ୍ଚିଥିଲା। ଏନ୍ଡିଏ ବିରୋଧରେ ଲଢ଼ୁଥିବା ଦଳ ଦେଶର ଅଭିବୃଦ୍ଧି ଚାହାନ୍ତିନି। ନୀତୀଶ କୁମାରଙ୍କ ନେତୃତ୍ୱରେ ଏନ୍ଡିଏ ସରକାର ଗଠନ ହେବା ପରେ ଏଠାରେ ବିକାଶ ପରିଲକ୍ଷିତ ହୋଇଛି। ଏନ୍ଡିଏ ସରକାର ପୁଣି ବିହାରରେ ଆସିଲେ ବିକାଶଧାରା ତ୍ୱରାନ୍ବିତ ହୋଇପାରିବ ବୋଲି ମୋଦି ଭାଗଲପୁର ରାଲିରେ ପ୍ରକାଶ କରିଥିଲେ।
ନିର୍ବାଚନୀ ରାଲିରେ ପ୍ରଧାନମନ୍ତ୍ରୀ ୯୦ ଦଶକର ଶାସନକୁ ସବୁଠାରୁ ଖରାପ ଥିଲା ବୋଲି କହି ମହାମେଣ୍ଟକୁ ସମାଲୋଚନା କରିଛନ୍ତି। ଲୋକଙ୍କ ଉନ୍ନତି ପରିବର୍ତ୍ତେ ସେତେବେଳେ ଜଙ୍ଗଲରାଜ୍ ଚାଲିଥିଲା। ଏବେ ଲୋକଙ୍କ ପାଖରେ ବିଜୁଳି ପହଞ୍ଚିଛି, ଲଣ୍ଠନ(ଆର୍ଜେଡିର ନିର୍ବାଚନୀ ଚିହ୍ନ)ର ଯୁଗ ଶେଷ ହୋଇଛି। ନୂଆ ପିଢ଼ି ପାଖରେ କିଛି ଅଛପା ନାହିଁ। ବିହାରକୁ ଆତ୍ମନିର୍ଭରଶୀଳ କରି ବିକାଶ ପଥରେ ଆଗେଇ ନେବା ଲାଗି ଏନ୍ଡିଏ ବିଜୟୀ ହେବା ଜରୁରୀ ବୋଲି ମୋଦି ରାଲିକୁ ସମ୍ବୋଧନ କରି କହିଥିଲେ। ପ୍ରକାଶଥାଉ କି, ୨୮ରୁ ବିହାର ବିଧାନସଭା ଲାଗି ଭୋଟଗ୍ରହଣ ହେବାକୁ ଥିବାବେଳେ ପ୍ରଧାନମନ୍ତ୍ରୀ ଏଠାରେ ମୋଟ ୧୨ ରାଲି କରିବେ ବୋଲି ଜଣାପଡ଼ିଛି।
