ଲଣ୍ଡନ,୨୬ା୧- କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିବାର ଦକ୍ଷତା ଇଂଲଣ୍ଡର ଷ୍ଟାର ଖେଳାଳି ଜୋ ରୁଟ୍ଙ୍କ ନିକଟରେ ରହିଛି। ଏଭଳି କହି ଇଂଲଣ୍ଡ ଟେଷ୍ଟ ଦଳର ଅଧିନାୟକ ରୁଟ୍ଙ୍କୁ ପ୍ରଶଂସାରେ ପୋତି ପକାଇଛନ୍ତି ପ୍ରାକ୍ତନ ଖେଳାଳି ଜିଓଫ୍ରେ ବୟକଟ। ୩୦ ବର୍ଷୀୟ ରୁଟ ଶ୍ରୀଲଙ୍କା ବିପକ୍ଷ ସିରିଜ୍ରେ ୧୦୬.୫୦ ଆଭରେଜରେ ୪୨୬ ରନ୍ ସ୍କୋର କରିଥିଲେ। ଏଥିରେ ସାମିଲ ଥିଲା ଦୁଇଟି ଶତକ। ଏଥିସହ ଅନ୍ତର୍ଜାତୀୟ ଟେଷ୍ଟ ଫର୍ମାଟରେ ଇଂଲଣ୍ଡ ପାଇଁ ସର୍ବାଧିକ ରନ୍ କରିଥିବା ଟପ୍-୪ ବ୍ୟାଟ୍ସମ୍ୟାନଙ୍କ ତାଲିକାରେ ସ୍ଥାନ ପାଇଛନ୍ତି ରୁଟ୍।
“ଇଂଲଣ୍ଡ ପାଇଁ ସର୍ବାଧିକ ଟେଷ୍ଟ ରନ୍ କରିବାରେ ଡେଭିଡ୍ ଗଓ୍ବାର, କେଭିନ ପିଟରସନ ଓ ମୋତେ ପଛରେ ପକାଇବା କଥା ଭୁଲିଯାଆନ୍ତୁ। ରୁଟଙ୍କ ନିକଟରେ ୨୦୦ ଟେଷ୍ଟ ଖେଳିବାର ଦକ୍ଷତା ରହିଛି। ସଚିନଙ୍କ ଠାରୁ ଅଧିକ ରନ୍ କରିବାକୁ ସମର୍ଥ। ୩୦ ବର୍ଷୀୟ ଖେଳାଳି ଏପର୍ଯ୍ୟନ୍ତ ୯୯ ଟେଷ୍ଟ ଖେଳି ୮୨୪୯ ରନ୍ କରିସାରିଲେଣି। ଯଦି ବଡ଼ ଆଘାତ ସମସ୍ୟାର ସମ୍ମୁଖୀନ ନ ହୁଅନ୍ତି, ତେବେ ରୁଟ୍ ନିଶ୍ଚିତ ସଚିନ (୧୫,୯୨୧ ରନ୍)ଙ୍କ ରେକର୍ଡ ଭାଙ୍ଗିବେ ” ବୋଲି ବୟକଟ କହିଛନ୍ତି। ଉଲ୍ଲେଖଥାଉ କି, ଆସନ୍ତା ୫ ତାରିଖରୁ ହେବାକୁ ଥିବା ଭାରତ ବିପକ୍ଷ ସିରିଜ୍ରେ ଇଂଲଣ୍ଡ ଦଳର ସଫଳତା ମୁଖ୍ୟତଃ ରୁଟ୍ଙ୍କ ଉପରେ ନର୍ଭର କରେ।
