ବଇଣ୍ଡା,୨୭ା୪(ପରିକ୍ଷିତ ସାହୁ) ଗ୍ରାମାଞ୍ଚଳକୁ ପାନୀୟ ଜଳ ଯୋଗାଣ ପାଇଁ ସରକାରଙ୍କ ମାଳମାଳ ଯୋଜନା ରହିଛି। ହେଲେ ପ୍ରଶାସନିକ ଇଚ୍ଛାଶକ୍ତି ଅଭାବ ଏ କ୍ଷେତ୍ରରେ ପ୍ରତିବନ୍ଧକ ସାଜୁଛି। ଏହି କାରଣରୁ ଅନୁଗୋଳ ଜିଲା କିଶୋରନଗର ବ୍ଲକରେ ପାନୀୟ ଜଳ ସମସ୍ୟାର ସମାଧାନ ହୋଇପାରୁ ନାହିଁ। ବ୍ଲକର ୨୩ଟି ପଞ୍ଚାୟତରେ ୪୫ଟି ପ୍ରକଳ୍ପ ନିର୍ମାଣ କରାଯାଇଥିଲେ ମଧ୍ୟ ସମସ୍ତଙ୍କ ନିକଟରେ ପାଣି ପହଞ୍ଚତ୍ପାରୁ ନାହିଁ। କେଉଁଠି ପାଇପ୍ ଫାଟି ଆଁ କରିଛି ତ ଆଉ କେଉଁଠି ନିର୍ମାଣ କାର୍ଯ୍ୟ ଶେଷ ହୋଇପାରୁ ନାହିଁ। ଫଳରେ ପ୍ରତିବର୍ଷ ଖରାଦିନେ ପିଇବା ପାଣିକୁ ନେଇ ହନ୍ତସନ୍ତ ହେବାକୁ ପଡ଼ୁଛି ବ୍ଲକବାସିନ୍ଦାଙ୍କୁ।
ବ୍ଲକର ଠେଲକନାଳୀ ପଞ୍ଚାୟତରେ ବସୁଧା ଯୋଜନାରେ ନିର୍ମାଣ ହେଉଥିବା ପ୍ରକଳ୍ପ ସମ୍ପୂର୍ଣ୍ଣ ହେଉନାହିଁ। ଏଥିଯୋଗୁ ପଞ୍ଚାୟତବାସୀ ପିଇବା ପାଣି ଯୋଗାଡ଼ କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ବଇଣ୍ଡାଠାରେ ଥିବା ପ୍ରକଳ୍ପର ପାଇପ୍ଗୁଡିକ ୮୦ ପ୍ରତିଶତ ଫାଟିଯାଇଛି। ଫଳରେ ନୁନୁକାପଶି, ବଇଣ୍ଡାଛକ, ଶିକ୍ଷକପଡ଼ା ଆଦି ଅଞ୍ଚଳକୁ ଜଳ ଯୋଗାଣ ବନ୍ଦ ରହିଛି। ଗାଁ ବଇଣ୍ଡା ପଞ୍ଚାୟତର ଧୁଣ୍ଡି ଗ୍ରାମରେ ଠିକ୍ ଭାବେ ପାଣି ମିଳୁନାହିଁ। ଉକ୍ତ ଗ୍ରାମର ମଦନପଡ଼ା ସାହିକୁ ପାଣି ଯାଉ ନ ଥିବାବେଳେ ସେଠାରେ ନଳକୂଅଟିଏ ବି ଖୋଳାଯାଇ ନାହିଁ। କେତେକ ପଞ୍ଚାୟତରେ ଥିବା ପ୍ରକଳ୍ପର ରକ୍ଷଣାବେକ୍ଷଣ ଉପଯୁକ୍ତ ଭାବେ କରାଯାଉ ନାହିଁ। ଏପରିକି ବିଦ୍ୟୁତ୍ ବିଲ୍ ପଇଠ କରାଯାଉ ନ ଥିବା ଯୋଗୁ ପାଣି ଯୋଗାଣ ଅନେକ ସମୟରେ ହୋଇପାରୁନାହିଁ। ସେହିପରି ବ୍ଲକରେ ଥିବା ୧୭୪୨ଟି ନଳକୂପ ମଧ୍ୟରୁ ସରକାରୀ ଭାବେ ୨୦ଟି ଅଚଳ ଥିବା କୁହାଯାଉଥିବା ବେଳେ ବେସରକାରୀ ଭାବେ ଏହି ସଂଖ୍ୟା ୧୧୨ ବୋଲି କୁହାଯାଉଛି। ସେଥିରୁ କଦଳୀମୁଣ୍ଡା ପଞ୍ଚାୟତରେ ୪ଟି, ଧଡରପାଳରେ ୩, ଉରୁକୁଳରେ ୪, ଅଙ୍ଗପଡ଼ାରେ ୩, ବିଲେଇନାଳିରେ ୫, କଦଳୀମୁଣ୍ଡାରେ ୪, ଠେଲକନାଳିରେ ୪, ଗାଁ ବଇଣ୍ଡାରେ ୪, କଣ୍ଟେଇକୋଳିଆରେ ୫ ନଳକୂଅ ଖରାପ ରହିଥିବା କୁହାଯାଉଛି। ଏ ନେଇ କିଶୋରନଗର ଜଳ ପରିମଳ ବିଭାଗ ସହକାରୀ ଯନ୍ତ୍ରୀ ପୁରୁଷୋତ୍ତମ ପ୍ରଧାନ କହିଛନ୍ତି, ଠେଲକନାଳି ପ୍ରକଳ୍ପ ଶୀଘ୍ର କାର୍ଯ୍ୟକ୍ଷମ କରାଯିବ। ଏହାଛଡ଼ା ବ୍ଲକର ୨୩ଟି ପଞ୍ଚାୟତ ସହ ଆଠମଲ୍ଲିକ ବ୍ଲକର କିଆକଟା, ବାସୁଦେବପୁର, ଟୁସର ପଞ୍ଚାୟତକୁ ମହାନଦୀରୁ ପାଣି ଯୋଗାଣ ପାଇଁ ସରକାରଙ୍କ ପକ୍ଷରୁ ଯୋଜନା ହୋଇଛି। ଏହି ମେଗା ପ୍ରୋଜେକ୍ଟ ପାଇଁ ୨୫୩ କୋଟି ଟଙ୍କା ବିନିଯୋଗ କରାଯିବ। ଏହି ପ୍ରକଳ୍ପ ନର୍ମାଣ ହେଲେ କିଶୋରନଗର ବ୍ଲକବାସୀଙ୍କ ପିଇବା ପାଣି ଅସୁବିଧା ରହିବ ନାହିଁ ବୋଲି ଯନ୍ତ୍ରୀ ପ୍ରଧାନ ପ୍ରକାଶ କରିଛନ୍ତି।
ପ୍ରକଳ୍ପରୁ ଦୈନିକ ପାଣି ମିଳୁନି
ପଞ୍ଚାୟତ ପକ୍ଷରୁ ଗ୍ରାମ ନିକଟରେ ଏକ ପ୍ରକଳ୍ପ କରାଯାଇଛି। କିନ୍ତୁ ପ୍ରତ୍ୟେକ ଦିନ ପାଣି ମିଳେନି। ଗତ ୩ ଦିନ ହେବ ପାଣି ଆସୁ ନ ଥିବାରୁ ଖୋଲା କୂଅ ଉପରେ ନିର୍ଭର କରିବାକୁ ପଡୁଛି। ଏଥିପ୍ରତି ପ୍ରଶାସନ ଦୃଷ୍ଟି ଦେଲେ ଲୋକେ ଉପକୃତ ହୁଅନ୍ତେ।
-ବବିତା ସାହୁ, ଧୁଣ୍ଡି
ଗାଁରେ ଟ୍ୟାଙ୍କର ବୁଲାଯାଉ
ବସୁଧା ଯୋଜନାରେ ଜଳ ଯୋଗାଣ ପ୍ରକଳ୍ପ ନିର୍ମାଣ ହେଉଛି। ଏଯାଏ ତାହା ସମ୍ପୂର୍ଣ୍ଣ ହୋଇ ନ ଥିବାରୁ ଗ୍ରାମବାସୀ ପାନୀୟ ଜଳ ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଯଥାଶୀଘ୍ର ପ୍ରକଳ୍ପ ଶେଷ ସହ ଟ୍ୟାଙ୍କର ଯୋଗେ ଖଳାସାହିକୁ ପାଣି ଯୋଗାଇ ଦିଆଯାଉ।
-ସୁଷମା ପ୍ରଧାନ, ଠେଲକନାଳି
ଖୋଲା କୂଅ ଉପରେ ନିର୍ଭର
ଗ୍ରାମରେ ନଳକୂଅ ନାହିଁ। ଜଳ ପ୍ରକଳ୍ପ ନିର୍ମାଣ ହୋଇନାହିଁ। ଏକ ଖୋଲା କୂଅରୁ ୧୦୦ ପରିବାର ପାଣି ନେଉଛନ୍ତି। ବହୁଥର ବ୍ଲକ ପ୍ରଶାସନ ଓ ଲୋକ ପ୍ରତିନିଧିଙ୍କୁ ଅଭିଯୋଗ କରିଛୁ। ହେଲେ କେହି ଶୁଣୁନାହାନ୍ତି। ତୁରନ୍ତ ଏକ ନଳକୂଅ ଖୋଳାଯାଉ।
-ସୁଭଦ୍ରା ସାହୁ, ଗୁରୁଜାଙ୍ଗ
୨ ବର୍ଷ ହେବ ପାଇପ୍ ଫାଟିଯାଇଛି
ବଇଣ୍ଡା ଅଞ୍ଚଳ ପାଇଁ ୧୯୯୯ ମସିହାରେ ଜଳଯୋଗାଣ ପ୍ରକଳ୍ପ ନିର୍ମାଣ ହୋଇଥିଲା। ୨ ବର୍ଷ ହେବ ପାଇପ୍ ଫାଟିଯାଇଛି। ନୂତନ ପାଇପ୍ ବିଛାଇବାରେ ବିଳମ୍ବ ଯୋଗୁ ବଇଣ୍ଡାବାସୀ ପାଣି ପାଇବାରୁ ବଞ୍ଚିତ ହେଉଛନ୍ତି। ଏଥିପ୍ରତି ଦୃଷ୍ଟି ଦିଆଯାଉ।
-ରମେଶ କୁମାର ବେହେରା, ବଇଣ୍ଡା
ସୋଲାର ପମ୍ପ୍ ଅଚଳ
କଣ୍ଟେଇକୋଳିଆ ପଞ୍ଚାୟତର ଅନେକ ଗ୍ରାମକୁ ଯାଇଥିବା ପାଇପ୍ ଫାଟିଯାଇଛି। ୫ ବର୍ଷ ହେବ ଅଁଳାବେରେଣୀ ଗ୍ରାମ ସୋଲାର ପମ୍ପ୍ ଅଚଳ ହୋଇପଡିଛି। ବହୁ ନଳକୂଅରୁ ପାଣି ବାହାରୁ ନାହିଁ। ଫଳରେ ପଞ୍ଚାୟତବାସୀ ପିଇବା ପାଣି ପାଇବାରୁ ବଞ୍ଚିତ ହେଉଛନ୍ତି।
-ଆମାତ ସାହୁ, କଣ୍ଟେଇକୋଳିଆ
ସରପଞ୍ଚମାନଙ୍କୁ ନିର୍ଦ୍ଦେଶ ଦିଆଯାଇଛି
କିଶୋରନଗର ବ୍ଲକରେ ଜଳ ସମସ୍ୟାର ସମାଧାନ ପାଇଁ ସରକାରଙ୍କ ପକ୍ଷରୁ ପଦକ୍ଷେପ ନିଆଯାଉଛି। ସମସ୍ୟା ଥିବା ସମସ୍ତ ଗ୍ରାମକୁ ଟ୍ୟାଙ୍କର ପାଣି ଯୋଗାଣ ପାଇଁ ବ୍ଲକ କର୍ତ୍ତୃପକ୍ଷ ଓ ସରପଞ୍ଚମାନଙ୍କୁ ନିର୍ଦ୍ଦେଶ ଦିଆଯାଇଛି। ନଳକୂଅ ନ ଥିଲେ ଖୋଳାଯିବାକୁ କୁହାଯାଇଛି।
-ରମେଶ ଚନ୍ଦ୍ର ସାଏ, ବିଧାୟକ, ଆଠମଲ୍ଲିକ
