ଭୁବନେଶ୍ୱର,୨।୧୨(ବ୍ୟୁରୋ): ବିଭିନ୍ନ ଖାଦ୍ୟ ସୁରକ୍ଷା ପଦକ୍ଷେପ ଯୋଗୁ ଜାତୀୟ ଖାଦ୍ୟ ସୁରକ୍ଷା ସୂଚକାଙ୍କରେ ଓଡ଼ିଶା ଅଗ୍ରଗତି ହାସଲ କରିଛି। ୨ଠ୧୮-୧୯ରେ ୨୬ତମ ସ୍ଥାନରେ ଓଡ଼ିଶା ରହିଥିବାବେଳେ ୨ଠ୧୯-୨ଠରେ ୧୩ତମ ଏବଂ ୨ଠ୨ଠ-୨୧ରେ ୪ର୍ଥ ସ୍ଥାନରେ ରହିଛି ରାଜ୍ୟ। ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟସ୍ତରୀୟ ଖାଦ୍ୟ ସୁରକ୍ଷା ଆଡ୍ଭାଇଜରି କମିଟି ବୈଠକରୁ ଏହା ଜଣାପଡ଼ିଛି।
ତଥ୍ୟରୁ ଜଣାପଡ଼ିଛି ଯେ, ୨ଠ୨ଠ-୨୧ ବର୍ଷରେ ୩ଠ୪୯ ନମୁନା ସଂଗ୍ରହ କରାଯାଇ ପରୀକ୍ଷା କରାଯାଇଥିଲା। ଏଥିରୁ ୫୭୬ଟି ନମୁନା ମିସ୍ବ୍ରାଣ୍ଡିଂ ଭାବେ ବୁକ୍ କରାଯାଇଛି। ସେହିପରି ୨ଠ୨୧-୨୨ ଅକ୍ଟୋବର ସୁଦ୍ଧା ୧୯୮୪ ନମୁନାରୁ ୪୪୬ଟିକୁ ବୁକ୍ କରାଯାଇଛି। ଏହାବାଦ୍ ୨୮ଠଟି ମାମଲାରେ ଜରିମାନା ଆଦାୟ କରାଯାଇଛି। ମୋଟ୍ ୨୨,ଠ୭୬ ଫୁଡ୍ ବିଜନେସ୍ ଅପରେଟରଙ୍କୁ ଅନ୍ଲାଇନ୍ ଲାଇସେନ୍ସ ପ୍ରଦାନ କରାଯାଇଛି। ୮୩ ହଜାର ୨୮୫ ଏଫ୍ବିଓଗୁଡ଼ିକୁ ଅନ୍ଲାଇନ୍ ରେଜିଷ୍ଟ୍ରେଶନ୍ ସାର୍ଟିଫିକେଟ୍ ପ୍ରଦାନ କରାଯାଇଛି।
ଖାଦ୍ୟ ପ୍ରସ୍ତୁତି ଲାଗି ଷ୍ଟ୍ରିଟ୍ ଫୁଡ଼୍ ଭେଣ୍ଡରମାନଙ୍କୁ ତାଲିମ୍ ପ୍ରଦାନ କରିବାକୁ ମୁଖ୍ୟ ସଚିବ ନିର୍ଦ୍ଦେଶ ଦେଇଛନ୍ତିି। ଏହାସହ ବିଷାକ୍ତ ଖାଦ୍ୟର ପ୍ରଭାବ ସମ୍ପର୍କରେ ଭେଣ୍ଡରଙ୍କୁ ସଚେତନ କରିବାକୁ କୁହାଯାଇଛି। ସେହିପରି ଫୁଡ଼୍ ବିଜନେସ୍ ଅପରେଟର ଏବଂ ଷ୍ଟ୍ରିଟ୍ ଭେଣ୍ଡରଙ୍କ ଦ୍ୱାରା ନିରାପଦ ଖାଦ୍ୟ ବିକ୍ରୟ ଉପରେ ନଜର ରଖିବା ପାଇଁ ନିୟମିତ ଜିଲାସ୍ତରୀୟ ଖାଦ୍ୟ ସୁରକ୍ଷା ବୈଠକ କରିବାକୁ ମହାପାତ୍ର ନିର୍ଦ୍ଦେଶ ଦେଇଛନ୍ତି। ଖାଦ୍ୟ ସୁରକ୍ଷା କମିଶନର ଯାମିନୀ ଷଡ଼ଙ୍ଗୀ କହିଛନ୍ତି, ରାଜ୍ୟ ଖାଦ୍ୟ ଯାଞ୍ଚ ପରୀକ୍ଷାଗାରର କ୍ଷମତାକୁ ବୃଦ୍ଧି କରାଯାଇଛି। ବିଭିନ୍ନ ମେଳା, ସର୍ବସାଧାରଣ ଉତ୍ସବ ଏବଂ ପର୍ବପର୍ବାଣି ଆଦିରେ ମୋବାଇଲ୍ ଫୁଡ୍ ଟେଷ୍ଟିଂ ଲାବ୍ କାର୍ଯ୍ୟ କରୁଛି। ବୈଠକରେ ଉନ୍ନୟନ କମିଶନର ପ୍ରଦୀପ ଜେନା, ସ୍ବାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ସଚିବ ରାଜ୍ କୁମାର ଶର୍ମା, ଆଇନଶୃଙ୍ଖଳା ଏଡିଜି ରାଧାକିଷାନ ଶର୍ମାଙ୍କ ସମେତ ବରିଷ୍ଠ ଅଧିକାରୀମାନେ ଯୋଗଦେଇଥିଲେ।
