କୋରେଇ,୧୦ା୮(ଚନ୍ଦ୍ରକାନ୍ତ ପତି):କୋରେଇ ବ୍ଲକ ଅଧୀନରେ ପ୍ରାୟ ୭୦ରୁ ଊଦ୍ଧର୍ବ ଘରୋଇ ସ୍କୁଲ ରହିଛି। ଏଥିରୁ ୫୨ ସରକାରୀ ସ୍ବୀକୃତିପ୍ରାପ୍ତ ସ୍କୁଲ୍ ରହିଥିବାବେଳେ ୨୦ରୁ ଊଦ୍ଧର୍ବ ସ୍କୁଲ୍ ବେଆଇନ ଭାବେ ଗଢ଼ିଉଠିଛି। ମାତ୍ର ବିଡ଼ମ୍ବନାର ବିଷୟ ସ୍ବୀକୃତିପ୍ରାପ୍ତ ସ୍କୁଲ୍ଗୁଡ଼ିକ ମଧ୍ୟରୁ ଏକାଧିକ ସ୍କୁଲ୍ ସରକାରୀ ଜମିରେ ଚାଲୁଥିବାବେଳେ ଅନ୍ୟକିଛି ଶିକ୍ଷାନୁଷ୍ଠାନ ଆବଶ୍ୟକ ଭିତ୍ତିଭୂମି ନ ଥାଇ ସିଓଆର୍ (ସାର୍ଟିଫିକେଟ ଅଫ୍ ରିକୋଗ୍ନନାଇଜେଶନ) ହାତେଇଛନ୍ତି।
ଯାଜପୁର ଜିଲା ଶିକ୍ଷା ବିଭାଗର କେତେଜଣ ଉଚ୍ଚପଦସ୍ଥ ଅଧିକାରୀଙ୍କୁ ମାସିକ ମୋଟା ଅଙ୍କର ହାତଗୁଞ୍ଜାଦେଇ ଘରୋଇ ସ୍କୁଲ ମାଲିକମାନେ ସୁରକ୍ଷିତ ଭାବେ ଶିକ୍ଷାକୁ ବେପାରରେ ପରିଣତ କରିଛନ୍ତି।
ପିଲାଙ୍କ ପାଇଁ ପିଇବା ପାଣି, ଖେଳପଡ଼ିଆ, ଶୌଚାଳୟ ଓ ଆବଶ୍ୟକ କ୍ଲାସରୁମର ବ୍ୟବସ୍ଥା ନ ଥାଇ ସ୍କୁଲ୍ଗୁଡ଼ିକ ଚାଲୁଛି। ଅନେକ ଶିଶୁ ମନ୍ଦିରରେ କର୍ଯ୍ୟରତ ଶିକ୍ଷୟିତ୍ରୀଶିକ୍ଷକ କୌଣସି ତାଲିମ ନ ନେଇ ପିଲାଙ୍କୁ ଶିକ୍ଷାଦାନ କରୁଥିବା ଜଣାପଡ଼ିଛି। ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ନୈରାଶ୍ୟଜନକ ଥିବାରୁ ନିର୍ଦ୍ୱନ୍ଦ୍ୱରେ ଏହି ବେଆଇନ ସ୍କୁଲ୍ଗୁଡ଼ିକ ଚାଲୁଥିବା ଆଲୋଚନା ହେଉଛି। ଅଧିକାଂଶ ସ୍କୁଲ୍ରେ ସରକାରୀ ଗାଇଡଲାଇନ ଅନୁଯାୟୀ ଆବଶ୍ୟକ ଭିତ୍ତିଭୂମି ନ ଥିଲେ ମଧ୍ୟ ଶିକ୍ଷା ବିଭାଗର କେତେଜଣ ଦୁର୍ନୀତିଖୋର ଅଧିକାରୀ ଅର୍ଥ ଲାଳସାରେ ଗନ୍ତବ୍ୟସ୍ତଳୀ ପରିଭ୍ରମଣ ନ କରି ସ୍ବୀକୃତି ପ୍ରମାଣପତ୍ର (ସିଓଆର୍) ପ୍ରଦାନ କରିଥିବା ଚର୍ଚ୍ଚା ହେଉଛି। ବେଆଇନଭାବେ ଚାଲୁଥିବା ଅଧିକାଂଶ ସ୍କୁଲରେ ଅନଭିଜ୍ଞ ଶିକ୍ଷୟିତ୍ରୀଶିକ୍ଷକଙ୍କ ଦ୍ୱାରା ପିଲାଙ୍କୁ ଶିକ୍ଷା ପ୍ରଦାନ କରି ଅଭିଭାବକଙ୍କ ନିକଟରୁ ମାସିକ ମୋଟା ଅଙ୍କର ଅର୍ଥ ଅସୁଲ କରାଯାଉଛି। ବ୍ଲକ ଅଧୀନ ରଗଡ଼ି ଅଞ୍ଚଳରେ ଏକାଧିକ ସ୍କୁଲର ଆବଶ୍ୟକ ଭିତ୍ତିଭୂମି ନ ଥାଇ କିଛି ପ୍ରତିଷ୍ଠିତ ଶିକ୍ଷାନୁଷ୍ଠାନରୁ ଫ୍ରାଞ୍ଚାଇଜ ଆଣି ସ୍କୁଲ ଖୋଲି ନିଜର ବେପାର ଚଳାଇଛନ୍ତି। ସେହିପରି ସରକାରୀ ଗାଇଡ୍ଲାଇନର ଅନୁପାଳନ ନ କରି ଶାଳକଣା ଅଞ୍ଚଳରେ ଏକ ବେଆଇନ ସ୍କୁଲ ଗଢ଼ିଉଠିଛି। ଏଥିରେ ମଧ୍ୟ ଶତାଧିକ ଶିଶୁ ଅଧ୍ୟୟନ କରୁଛନ୍ତି। ଏହିପରି ଢଙ୍ଗରେ କୋରେଇ ବ୍ଲକ ଅଧୀନରେ ଅଧିକାଂଶ ଘରୋଇ ସ୍କୁଲ ମାଲିକମାନେ ଶିଶୁଙ୍କ ଭବିଷ୍ୟତ ସହ ଖେଳ ଖେଳୁଛନ୍ତି। ଏନେଇ ଜିଲା ଶିକ୍ଷା ବିଭାଗ ନିକଟରେ ଯେତେ ଅଭିଯୋଗ ହେଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଫଳରେ ସରକାରୀ ସ୍କୁଲ୍ଗୁଡ଼ିକ ପ୍ରତି ଅଭିଭାବକ ମୁହଁ ଫେରାଇ ନେଉଥିବାବେଳେ କୋରେଇ ଅଞ୍ଚଳରେ ଶିକ୍ଷା ବ୍ୟବସ୍ଥା ଦିନକୁ ଦିନ ବ୍ୟପର୍ଯ୍ୟସ୍ତ ହେବାରେ ଲାଗିଛି। ଏ ସମ୍ପର୍କରେ ପ୍ରତିକ୍ରିୟା ପାଇଁ ଜିଲା ଶିକ୍ଷା ଅଧିକାରୀ ରଞ୍ଜନ କୁମାର ଗିରିଙ୍କୁ ଫୋନ୍ ଦ୍ୱାରା ଏକାଧିକ ଥର ଯୋଗାଯୋଗ କରାଯାଇଥିଲେ ହେଁ ସେ ଫୋନ୍ କଲ ଗ୍ରହଣ କରି ନ ଥିଲେ। କୋରେଇ ମଣ୍ଡଳ ଶିକ୍ଷାଅଧିକାରୀ ସୁଦର୍ଶନ ମଲ୍ଲିକଙ୍କୁ ପଚାରିବାରେ ସେ କହିଛନ୍ତି, ଅଭିଯୋଗ ହେଲେ କାର୍ଯ୍ୟାନୁଷ୍ଠାନ ନିଆଯିବ। ଏବେ ଦେଖିବାକୁ ଅପେକ୍ଷା କେବେ ଏହା ଉପରେ କାର୍ଯ୍ୟାନୁଷ୍ଠାନ ହେଉଛି।
