ଆଡିଲେଡ୍,୧୮।୧୨: ଭାରତ-ଅଷ୍ଟ୍ରେଲିଆ ମଧ୍ୟରେ ଚାରି ମ୍ୟାଚ୍ ବିଶିଷ୍ଟ ବର୍ଡର-ଗାଭାସ୍କର ଟ୍ରଫି ଆରମ୍ଭ ହୋଇଛି। ପ୍ରଥମ ମ୍ୟାଚ୍ର ପ୍ରଥମ ଦିନରେ ଅଧିନାୟକ ବିରାଟ କୋହଲୀ ଟସ୍ ଜିତି ବ୍ୟାଟିଂ କରିବା ନିଷ୍ପତ୍ତି ନେଇଥିଲେ। ପରେ ଭାରତ ପ୍ରଥମ ଇନିଂସରେ ୨୪୪ ରନ୍ କରି ଅଲଆଉଟ୍ ହୋଇଯାଇଛି। ହେଲେ ଓପନିଂ କରିବାକୁ ଆସିଥିବା ବ୍ୟାଟ୍ସମ୍ୟାନ୍ ପୃଥ୍ବୀ ଶ ନିଜର ଖରାପ ପ୍ରଦର୍ଶନ ଯୋଗୁ ଚର୍ଚ୍ଚାରେ ରହିଛନ୍ତି। ତାଙ୍କ ପାଇଁ ଏହି ମ୍ୟାଚ୍ ଭଲ ସାବ୍ୟସ୍ତ ହେଉନାହିଁ। ଗୁରୁବାର ଓପନିଂ କରିବାକୁ ଆସି ଦ୍ୱିତୀୟ ବଲ୍ରେ ଶୂନରେ ଆଉଟ ହୋଇଯାଇଥିଲେ ପୃଥ୍ବୀ। ଏହାପରେ ଶୁକ୍ରବାର ଅଷ୍ଟ୍ରେଲିଆ ଦଳ ବ୍ୟାଟିଂ କରୁଥିବା ବେଳେ କଙ୍ଗାରୁ ଟିମ୍ର ମାର୍ନସ ଲାବୁଶେନଙ୍କ ସହଜ କ୍ୟାଚ୍ ସେ ଛାଡ଼ି ଦେଇଥିଲେ। ଏହାକୁ ନେଇ ବିରାଟ ତାଙ୍କ ଉପରେ ଖପ୍ପା ହୋଇଛନ୍ତି।
ଅଷ୍ଟ୍ରେଲିଆ ଦଳ ବ୍ୟାଟିଂ କରୁଥିବା ବେଳେ ୨୩ତମ ଓଭରରେ ଜସପ୍ରିତ ବୁମରାହ ବୋଲିଂ କରୁଥିଲେ। ମାର୍ନସ ଲାବୁଶେନ ଷ୍ଟ୍ରାଇକ୍ରେ ଥିଲେ। ବୁମରାହଙ୍କ ବଲ୍ରେ ସେ ଶର୍ଟ ମାରିଥିଲେ, ଯାହା ପୃଥ୍ବୀଙ୍କ ପାଖରେ ପହଞ୍ଚିଥିଲା। ହେଲେ ଅତି ସହଜର କ୍ୟାଚ୍ଟିକୁ ସେ ଛାଡ଼ି ଦେଇଥିଲେ। ସେତେବେଳେ ମାର୍ନସ ୨୧ ରନ୍ କରି ଖେଳୁଥିଲେ। ଏହାକୁ ନେଇ ବିରାଟ ପୃଥ୍ବୀଙ୍କ ଉପରେ ବହୁତ ରାଗି ଯାଇଥିବା ଦେଖାଯାଇଛି। ଏପରିକି ସେ ତାଙ୍କୁ କିଛି କହିଥିଲେ ମଧ୍ୟ।
