ଭବାନୀପାଟଣା,୧୩।୧: ଗୁରୁବାର କଳାହାଣ୍ଡି ଜିଲା ଜୟପାଟଣା ବ୍ଲକ ମୁଖୀଗୁଡା ଇନ୍ଦ୍ରାବତୀ ମେଗାଲିପ୍ଟ ପ୍ରକଳ୍ପର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହା ପୂର୍ବରୁ ବୁଧବାର ଭବାନୀପାଟଣା ସହର ନକଟିଗୁଡା ଛକଠାରେ ରାଜ୍ୟ ସରକାରଙ୍କ ୩ ମନ୍ତ୍ରୀ ଓ ସଙ୍ଗଠାନିକ ସମ୍ପାଦକ ତଥା ଯାଜପୁର ବିଧାୟକଙ୍କୁ ଯୁବ କଂଗ୍ରେସ କର୍ମୀମାନେ କଳାପତାକା ପ୍ରଦର୍ଶନ କରିଥିଲେ। ୩ ମନ୍ତ୍ରୀଙ୍କ ମଧ୍ୟରେ କ୍ୟାପ୍ଟେନ ଦିବ୍ୟଶଙ୍କର ମିଶ୍ର, ଟୁକୁନି ସାହୁ, ସୁଶାନ୍ତ ସିଂହ ରହିଥିବା ବେଳେ ବିଧାୟକ ଭାବେ ପ୍ରଣବ ପ୍ରକାଶ ଦାସ ରହିଥିଲେ। କଳାହାଣ୍ଡିରେ ଉନ୍ନୟନ କାର୍ଯ୍ୟ ହେଉ ନ ଥିବା ଓ ବେରୋଜଗାରୀ ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କ ବିରୋଧରେ ବିଭିନ୍ନ ସ୍ଲୋଗାନ ଦେଇଥିଲେ। ଏପରି କି କଂଗ୍ରେସ କର୍ମୀମାନେ ମନ୍ତ୍ରୀଙ୍କ କାରକେଡକୁ ପଶି ଆସି କଳାପତକା ଦେଖାଇଥିଲେ।
ପ୍ରକାଶ ଯେ, ମୁଖ୍ୟମନ୍ତ୍ରୀଙ୍କ ଗସ୍ତ ନେଇ ଦିନକ ପୂର୍ବରୁ କଳାହାଣ୍ଡିରେ ୬୯ ବିଧାୟକ ଓ ୧୦ ମନ୍ତ୍ରୀ ଡେରା ପକାଇଛନ୍ତି। ବୁଧବାର ବିଧାୟକ ଓ ମନ୍ତ୍ରୀମାନେ ମେଗାଲିପ୍ଟ ଯୋଜନାରେ ସାମିଲ ହେଉଥିବା ଜୟପାଟଣା, କୋକସରା ଓ ଧର୍ମଗଡ଼ ବ୍ଲକର ବିଭିନ୍ନ ପଞ୍ଚାୟକୁ ଯାଇ ପ୍ରକଳ୍ପର ଉପକାରିତା ବିଷୟରେ ସ୍ଥାନୀୟ ଲୋକଙ୍କୁ ସଭା ମାଧ୍ୟମରେ ସଚେତନ କରାଇଛନ୍ତି। ଏହି ଗସ୍ତ ସମୟରେ ୩ ମନ୍ତ୍ରୀ ଓ ବିଧାୟକଙ୍କୁ ଯୁବ କଂଗ୍ରେସ କର୍ମୀମାନେ କଳାପତକା ଦେଖାଇଥିଲେ।
