ଭୁବନେଶ୍ବର, ୨୬ା୭(ସୁନିତ୍ ମିଶ୍ର): ମଣିପୁରରେ ଦେଖାଦେଇଥିବା ହିଂସାକୁ ନେଇ ରାସ୍ତାକୁ ଓହ୍ଲାଇଛି କଂଗ୍ରେସ। ପ୍ରଦେଶ ଛାତ୍ର କଂଗ୍ରେସ ସଭାପତି ସୟଦ୍ ୟାସିର ନୱାଜଙ୍କ ନେତୃତ୍ୱରେ ମଣିପୁର ହିିଂସାକାଣ୍ଡ, ହତ୍ୟା, ମହିଳାଙ୍କୁ ଉଲଗ୍ନ କରାଯିବା ଘଟଣା ବିରୋଧରେ ଏକ କ୍ୟାଣ୍ଡେଲ ଶୋଭାଯାତ୍ରା କରାଯାଇଛି। ମଙ୍ଗଳବାର ସା ବେଳେ କଂଗ୍ରେସ ଭବନରୁ ଶୋଭାଯାତ୍ରା ବାହାରି ରାମମନ୍ଦିର ପର୍ଯ୍ୟନ୍ତ ଯାଇଥିଲା। ଏହି କାର୍ଯ୍ୟକ୍ରମରେ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଶରତ ପଟ୍ଟନାୟକ, ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ, ଜୟଦେବ ଜେନା ଏବଂ ବରିଷ୍ଠ ନେତାମାନେ ମଧ୍ୟ ସାମିଲ ହୋଇଥିଲେ। ରାମମନ୍ଦିର ଠାରେ ସମସ୍ତ ଛାତ୍ର କଂଗ୍ରେସର କର୍ମକର୍ତ୍ତା, କର୍ମୀ ଓ ପିସିସର ବରିଷ୍ଠ ନେତୃବୃନ୍ଦ କ୍ୟାଣ୍ଡେଲ ଲଗାଇ ମଣିପୁର ହିଂସାରେ ଜୀବନ ହରାଇଥିବା ସାଧାରଣ ଜନତାଙ୍କର ଆତ୍ମାର ସଦ୍ଗତି ପାଇଁ ପ୍ରାର୍ଥନା କରିଥିଲେ। ଶୀଘ୍ର ମଣିପୁରଠାରେ ହିଂସା ବନ୍ଦ ହେବା ପାଇଁ ଭଗବାନ୍ଙ୍କ ପାଖରେ ସେମାନେ ପ୍ରାର୍ଥନା କରିଥିଲେ।
ଏହି ଅବସରରେ ୟାସିର ନୱାଜ କହିଛନ୍ତି, ମଣିପୁର ଜଳୁଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଘୋଡ଼ ନିଦରେ ଶୋଇଛନ୍ତି। ଦଙ୍ଗା କ୍ଷତିଗ୍ରସ୍ତ ମଣିପୁରବାସୀଙ୍କ ପାଇଁ ମୋଦିଙ୍କ ହୃଦୟରେ ଦରଦ ନାହିଁ। ମଣିପୁରରେ ଓ ଭାରତରେ ମୋଦି ଶାସନରେ ମହିଳା ଅସୁରକ୍ଷିତ ଓ ଲୁଣ୍ଠିତ। ମଣିପୁର ହିଂସାକାଣ୍ଡକୁ ଭାଜପା ଆର୍ଏସ୍ଏସ୍, ଏବିଭିପି ତଥା ମୋଦି ସରକାର ଉସୁକାଉଛନ୍ତି। ମଣିପୁର ହିଂସାକାଣ୍ଡର ଦିନକ ପରେ ୨ ଜଣ ମହିଳାଙ୍କ ଉଲଗ୍ନ କରି ରାସ୍ତାରେ ଚଲାଇବା ସହ ଗଣବଳାତ୍କାର କରାଯାଇଥିଲା। ଏହି ଘଟଣାରେ ମଣିପୁର ପୋଲିସ ବଳାତ୍କାରୀ ଓ ଦଙ୍ଗାକାରୀଙ୍କ ସପକ୍ଷରେ ରହିଛନ୍ତି। ଏହି ଘଟଣାକୁ ଚପାଇ ଦିଆଗଲା ଏବଂ ୨ ମାସ ପରେ ଘଟଣାର ପର୍ଦ୍ଦାଫାଶ ହେଲାପରେ ସାରା ଦେଶ କେନ୍ଦ୍ର ଏବଂ ମଣିପୁର ସରକାରଙ୍କର ଅସଲ ସ୍ବରୂପ ଦେଖିଲେ। ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ମଣିପୁର ଦଙ୍ଗାକୁ ପ୍ରୋତ୍ସାହନ ଦେଉଥିବା ଭଳି ଜଣାପଡ଼ୁଛି। ଦିଲ୍ଲୀରେ ମହିଳା ମଲ୍ଲଯୋଦ୍ଧାଙ୍କୁ ଅତ୍ୟାଚାର ଘଟଣା, ଉନାଓ, କାଠୁଆ, ହାଥରାସ୍, ଯୋଧପୁର ପ୍ରଭୂତି ଘଟଣାରେ ମହିଳା ବଳାତ୍କାର ଓ ହତ୍ୟା ପ୍ରଭୃତିରେ ଭାଜପାର ଭୂମିକାକୁ ସାରା ଦେଶ ନିନ୍ଦା କରୁଛି। ମହିଳାମାନଙ୍କର ସୁରକ୍ଷା ପ୍ରତି ମୋଦି ସରକାର ଉଦାସୀନ ବୋଲି ସେ କହିଛନ୍ତି।
