ଚେନ୍ନାଇ,୧୮।୨ : ତାମିଲନାଡୁର କୋଏମ୍ବାଟୁରର ଇଶା ଯୋଗ କେନ୍ଦ୍ରରେ ମହାଶିବରାତ୍ରି ଉତ୍ସବରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଯୋଗଦେବେ। ଦେଶର ବିଭିନ୍ନ ସ୍ଥାନରୁ ଜଣାଶୁଣା କଳାକାରମାନେ ମଧ୍ୟ ୧୧୨ ଫୁଟର ଆଦିଯୋଗୀଙ୍କ ସମ୍ମୁଖରେ ରାତିସାରା କାର୍ଯ୍ୟକ୍ରମ ପ୍ରଦର୍ଶନ କରିବେ। ଧ୍ୟାନଲିଙ୍ଗରେ ପଞ୍ଚଭୁତ ଆରାଧନା ଠାରୁ ଆରମ୍ଭ କରି ଲିଙ୍ଗ ଭୈରବୀ ମହାଯାତ୍ରା ଏଠାରେ ସମ୍ପନ୍ନ ହେବ। ଏହା ପରେ ସଦଗୁରୁଙ୍କ ବକ୍ତବ୍ୟ, ମଧ୍ୟରାତ୍ରି ଧ୍ୟାନ ଏବଂ ଚମତ୍କାର ଆଦିଯୋଗୀ ଦିବ୍ୟ ଦର୍ଶନ, ଏକ ଥ୍ରୀଡି ପ୍ରୋଜେକଶନ ଭିଡିଓ ଇମେଜିଙ୍ଗ ଶୋ ଦ୍ୱାରା କରାଯିବ ।
ଏହି ଅବସରରେ ତାମିଲନାଡୁରେ ପହଞ୍ଚିଥିବା ରାଷ୍ଟ୍ରପତି ଦ୍ରୌପଦୀ ମୁର୍ମୁ ଶନିବାର ମଦୁରାଇର ମୀନାକ୍ଷୀ ସୁନ୍ଦରଶ୍ୱରାୟ ମନ୍ଦିରରେ ପ୍ରାର୍ଥନା କରିଛନ୍ତି।
ଏହି କାର୍ଯ୍ୟକ୍ରମରେ ରାଜସ୍ଥାନୀ ଲୋକ ଗାୟକ ମାମେ ଖାନ, ପୁରସ୍କାରପ୍ରାପ୍ତ ସୀତାରବାଦକ ନୀଳାଦ୍ରି କୁମାର, ଟଲିଉଡର ଗାୟକ ରାମ ମିରିୟାଲା, ତାମିଲ ପାର୍ଶ୍ୱ ଗାୟକ ଭେଲମୁରୁଗାନ, ମଙ୍ଗଲୀ, କୁତଲେ ଖାନ ଏବଂ ବଙ୍ଗୀୟ ଲୋକ ଗାୟକ ଅନନ୍ୟା ଚକ୍ରବର୍ତ୍ତୀ ଏହି କାର୍ଯ୍ୟକ୍ରମରେ ଯୋଗଦେବେ। ଏହି ସମାରୋହ ୧୬ ଟି ଭାଷାର ସମସ୍ତ ପ୍ରମୁଖ ଚ୍ୟାନେଲରେ ପ୍ରସାରଣ ହେବ।
