ସମ୍ବଲପୁର,୧୭।୮(ବ୍ୟୁରୋ): ହୀରାକୁଦ ଜଳଭଣ୍ଡାରର ୪୦ ଗେଟ୍ ଦେଇ ବନ୍ୟାଜଳ ନିଷ୍କାସନ ହେଉଛି। ଅନ୍ୟପଟେ ମଙ୍ଗଳବାର ସମ୍ବଲପୁର ମହାନଗର ନିଗମର କେତେକ ଅଞ୍ଚଳରେ ବର୍ଷା ହୋଇଛି। ଏସ୍ଏମ୍ସି ପକ୍ଷରୁ ସମ୍ଭାବ୍ୟ ବନ୍ୟା ମୁକାବିଲା ପାଇଁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏସ୍ଏମ୍ସି କମିଶନର ପ୍ରଦୀପ କୁମାର ସାହୁଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା। ଏଥିରେ ବିଭିନ୍ନ ବିଭାଗର ଅଧିକାରୀଙ୍କ ସହ ସାମାଜିକ ଅନୁଷ୍ଠାନର ସଦସ୍ୟ ଉପସ୍ଥିତ ଥିଲେ। ସହରରେ ବନ୍ୟା ପରିସ୍ଥିତି ଉପୁଜିଲେ କିଭଳି ମୁକାବିଲା କରାଯିବ ସେ ନେଇ ଆଲୋଚନା କରାଯାଇଥିଲା। ଏ ସମ୍ପର୍କରେ କମିଶନର ସାହୁ କହିଛନ୍ତି, ଜଳଭଣ୍ଡାରରେ ୪୦ ଗେଟ୍ ଦେଇ ଜଳ ନିଷ୍କାସନ କରାଯାଉଛି। ଏବେ ସହରରେ ବର୍ଷା ପରିମାଣ କମିଛି। ତେଣୁ ଭୟଭୀତ ହେବାର ନାହିଁ। ହେଲେ ମଧ୍ୟ ସମସ୍ତ ପ୍ରସ୍ତୁତି କରାଯାଇଛି। ୭ ଗୋଟି ବନ୍ୟା ଆଶ୍ରୟସ୍ଥଳ ଏବେ ମଧ୍ୟ ଖୋଲାରହିଛି। ଗତ ୩ ଦିନ ଭିତରେ ବର୍ଷାଜଳ ଜମିରହିଥିଲା। ପାଣି ପମ୍ପ ଲଗାଇ ତଳି ଅଞ୍ଚଳରୁ ପାଣି ନିଷ୍କାସନ କରାଯାଇଛି। ସହର ଭିତରେ ନଦୀ ଓ ନାଳରେ ଜ ଳ ପ୍ରବାହ କମିଯାଇଛି। ସହର ଭିତରେ ବର୍ଷା ନ ହେଲେ ଜଳ ଭଣ୍ଡାରରୁ ୫୦ ଗେଟ୍ ଦେଇ ଜଳ ନିଷ୍କାସନ କରାଗଲେ ମଧ୍ୟ ମୁକାବିଲା କରାଯାଇ ପାରିବ। ୧୫ ଗୋଟି ଆଶ୍ରୟସ୍ଥଳ ଖୋଲିବାକୁ ସ୍ଥିର କରାଯାଇଛି। ଆଶ୍ରୟ ସ୍ଥଳରେ ସମସ୍ତ ଅତ୍ୟାବଶ୍ୟକ ସାମଗ୍ରୀ ମହଜୁଦ ରଖାଯାଇଛି। ଅନ୍ୟପଟେ ଜିଲାପାଳ ଅନନ୍ୟା ଦାସ ମଧ୍ୟ ବନ୍ୟା ପରିସ୍ଥିତି ନେଇ ସମୀକ୍ଷା କରିଛନ୍ତି। ଦୁଇଦିନ ହେଲା ଲଗାତର ଭାବେ ବନ୍ୟା ଆଶ୍ରୟ ସ୍ଥଳ ପରିଦର୍ଶନ କରିଛନ୍ତି। ବିପନ୍ନମାନଙ୍କ ସହ ଆଲୋଚନା କରିଥିବା କମିଶନର କହିଛନ୍ତି। ଅନ୍ୟମାନଙ୍କ ମଧ୍ୟରେ ଜଳ ସମ୍ପଦ ବିଭାଗ ନିର୍ବାହୀ ଯନ୍ତ୍ରୀ ପ୍ରମୋଦ ପଣ୍ଡା ଓ ଅନ୍ୟ ଅଧିକାରୀ ଉପସ୍ଥିତ ଥିଲେ।
