ଫୁଲବାଣୀ ଅଫିସ,୨୬।୮: କନ୍ଧମାଳ ଜିଲାରେ ଆନୁଷ୍ଠାନିକ ପ୍ରସବ ପାଇଁ ଜିଲାପାଳ ଡା.ବୃନ୍ଦା ଡି ପଦକ୍ଷେପ ନେଉଛନ୍ତି। ଘରେ ପ୍ରସବ ନ କରାଇ ଡାକ୍ତରଖାନାରେ କରାଇବା ନିମନ୍ତେ ଗର୍ଭବତୀଙ୍କୁ ନେବା ପାଇଁ ଭ୍ୟାନ ବ୍ୟବସ୍ଥା କରିଛନ୍ତି। ହେଲେ ଜଣେ ଗର୍ଭବତୀଙ୍କୁ ଭ୍ୟାନରେ ମାଡ ମରାଯାଇଥିବା ଅଭିଯୋଗ ହୋଇଛି। ଭ୍ୟାନରେ ଡେଲିଭରି କାର୍ଯ୍ୟରେ ନିୟୋଜିତ ଥିବା ଜଣେ ମହିଳା ମାଡ଼ ମାରିଥିବା ନେଇ ମହିଳା ଜଣକ ଜିଲା ଜନସ୍ବାସ୍ଥ୍ୟ ଅଧିକାରୀଙ୍କୁ ଲିଖିତ ଭାବେ ଜଣାଇଛନ୍ତି।
ଫିରିଙ୍ଗିଆ ବ୍ଲକ ଘାଟିସାହିର ସନ୍ଧ୍ୟା ନାୟକଙ୍କ ଗତ ୨୫ ତାରିଖ ରାତିରେ ପ୍ରସବ ବେଦନା ହୋଇଥିଲା। ତାଙ୍କୁ ଡାକ୍ତରଖାନା ନେବାକୁ ଆଶାକର୍ମୀ ଏବଂ ସ୍ଥାନୀୟ ଲୋକେ ଫିରିଙ୍ଗିଆ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଥିବା ଡେଲିଭରି ଭ୍ୟାନ ସହ ଯୋଗାଯୋଗ କରିଥିଲେ। ସନ୍ଧ୍ୟାଙ୍କ ଘରଠାରୁ ୫୦୦ ମିଟର ଦୂରରେ ଡାକ୍ତରଖାନା। ହେଲେ ଘଣ୍ଟାଏ ବିଳମ୍ବରେ ଭ୍ୟାନ୍ ପହଞ୍ଚିଥିଲା। ସନ୍ଧ୍ୟାଙ୍କୁ ଭ୍ୟାନକୁ ନିଆଯିବା ପରେ ବେଦନା ଅସହ୍ୟ ହେବାରୁ ସେ ଚିତ୍କାର କରିଥିଲେ। ଏହି ସମୟରେ ଉକ୍ତ ଭ୍ୟାନରେ ଥିବା ମହିଳା ସ୍ବାସ୍ଥ୍ୟକର୍ମୀ ସମସ୍ତଙ୍କ ସମ୍ମୁଖରେ ତାଙ୍କୁ ମାଡ ମାରିଥିବା ଅଭିଯୋଗ ହୋଇଛି। ଫିରିଙ୍ଗିଆ ଡାକ୍ତରଖାନାରେ ସନ୍ଧ୍ୟାଙ୍କର ଏକ ପୁଅ ଜନ୍ମ ନେଇଛି ା ଭ୍ୟାନରେ ମାଡ଼ ମରାଯାଇଥିବାରୁ ତାଙ୍କ ମର୍ଯ୍ୟାଦା ହାନୀ ହୋଇଛି । ତୁରନ୍ତ ସମ୍ପୃକ୍ତ ମହିଳା ସ୍ବାସ୍ଥ୍ୟକର୍ମୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି।
