ଜେନେଭା/ନୂଆଦିଲ୍ଲୀ, ୬।୯: ପୂର୍ବତନ ସ୍ବାସ୍ଥ୍ୟ ସଚିବ ପ୍ରୀତି ସୁଦନ ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲୁଏଚ୍ଓ) ସ୍ବତନ୍ତ୍ର ଦଳରେ ସାମିଲ ହୋଇଛନ୍ତି। କରୋନା ମହାମାରୀର ପ୍ରସ୍ତୁତି ଏବଂ ପ୍ରତିକ୍ରିୟା ସମ୍ପର୍କରେ ଏହି ସ୍ବତନ୍ତ୍ର ଦଳ କାର୍ଯ୍ୟ କରିବ। ଏହି ୧୧ ଜଣିଆ ଦଳକୁ ନ୍ୟୁଜିଲାଣ୍ଡର ପୂର୍ବତନ ପ୍ରଧାନମନ୍ତ୍ରୀ ହେଲେନ୍ କ୍ଲାର୍କ ଏବଂ ଲାଇବେରିଆର ପୂର୍ବତନ ରାଷ୍ଟ୍ରପତି ଏଲନ୍ ଜନସନ୍ ଚୟନ କରିଛନ୍ତି। ପ୍ରୀତି ଚୟନ ନେଇ ଭାରତ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇ ନାହିଁ। ଭାରତ ଏନେଇ ନୀରବତା ଅବଲମ୍ବନ କରିଛି। ଭାରତ ପକ୍ଷରୁ ଡବ୍ଲୁଏଚ୍ଓର ଏହି ପଦବୀ ପାଇଁ ପୂର୍ବତନ ବହିର୍ବ୍ୟାପାର ସଚିବ ବିଜୟ ଗୋଖଲେଙ୍କ ନାମ ସୁପାରିଶ କରାଯାଇଥିଲା। ଏନେଇ ଅନୁଷ୍ଠିତ ହୋଇଥିବା ବୈଠକରେ ଭାରତକୁ ନିଜ ପ୍ରାର୍ଥୀଙ୍କୁ ଚୟନ କରିବାକୁ କୁହାଯାଇଥିଲା। ତେବେ ଭାରତ ପକ୍ଷରୁ ଦିଆଯାଇଥିବା ନାମ ପରିବର୍ତ୍ତେ ପ୍ରୀତିଙ୍କୁ ବୈଠକର ଅଧ୍ୟକ୍ଷ ଚୟନ କରିଥିଲେ। ଦଳର ସଦସ୍ୟଙ୍କ ଚୟନର ଚୂଡ଼ାନ୍ତ ଅଧିକାର ଅଧ୍ୟକ୍ଷଙ୍କ ପାଖରେ ଥିବାରୁ ସେ ଶ୍ରେଷ୍ଠ ଦଳ ଗଠନକୁ ଗୁରୁତ୍ୱ ଦେଇଥିବା ଏକ ପ୍ରେସ୍ ବିବୃତିରେ ପ୍ରକାଶ ପାଇଛି। ୧୨୦ଜଣ ପ୍ରାର୍ଥୀଙ୍କ ଯୋଗ୍ୟତା ଯାଞ୍ଚ୍ ପରେ ସ୍ବତନ୍ତ୍ର ଦଳର ସଦସ୍ୟଙ୍କ ନାମ ତାଲିକା ପ୍ରକାଶ କରାଯାଇଥିଲା। ମହାମାରୀ ସଙ୍କଟ ସମୟରେ ପ୍ରୀତି ଭାରତ ସରକାରଙ୍କ ସହାୟତା କରି ପାରିବେ ବୋଲି ହେଲେନ କ୍ଲାର୍କ ବୈଠକରେ ସୂଚନା ଦେଇଛନ୍ତି।
