କେନ୍ଦ୍ରାପଡ଼ା ଅଫିସ, ୧।୯: ଭାରତର ପୂର୍ବତନ ରାଷ୍ଟ୍ରପତି ଭାରତ ରନତ୍ ପ୍ରଣବ ମୁଖାର୍ଜୀଙ୍କର ସୋମବାର ଦେହାନ୍ତ ପରେ କେନ୍ଦ୍ରାପଡ଼ା ଜିଲାର ଉପାନ୍ତ ଅଞ୍ଚଳରେ ବହୁ ଲୋକ ଶୋକ ବ୍ୟକ୍ତ କରିଛନ୍ତି। ମହାକାଳପଡ଼ା ରାମନଗର ଗ୍ରାମର ତରୁଣକାନ୍ତି କାଞ୍ଜିଲାଲ କହିଛନ୍ତି, ୧୯୯୯ ମହାବାତ୍ୟା ପରେ ପ୍ରଣବଦା କେନ୍ଦ୍ରାପଡ଼ା ଆସିଥିଲେ। ସେ ସମୟରେ ସେ ଅଖିଳ ଭାରତ କଂଗ୍ରେସ କମିଟି (ଏଆଇସିସି) ର ସାଧାରଣ ସମ୍ପାଦକ ଥିଲେ। ମହାବାତ୍ୟାର କରୁଣ ଦୃଶ୍ୟ ଦେଖିବା ପାଇଁ ବରଜ, ବାହାକୁଦ, ବିବି କଲୋନୀ, ଶବରପଡା ଆଦି ଅଞ୍ଚଳ ଗସ୍ତ କରିଥିଲେ। ଏହି ସମୟରେ ସେ ତରୁଣକାନ୍ତିଙ୍କ ବାଇକ୍ରେ ବୁଲାବୁଲି କରିଥିଲେ। ଏଥିସହିତ ତାଙ୍କ ଘରେ ଭାତ ମାଛ ତରକାରି ଖାଇଥିଲେ ା ପ୍ରଣବଙ୍କ ସ୍ବାସ୍ଥ୍ୟ ଖରାପ ଖବର ଜାଣିବା ପରେ ତାଙ୍କ ଆରୋଗ୍ୟ ପାଇଁ ଗତ ଅଗଷ୍ଟରେ ତରୁଣକାନ୍ତି ଯଜ୍ଞ କରିଥିଲେ ବୋଲି କହିଛନ୍ତି। ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା ତାଙ୍କର ସ୍ମୃତିଚାରଣ କରି କହିଛନ୍ତି, ଜଣେ ଭଲ ମଣିଷ ଏ ଦୁନିଆରୁ ଚାଲିଗଲେ। ପୂର୍ବତନ ବିଧାୟକ ଅଂଶୁମାନ ମହାନ୍ତି ଶୋକ ପ୍ରକଟ କରି ପ୍ରଣବଦାଙ୍କର କେନ୍ଦ୍ରାପଡ଼ା ଜିଲା ଓ ଓଡିଶା ପ୍ରତି ଏକ ସ୍ବତନ୍ତ୍ର ଆବେଗ ଥିଲା ଏବଂ ଜଣେ ଦରଦୀ ଲୋକଙ୍କୁ ହରାଇଲୁ ବୋଲି କହିଥିଲେ।
