ନୂଆଦିଲ୍ଲୀ,୧୩ା୯: ଦେଶର ବିଭିନ୍ନ ସହରରେ ଶୀତଦିନେ ବାୟୁ ପ୍ରଦୂଷଣ ଉତ୍କଟ ରୂପ ଧାରଣ କରୁଥିବାବେଳେ ଦୀପାବଳି ପରେ ସ୍ଥିତି ଗମ୍ଭୀର ହୋଇଥାଏ। ଏହାକୁ ଦୃଷ୍ଟିରେ ରଖି କିଛିବର୍ଷ ହେଲା ଦିଲ୍ଲୀ ଓ ଜାତୀୟ ରାଜଧାନୀ ଅଞ୍ଚଳ (ଏନ୍ସିଆର୍)ରେ ବାଣ ଫୁଟାଇବା ଉପରେ କଟକଣା ଜାରି କରାଯାଇଛି। ତେବେ ଏହି କଟକଣା କେବଳ ଦିଲ୍ଲୀ-ଏନ୍ସିଆର୍ ପାଇଁ ସୀମିତ କାହିଁକି ବୋଲି ସୁପ୍ରିମକୋର୍ଟ ଶୁକ୍ରବାର ପ୍ରଶ୍ନ କରିଛନ୍ତି। ଯଦି ସ୍ବଚ୍ଛ ବାୟୁ ଜାତୀୟ ରାଜଧାନୀର ସମ୍ଭ୍ରାନ୍ତ ବାସିନ୍ଦାମାନଙ୍କ ଅଧିକାର, ତେବେ ତାହା ସାରା ଦେଶର ନାଗରିକଙ୍କ ପାଇଁ ଲାଗୁହେବା ଆବଶ୍ୟକ ବୋଲି ସୁପ୍ରିମକୋର୍ଟ କହିଛନ୍ତି।
ଜାତୀୟ ରାଜଧାନୀ ଅଞ୍ଚଳରେ ବାଣ ନିୟନ୍ତ୍ରଣ ସମ୍ପର୍କିତ କେତେକ ପିଟିଶନ୍ର ଶୁଣାଣି କରି ପ୍ରଧାନ ବିଚାରପତି ବି.ଆର୍. ଗବଇ ଏବଂ ଜଷ୍ଟିସ୍ କେ. ବିନୋଦ ଚନ୍ଦ୍ରନଙ୍କ ଖଣ୍ଡପୀଠ କହିଥିଲେ, ଯଦି ଏନ୍ସିଆର୍ ଅନ୍ତର୍ଗତ କେତେକ ସହର ସ୍ବଚ୍ଛ ବାୟୁ ପାଇବାକୁ ହକ୍ଦାର ତେବେ ଅନ୍ୟ ସହରର ଜନସାଧାରଣ ପାଇବେ ନାହିଁ କାହିଁକି? ଏଥିପାଇଁ ଯଦି କୌଣସି ନୀତି କାର୍ଯ୍ୟକାରୀ ହେଉଛି, ତେବେ ତାହା ସାରା ଦେଶ ଲାଗି ହେବା ଆବଶ୍ୟକ। ଦେଶର ସମ୍ଭ୍ରାନ୍ତ ବ୍ୟକ୍ତିମାନେ ରହୁଥିବା କାରଣରୁ କେବଳ ଦିଲ୍ଲୀ ପାଇଁ ଏକ ନୀତି ପ୍ରଣୟନ କରାଯାଇପାରିବ ନାହଁି ବୋଲି ଖଣ୍ଡପୀଠ କହିଛନ୍ତି। ସିଜେଆଇ କହିଥିଲେ, ସେ ଗତବର୍ଷ ଶୀତଦିନେ ଅମୃତସର ଯାଇଥିଲେ। ସେଠାରେ ପ୍ରଦୂଷଣ ଦିଲ୍ଲୀଠାରୁ ଆହୁରି ଖରାପ। ଯଦି ବାଣ ନିଷେଧ ହେଉଛି, ତେବେ ସାରା ଦେଶରେ ନିଷେଧ ହେଉ ବୋଲି ସିଜେଆଇ ଟିପ୍ପଣୀ ଦେଇଛନ୍ତି।
ବରିଷ୍ଠ ଆଇନଜୀବୀ ତଥା ଆମିକସ୍ କ୍ୟୁରି ଅପରାଜିତା ସିଂ କହିଥିଲେ, ସମ୍ଭ୍ରାନ୍ତମାନେ ସେମାନଙ୍କ ଯତ୍ନ ନେଉଛନ୍ତି। ପ୍ରଦୂଷଣ ବେଳେ ସେମାନେ ଦିଲ୍ଲୀ ବାହାରକୁ ଯାଆନ୍ତି। ଏହି ପ୍ରସଙ୍ଗରେ ବାୟୁ ମାନ ପରିଚାଳନା ଆୟୋଗରୁ ସବିଶେଷ ରିପୋର୍ଟ ସଂଗ୍ରହ କରିବାକୁ ଖଣ୍ଡପୀଠ କେନ୍ଦ୍ର ସରକାରଙ୍କ ପକ୍ଷରୁ ଉପସ୍ଥିତ ଥିବା ଅତିରିକ୍ତି ସଲିସିଟର ଜେନେରାଲ ଐଶ୍ୱର୍ଯ୍ୟା ଭଟିଙ୍କୁ କହିଥିଲେ। ପ୍ରଦୂଷଣ ହ୍ରାସ ପାଇଁ ‘ସବୁଜ ବାଣ’ର ବ୍ୟବହାର୍ଯ୍ୟତା ଉପରେ ନ୍ୟାଶନାଲ ଏନ୍ଭାଇରନ୍ମେଣ୍ଟାଲ ଇଞ୍ଜିନିୟରିଂ ରିସର୍ଚ୍ଚ ଇନ୍ଷ୍ଟିଚ୍ୟୁଟ୍ (ଏନ୍ଇଇଆର୍ଆଇ) ପରୀକ୍ଷା କରୁଥିବା ଭଟି କହିଥିଲେ। ବାଣ ପ୍ରସ୍ତୁତି ପାଇଁ ଅନୁମତିଯୋଗ୍ୟ ରାସାୟନିକ ସଂରଚନା ସମ୍ପର୍କରେ ଏନ୍ଇଇଆର୍ଆଇ ଲେଖିଲେ, ତଦନୁଯାୟୀ ବାଣ ଡିଜାଇନ୍ କରାଯିବ ବୋଲି ବାଣ ଉତ୍ପାଦନକାରୀଙ୍କ ପକ୍ଷର ଓକିଲ କହିଥିଲେ। କଟକଣା ଥିବା ସତ୍ତ୍ୱେ କର୍ତ୍ତୃପକ୍ଷ ବାଣ ଉତ୍ପାଦନକାରୀଙ୍କ ଲାଇସେନ୍ସ ରଦ୍ଦ କରୁଥିବା ନେଇ ବରିଷ୍ଠ ଆଇନଜୀବୀ କେ. ପରମେଶ୍ୱର ଉଦ୍ବେଗ ପ୍ରକାଶ କରିଥିଲେ। ମାମଲାର ପରବର୍ତ୍ତୀ ଶୁଣାଣି ଆସନ୍ତା ୨୨ ତାରିଖକୁ ଧାର୍ଯ୍ୟ କରାଯାଇଛି।
