ଖୋର୍ଦ୍ଧା ଅଫିସ,୨୧ା୧: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଗାଁଠୁ ସହର ସବୁଠି ରାଜନୀତି ସରଗରମ ରହିଛି। ନିର୍ବାଚନୀ ବୈତରଣୀ ପାର ହେବା ଲାଗି ତିନି ପ୍ରମୁଖ ଦଳ ବିଜେଡି, କଂଗ୍ରେସ ଏବଂ ଭାଜପା ରଣନୀତି ପ୍ରସ୍ତୁତିରେ ଲାଗିପଡ଼ିଛନ୍ତି। ଏଥର ପ୍ରାର୍ଥୀଙ୍କ ଅପେକ୍ଷା ହେଭିୱେଟ ନେତା ଓ ବିଧାୟକଙ୍କ ମଧ୍ୟରେ ଟକ୍କର ହେବ ବୋଲି ଚର୍ଚ୍ଚା ହେଉଛି। ୨୦୨୨ ନିର୍ବାଚନ ବିଧାୟକମାନଙ୍କ ପାଇଁ ଭାଗ୍ୟ ପରୀକ୍ଷା। ଏହି ପରୀକ୍ଷାରେ ଯେଉଁମାନେ ସଫଳତାର ସହ ଉତ୍ତୀର୍ଣ୍ଣ ହେବେ ସେମାନଙ୍କ ପାଇଁ ୨୦୨୪ ବିଧାନସଭା ନିର୍ବାଚନ ପାଇଁ ଟିକେଟ ମିଳିପାରେ ବୋଲି କୁହାଯାଉଛି।
୨୦୧୨ରେ ୩୦ଟି ଜୋନରୁ ବିଜେଡି ୨୫ଟିରେ ଜିତିଥିବାବେଳେ କଂଗ୍ରେସ ଗୋଟିଏ, ଭାଜପା ୨ ଏବଂ ସ୍ବାଧୀନ ପ୍ରାର୍ଥୀ ୨ଟି ଆସନ ଅକ୍ତିଆର କରିଥିଲେ। ୨୦୧୭ ନିର୍ବାଚନରେ ବିଜେଡି ୨୦ଟି, ଭାଜପା ୧୦ଟିରେ ଜିତିଥିଲା। କଂଗ୍ରେସ ଖାତା ଖୋଲିପାରି ନ ଥିଲା। ୨୦୧୯ ସାଧାରଣ ନିର୍ବାଚନରେ ଖୋର୍ଦ୍ଧା ଜିଲାର ୮ଟି ବିଧାନସଭା କ୍ଷେତ୍ରରୁ ଜଟଣୀକୁ ବାଦ୍ ଦେଲେ ବିଜେଡି ଅନ୍ୟ ଆସନରେ ବିଜୟ ଲାଭ କରିଥିଲା। ଚଳିତ ପଞ୍ଚାୟତ ନିର୍ବାଚନରେ ବିଜେଡି ଖୋର୍ଦ୍ଧା ଜିଲାରେ ସବୁ ଆସନ ଅକ୍ତିଆର ଯୋଜନାରେ ରହିଛି। ପ୍ରାର୍ଥୀଙ୍କ ସପକ୍ଷରେ ପ୍ରଚାର ପାଇଁ ବିଜେଡିର ହେଭିୱେଟ ନେତା, ବିଧାୟକମାନେ ଜୋରସୋର୍ ଲାଗିପଡ଼ିଛନ୍ତି। ଏଥର ଡିଜିଟାଲ ପ୍ଲାଟଫର୍ମ, ସୋସିଆଲ ମିଡିଆ, ବ୍ୟାନର, ପୋଷ୍ଟରରେ ପ୍ରଚାର ଚାଲିବ। ନିର୍ବାଚନ ଦୌଡ଼ରେ ବିଜେଡି ଆଗରେ ରହିଛି। ବେଗୁନିଆ ନିର୍ବାଚନମଣ୍ଡଳୀର କଂଗ୍ରେସ ନେତା ପ୍ରଦୀପ ସାହୁ, ଖୋର୍ଦ୍ଧା ଅଞ୍ଚଳର ଟାଣୁଆ ନେତା ବାବୁ ଜୟସିଂ, ରାମ ମହାପାତ୍ର, ଚିଲିକା ଭାଜପା ବ୍ଲକ ସଭାପତି ଦମୟନ୍ତୀ ବସ୍ତି ପ୍ରମୁଖ ବିଜେଡିରେ ସାମିଲ ହୋଇଛନ୍ତି। ବିଜେଡିରେ ଆଶାୟୀଙ୍କ ଲମ୍ବା ତାଲିକା ରହୁଥିବାରୁ ପ୍ରାର୍ଥୀ ଚୟନକୁ ନେଇ ଅସନ୍ତୋଷ ସୃଷ୍ଟି ହେଲେ ଏହା ଦଳ ପାଇଁ ସମସ୍ୟା ହୋଇପାରେ। ଅନ୍ୟପକ୍ଷେ ଭାଜପା ପାଇଁ ଏମ୍ପି ଅପରାଜିତା ଷଡ଼ଙ୍ଗୀ ମଙ୍ଗ ଧରିଛନ୍ତି। ତାଙ୍କ ଗୋଷ୍ଠୀରେ ମହିଳା ଓ ଯୁବପିଢ଼ି ରହିଛନ୍ତି। ତେବେ ଖୋର୍ଦ୍ଧା ଜିଲା ଭାଜପାରେ ଅନ୍ତଃକନ୍ଦଳ ରହିଛି।
୨୦୧୭ରେ ଭାଜପା ୧୦ଟି ଜିଲା ପରିଷଦ ଆସନ ହାତେଇଥିବାବେଳେ ଏଥର କେତେଦୂର ସଫଳ ହେବ ତାହା ଆଗକୁ ଜଣାପଡ଼ିବ। ସେହିପରି କଂଗ୍ରେସ ପକ୍ଷରୁ ଜଟଣୀ ବିଧାୟକ ସୁରେଶ ରାଉତରାୟ ମଙ୍ଗ ଧରିଛନ୍ତି। ଏଥର କଂଗ୍ରେସ ପୂର୍ବପେକ୍ଷା ଭଲ ପ୍ରଦର୍ଶନ କରିବା ପାଇଁ କସରତ ଜାରି ରଖିଛି। ଖୋର୍ଦ୍ଧା ଉପଖଣ୍ଡରେ ବିଜେଡିକୁ ଭାଜପା ଓ କଂଗ୍ରେସ କଡ଼ା ଟକ୍କର ଦେବେ। ଜଟଣୀ ଗଡ଼ରେ ସୁରେଶ ରାଉତରାୟ ଏବଂ ବିଭୂତି ବଳୱନ୍ତରାୟ ଉଭୟ ନିଜ ସମ୍ମାନ ରକ୍ଷା ପାଇଁ ପ୍ରାଣ ମୂର୍ଚ୍ଛା ଉଦ୍ୟମ ଜାରି ରଖିଛନ୍ତି। ବରିଷ୍ଠ କଂଗ୍ରେସ ନେତା ତଥା ଜଟଣୀ ବିଧାୟକ ସୁରେଶ ରାଉତରାୟ କହିଛନ୍ତି, ଶାସକ ଦଳ ଦୁର୍ନୀତିରେ ବୁଡ଼ିଛି। ଦରଦାମ୍, ତୈଳଦର ଅତ୍ୟଧିକ ବୃଦ୍ଧି ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ପଞ୍ଚାୟତ ନିର୍ବାଚନରେ ୩୦ଟି ଜୋନ୍ରେ ଦଳ ପ୍ରାର୍ଥୀ ଦେବ। ତୃଣମୂଳ ସ୍ତର ପର୍ଯ୍ୟନ୍ତ ଲୋକଙ୍କ ନିକଟକୁ ଯିବ। ୨୦୧୭ ନିର୍ବାଚନରେ ଦଳର କୌଣସି ପ୍ରାର୍ଥୀ ଜିତି ନ ଥିଲେ। ମାତ୍ର ଚଳିତ ନିର୍ବାଚନରେ ୧୪ଟି ଆସନରେ କଂଗ୍ରେସ ଜିତିବ ବୋଲି ଆଶା ରହିଛି। ଅନ୍ୟପକ୍ଷରେ ଭାଜପା ନେତା ଲୋତକ ପଟ୍ଟନାୟକ କହିଲେ, ଗତ ନିର୍ବାଚନରେ ଦଳ ୧୦ଟି ଆସନରେ ଜିତିଥିଲା। ଚଳିତ ବର୍ଷ ଅଧିକ ଜିଲା ପରିଷଦ ଆସନରେ ବିଜୟ ଲାଭ କରିବୁ ବୋଲି ଆଶା ରହିଛି। କେନ୍ଦ୍ର ସରକାରଙ୍କ ବିଭିନ୍ନ ଜନକଲ୍ୟାଣ ଯୋଜନାକୁ ନେଇ ଭାଜପା ରଣାଙ୍ଗନକୁ ଓହ୍ଲାଇବ। ଡିଜିଟାଲ ଓ ସୋସିଆଲ ପ୍ଲାଟଫର୍ମରେ ଜୋରଦାର ପ୍ରଚାର କରାଯିବ। ସୂଚନାଯୋଗ୍ୟ, ୨୦୧୭ ନିର୍ବାଚନରେ ଖୋର୍ଦ୍ଧାର ୩ଟି ଜୋନ୍ରେ ବିଜେଡି, ଚିଲିକାର ୩ଟି ଜୋନରେ ଭାଜପା, ଜଟଣୀର ୨ଟି ଜୋନରେ ବିଜେଡି, ଟାଙ୍ଗୀର ୪ଟି ଜୋନ ମଧ୍ୟରୁ ଗୋଟିକରେ ଭାଜପା ଏବଂ ୩ଟିରେ ବିଜେଡି ବିଜୟ ଲାଭ କରିଥିଲା। ବାଣପୁରର ୩ଟି ଜୋନରୁ ବିଜେଡି ୧ ଓ ଭାଜପା ୨, ବାଲିଅନ୍ତାରୁ ବିଜେଡି ୩, ବାଲିପାଟଣାରୁ ଭାଜପା ୧ ବିଜେଡି ୨, ବେଗୁନିଆରୁ ଭାଜପା ୨, ବିଜେଡି ୧, ବୋଲଗଡ଼ରୁ ବିଜେଡି ୨, ଭାଜପା ୧ ଏବଂ ଭୁବନେଶ୍ୱର ବ୍ଲକର ୩ଟି ଜୋନରେ ବିଜେଡି ପ୍ରାର୍ଥୀ ବିଜୟ ଲାଭ କରିଥିଲେ।
