ଯାଜପୁର ଅଫିସ,୭ା୪: ଯାଜପୁର ଜିଲା ପାଣିକୋଇଲି ଥାନା ଭିତରେ ପୋଲିସ ଅଧିକାରୀ ଓ କର୍ମଚାରୀଙ୍କ ନାଗିନ ଡ୍ୟାନ୍ସ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ନିଜ ୟୁନିଫର୍ମ(ଖାକି)କୁ ନେଇ ଗର୍ବ ଅନୁଭବ କରୁଥିବା ପୋଲିସ ଅଧିକାରୀମାନେ ସେଥିରେ ଅବିର ଢାଳିହୋଇ ନୃତ୍ୟ କରିବା ଘଟଣାକୁ ବିଭିନ୍ନ ମହଲରେ ସମାଲୋଚନା କରାଯାଇଛି ।
ଏହି ଭାଇରାଲ ଭିଡିଓରେ ଥାନା ଆଇଆଇସିଙ୍କଠାରୁ ଆରମ୍ଭ କରି ହୋମଗାର୍ଡ ପର୍ଯ୍ୟନ୍ତ ଖାକି ପୋଷାକରେ ଅବିର ଲଗାଇ ସଙ୍ଗୀତର ତାଳେ ତାଳେ ଠୁମକା ଲଗାଇ ନୃତ୍ୟ କରୁଛନ୍ତି । ଉଭୟ ମହିଳା ଓ ପୁରୁଷ ପୋଲିସ ଅଧିକାରୀ ଏହି ନୃତ୍ୟରେ ସାମିଲ ହୋଇଛନ୍ତି। ଏପରି କି ମହିଳା ପୋଲିସ କର୍ମଚାରୀଙ୍କ ଅଣ୍ଟା ଧରି ପୁରୁଷ ପୋଲିସ ଅଧିକାରୀ ନୃତ୍ୟ କରୁଥିବା ଦେଖିବାକୁ ମିଳିଛି, ଯାହାକି ଖାକିରେ ଅବିର ନୁହେଁ କଳାଦାଗ ବୋଲି ସାଧାରଣରେ ମତ ପ୍ରକାଶ ପାଇଛି। ଏ ନେଇ ମାନବାଧିକାର ସୁରକ୍ଷାକର୍ମୀ ଭଜମନ ବିଶ୍ୱାଳ ଏହି ଭାଇରାଲ ଭିଡିଓକୁ ମୁଖ୍ୟମନ୍ତ୍ରୀଙ୍କ ନିକଟକୁ ଟୁଇଟ୍ କରି ଦୃଷ୍ଟି ଆକର୍ଷଣ କରିଛନ୍ତି। ତେବେ ଏହି ଘଟଣାରେ ଥାନା ଏଏସ୍ଆଇ ସଞ୍ଜୟ ଦାସଙ୍କୁ ନିଲମ୍ବନ କରାଯାଇଛି ବୋଲି ଏସ୍ପି ରାହୁଲ ପିଆର ସୂଚନା ଦେଇଛନ୍ତି ।
